1690 китоб туҳфаи сафири Ҳиндустон ба Китобхонаи миллӣ

Сафири Фавқулодда ва Мухтори Ҷумҳурии Ҳиндустон ҷаноби Вираҷ Сингҳ ба Китобхонаи миллӣ 1690 адад китоб туҳфа намуд, ки асосан ба забони русианд.

Ин китобҳо бештар асарҳои адибони бузурги оламанд, ки дар бахши адабиёти ҷаҳони озмуни «Фуруғи субҳи доноӣ китоб аст» барои мутолиа тавсия шудаанд. Истифодабарандагони Китобхонаи миллӣ метавонанд ин китобҳоро, ки 5 қисми асарҳои Мигел де Сервантес, Робиндранат Такур, Ҷек Лондон, Ҳенрих Ҳейне, Оноре де Балзак, Карел Чапек, Александр Дюма, Арасту, Гюстав Флобер ва дигаронро дар бар мегирад, бихонанд.

Алфонс Доде, Анатол Франс, Ҷон Стейнбек, Гогол, Тургенев, Николай Островский, Маргарет Митчел, Толстой, Ги де Мопассан, Проспер Мериме, Ҷорҷ Санд, Шолохов, Чапыгин аз дигар нависандаҳои шинохтаи ҷаҳонанд, ки аз ҷониби хонандагони китоб барои мутолиа дархост мешавад ва аксари онҳо дар китобхонаи миллӣ мавҷуданд.

Дар зимн сафирон, шахсони алоҳида, олимону донишмандон ба китобхона китобҳои зиёд эҳдо менамоянд ва мавҷудияти гўшаи академикҳо низ дар ин макони пурганҷ далели он аст, ки олимону академикҳо бо китобхона ҳамкории пайваста доранд.

Раҳима АЪЗАМ,
бахши матбуот
ва робита бо ҷомеа.