Даври ҷамъбастии озмуни ҷумҳуриявии “Хонандаи беҳтарини асарҳои Пешвои миллат” оғоз шуд

Субҳи имрӯз зимни маросими тантанавӣ директори Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон, доктори илмҳои педагогӣ, профессор  Ҷумахон Файзализода даври дуюми озмуни ҷумҳуриявии “Хонандаи беҳтарини асарҳои Пешвои миллат” – ро ифтитоҳ намуд.

Директори Китобхонаи миллӣ иброз дошт, ки  мақсад аз ташкил ва баргузории озмуни мазкур ин омӯзиши ҳарчи бештари асарҳои Пешвои миллат ва тарғиби сиёсати пешгирифтаи муҳтарам Эмомалӣ Раҳмон барои тамоми қишри ҷомеа мебошад. Зимни суханронии худ директори Китобхонаи миллӣ ҳамчунин тамоми ширкатдорони даври дуюми озмунро, ки аз тамоми манотиқи кишвар ҷамъ омадаанд, хуш омадед гуфта, барои ҳар яки онҳо барору комёбӣ таманно намуд.

Дар мароси ифтитоҳи озмуни мазкур ҳамчунин намояндагон аз дастгоҳи иҷроияи Президенти Ҷумҳурии Тоҷикистон, Вазорати маориф ва илм, Маркази таҳсилот ва ғайра ширкат ва суханронӣ намуданд.

Масрур Абдуллозода – мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа зимни баромади худ қайд намуд, ки баргузории озмуни мазкур метавонад, яке аз сарчашмаҳои асосии ҳавасманднамоии ҷавонон ба омӯзиши ҳаматарафаи давлатдории Пешвои миллат ва шинохти таъхири тоҷикон мегардад.

Дар идома Фарҳод Раҳимӣ – раиси кумита оид ба  таҳсилоти ибтидоӣ ва миёнаи касбии  назди ҳукумати Ҷумҳурии Тоҷикистон  суханронӣ намуд. Ӯ қайд кард, ки китобҳои Пешвои миллат ҳар яке қадр ва манзалати бузурги худро дошта арзиши онҳо дар ҳеҷ давру замоне коста намегардад. Ҳамчунин ба ташкилкунандагони озмун ва тамоми иштирокдорон ин иқдомро муборакбоди намуд.

Муовини вазирии маориф ва илми Ҷумҳурии Тоҷикистон Лутфия Абдухолдиқзода  дар охир баромад намуда, таъкид намуд, ки шаффофият  дар озмунро пурра назорат мекунанд ва хонандаи беҳтарин интихоб ва сазовори мукофоти озмун мегардад.

Дар фарҷоми маросим муовини директори Китобхонаи миллӣ Сайфиддин Камолзода вобаста ба ҷараёни баргузорӣ ва толорҳои гузаронидани озмун ба иштирокдорон маълумот дода онҳоро ба толорҳои баргузорӣ роҳнамоӣ намуд.

Маврид ба зикр аст, ки озмуни «Хонандаи бещтарини асарщои Пешвои миллат» аз 24 то 27-уми сентябри соли 2024 дар Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон бо ду забон: тоҷикӣ ва русӣ баргузор мегардад.

Ҷойи якум ба иштирокчие дода мешавад, ки  беш аз 90% асарҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмонро мутолиа ва ҳифз намудааст.

Ғолибони даври дуюм (1,2,3,) баъди хатми муассисаи таҳсилоти миёна ва олии касбӣ ба ихтисоси интихобкардаашон барои идомаи таҳсил, зинаи магистратура ва маълумоти дуюми олӣ ба мӯҳлати се сол бе супоридани имтиҳон ба тариқи ройгон тибқи тавсияномаи Вазорати  маориф ва илми Ҷумҳурии Тоҷикистон ба Академияи идоракунии давлатии назди Президенти Ҷумҳурии Тоҷикистон ва муассисаҳои касбии баъд аз муассисаи олии таълимии кишвар қабул карда мешаванд. Тартиби қабулро Вазорати маориф ва илми ҶТ муайян мекунад.

Ғолибон ба ду гурӯҳ ҷудо карда мешаванд: Ғолибони муассисаҳои таҳсилоти миёнаи касбӣ ва олии касбӣ. Барои ғолибон ба ин тартиб мукофотҳои пулӣ таъин шудааст:

Барои ҷойи якум – 20 000 сомонӣ ( ба ҳар яке аз ғолибон)

Ҷойҳои дуюм – 15 000 ( ба ҳар яке аз ғолибон)

Ҷойҳои сеюм (ду ҷой ба ҳар кадом гурӯҳ) – 7 500 сомонӣ ( ба ҳар яке аз ғолибон);