Аъзои шуъбаи хидматрасонӣ ба шахсони имконияташон маҳдуд ғолиби гранти Президенти Ҷумҳурии Тоҷикистон шуд
Шаҳноза Давлатмирова, хонандаи шуъбаи хидматрасонӣ ба шахсони имконияташон маҳдуди Китобхонаи миллӣ ғолиби озмуни гранти Президенти Ҷумҳурии Тоҷикистон ҷиҳати дастгирӣ ва рушди фаъолияти соҳибкории занон барои солҳои 2021-2025 гардид.
Дар ин озмун ӯ соҳиби 25 000 сомонӣ гардид, ки ният дорад онро барои сохтани коргоҳи дӯзандагӣ сарф кунад.
Шаҳноза мегӯяд барои оғози кор боз ба сармоя ниёз дорад, зеро бо маблағи дарёфтшуда танҳо асбобҳои корӣ-мошини дузандагӣ харидорӣ кардаасту тамом. Барои ба иҷора гирифтани бино маблағаш намерасад.
– Дар хонаҳои навсохт биноеро ба иҷора гирифтанӣ шудем, маблағи кирояи он бисёр гарон аст: 5000 сомонӣ. Қаблан аз дигар ҷо иҷора гирифтем, аммо бино оташ гирифту маҷбур шудем, ба бинои дигар куч бандем.
Мушкили Шаҳноза барои таъсиси коргоҳи дӯзандагӣ танҳо бинои кироя аст, ӯ мехоҳад занону духтарони имконоташон маҳдуд ё модарони фарзанди маъюбдоштаро ба кор ҷалб намояд, то онҳо дар зиндагӣ азоб накашанду аз назари молӣ таъмин бошанд. Мо нақша дорем танҳо ба дӯхтан ва фурӯши либосҳои миллӣ машғул шавем, куртаи чакан, атлас, тоқӣ ва дигар навъи либосҳои миллӣ. Занони зиёдеро медонам, ки иллатҳои ҷисмонӣ доранд доранд ва барои пешбурди зиндагиашон ниёзманди маблағанд, онҳо талбандагӣ мекунанд ё хиҷолат мекашанд, ки миёни ҷамъият бароянду кор куннад. Коргоҳи мо махсус барои чунни занон аст, онҳо набояд худро аз ҷомеа дур бигиранд ва афсурда бишаванд, бояд ҳунарҳои худро ба кор баранду нишон бидиҳанд, ки зиндагӣ идома доранд. Бояд барои гурӯҳи дигари бонувони камтавон намуна бошанд, гуфт Шаҳноза дар идомаи суҳбаташ.
Зимнан Шаҳноза ҳамчунин иброз дошт, ки худаш низ ба дӯхтани куртаву тоқӣ ва курпаҳои миллӣ машғул аст ва духтарашро, ки дар интернат мехонад, дар фурсатҳои холиаш ба кор ҷалб кардааст.
Шаҳноза умедвор аст, ки сарпарасте пайдо мешаваду ӯро дастгирӣ менамояд ва бо кӯмаки ҳам дар шукуфоии ҷомеа саҳм мегирем ва дар рушди гурӯҳи осебпазири ҷомеа некие менамоем.
Мо низ бовар дорем, ки дар роҳи пешгирифтааш Шаҳноза комёб мегардад ва ба ин васила сафи бекорон миёни ашхоси дорои нуқсонҳои ҷисмонӣ кам мегардад ва ба буҷаи кишвар низ фоидае мерасад. Дунё ба умед аст!
Саодат Набиева сардори шуъбаи хидматрасонӣ ба шахсони имконияташон маҳдуди Китобхонаи имллӣ .