Баҳси “Мактуби таги бурё” дар маҳфили “Фурӯғ”

“Мактуби таги бурё” асари  нависандаи маъруф Болта Ортиқов аст, ки дар барномаи «Фурӯғ»-и шуъбаи адабиёти кўдакон ва наврасони Китобхонаи миллӣ ва телевизиони кўдакону наврасон “Баҳористон” таҳлил шуд.

“Танаффуси калон буд, ки ба зали мактаб хаткашон даромада омад. Бачагон зуд гирди ўро печонида гирифтанд.

Хаткашон сукаашро кушода, мактубу газетаҳоро ба соҳибонашон супоридан гирифт.”

Чунин оғоз мешавад ҳикояе, ки имрўз фаъолони шуъбаи ададбиёти кўдакон ва наврасони Китобхонаи миллӣ дар бораи он суҳбат намуданд. Аз суҳбат бо чанд нафар иштирокдорони ин маҳфил аён гашт, ки баъзеи онхо 4 маротиба ин китобро хондаанд, то дар барнома доир ба ин ҳикоя иттилои дуруст дода тавонанд. Мисли дафъаҳои гузашта пас аз нақли ин ҳикоя ба суолу ҷавоб гузаштанд. Чун анъана як гурӯҳ довари озмуни ҷумҳуриявии “Фурўғи субҳи доноӣ иктоб аст” шуданду як идда ширкаткуннадаи ин озмуни ҷумҳуриявӣ. Ҳакамон ба суолҳояшон ҷавобҳо гирифта, дигар паҳлуҳои асарро таҳлилу баррасӣ намуданд.

Аз гуфтугў бо чанд падару модар, ки шоҳиди суҳбати фарзандонашон гардида буданд, бармеомад, ки онҳо то нисфи шаб бо фарзандашон ин китобро хондаву атрофи он пурсишу посух карданд, то дар барнома бо масъулият суханронӣ намоянд.

Ин барнома дар рушди тафаккур ва китобхонии насли наврас кўмак хоҳад кард.

Болта Ортиқов, нависандаи шинохтаи тоҷик 5 майи соли 1924 дар шаҳри Самарқанд ба ҷаҳон омадааст. Соли 1952 факултаи филологияи Донишкадаи омӯзгории Самарқандро хатм кардааст. Дар мактабҳои ноҳияи Кофарниҳон муаллимӣ кардааст. Мудири шуъбаи рӯзномаи «Пионери Тоҷикистон», хабарнигори рӯзномаи «Маориф ва маданият» будааст. Солҳои охир дар Самарқанд зиндагӣ ва эҷод мекард.

Офаридаҳояш аз соли 1953 ба чоп расидаанд. Ў бештар барои бачаҳо менавишт, ки маҷмӯаҳои «Овози ҷавонон» (1954), «Ҷиянҳои қишлоқӣ» (1958), «Конфетҳо» (1962), «Духтарчаи нағз» (1965), «Себи орухур» (1966), «Мактуби сегӯша» (1971), «Ҳандалак» (1973), қиссаҳои машҳури «Таътил» (1959), «Полвон» (1964), «Гули садбарг» (1966), «Бачаҳои Лолазор» (1975), «Дурдонаҳои Зарафшон» (1980), «Пайи хун» (1982), «Дандони тило» (1982), «Достони Самарқанд» (1985), «Ҳирси одам» (1985), «Киштзор» (1987) ва ғ. аз он ҷумлаанд.

Китобҳои ин нависанда ба забони русӣ низ нашр шудаанд, аз ҷумла китобҳои «Каникулы» (1963) ва «Неугомонный Насыр» (1975  дар Маскав чоп шудаанд.

Ин нависанда 19 ноябри соли 2001 даргузашт.

Кулли китобҳои Болта Ортиқов дар Китобхонаи миллӣ мавҷуданд.

Раҳима АЪЗАМ, бахши матбуот ва робита бо ҷомеа.