Ҳудудан 160 китоби Ҷумъабой Азизқулов ба  Китобхонаи миллӣ  тақдим гардид

Фарзанди Ҷумъабой Азизқулов 158 китоб ва 14 маҷалла аз китобхонаи шахсии падари марҳумашро ба Китобхонаи милл» тӯҳфа намуд. Китобҳои тақдимгардида дар шуъбаи мукаммалгардонӣ дар ҳоли коркард карор дошта, чун ҳарвақта онҳоро ба соҳаҳо тақсимбандӣ намуда, ба шуъбаҳои дахлдор ирсол хоҳанд кард.

Аз ҷумлаи китобҳои тақдимшуда 16 китоб ба мавзуъҳои филологӣ, 3 китоби дар бораи фолклор, 1 китоби тиб ва 138 китоби боқимонда бадеӣ мебошанд.   14 нусха маҷалла аз 6 номгӯй иборат буда, 2 нусха  “Фурӯғи тарҷума”, 2 нусха “Паёми Суғд”, 6 нусха “Рӯдакӣ” (бо ҳуруфи форсӣ, чопи Эрон), 2 нусха “Суханшиносӣ” ва “Маорифи Тоҷикистон” ва як нусха “Гузориши мерос”(чопи Эрон бо ҳуруфи форсӣ) мебошанд.

ҶУМЪАБОЙ АЗИЗҚУЛОВ – олим, пажӯҳишгар, донишноманавис, тарҷумони тоҷик 10 июни соли 1934 дар деҳаи Панҷрӯди ноҳияи Панҷакент зода шудааст. Соли 1958 факултаи таъриху филологияи Донишгоҳи давлатии Тоҷикистон ба номи В.И.Ленинро хатм кардааст. Баъдан ходими илмии пажӯҳишгоҳи забон ва адабиёти ба номи Абӯабдуллоҳи Рӯдакӣ, муҳаррири илмӣ, мудири шуъба, котиби масъул, муовини сармуҳаррир ва сармуҳаррири Энсиклопедияи советии тоҷик будааст.

Соли 1974 дар мавзӯи «Синдбоднома»-и Заҳирии Самарқандӣ» рисолаи номзадӣ ҳимоя кардааст.Намунаҳои осори Саъдӣ, Савдо, Айнӣ, Лоҳутӣ, Ҳамдӣ ва дигаронро таҳқиқ ва барои чоп омода сохтааст.

«Пандномаи Синдбод» (1963), «Гулзори ҳикмат» (1966), «Китоби Ҳаким Синдбод» (1979, 2012) дар таҳия ва таҳқиқу тавзеҳи ӯ ба чоп расидаанд.Чандин мақолаи Энсиклопедияи советии тоҷик ва маҷмӯаи мақолаҳои «Андӯхти рӯзгор» (2014) ба қалами ӯ тааллуқ доранд.

Қиссаву романҳои В.Шукшин «Суҳбати маҳтобшаб» (1981), А.Олимҷонов «Пайкони Маҳамбет» (1984), «Корвон меравад сӯйи Офтоб» (1966, ҳамроҳи Ҳ.Аҳрорӣ), А.Дюма «Се мушкетдор» ва «Граф Монте-Кристо», асарҳои алоҳидаи О.Гончар, И.Авиҷюс («Бехонумон»), Н.Нерсесян («Рустаму Дилоро»), Я.Гашек («Саргузашти сарбози чолок Швейк»), О.Генри, Р.Такур, А.Аббос Т.Ҷумъагелдиев, В.Латсис ва дигаронро ба тоҷикӣ гардондааст.

Тарҷумаи чанд филми ҳунарӣ низ ба қалами ӯ тааллуқ дорад.

Корманди шоистаи маданияти Тоҷикистон, барандаи Ҷоизаи адабии ба номи Садриддин Айнӣ.

Аз соли 1990 узви Иттифоқи нависандагони Тоҷикистон буд.

Ҷумъабой Азизқулов 13 августи соли 2021 дар синни 87-солагӣ аз олам рафт.

Фарзона  ШАРИФОВА,
мутахассиси шуъбаи
мукаммалгардонии фонд