Барномаи “Фурӯғ” – дӯстдорони китобро ба ҳам меорад
Асари машҳури “Муаллими сахтгир”-и нависанда Баҳром Фирӯз аз зумраи асарҳои бисёр ҷолиб бо саҳнаҳои таъсирбахш барои хурдсолон ва наврасон мебошад. Ин навбат дар барномаи телевизионии “Фурӯғ” ки бо ташаббуси шуъбаи адабиёти кӯдакон ва наврасони Китобхонаи миллӣ дар ҳамкорӣ бо телевизиони кӯдакону наврасон “Баҳористон” таҳия ва пахш мегардад, ин асари нависандаи хушном мавриди баҳс қарор дода шуд.
Маҳфили “Фурӯғ” бо иштироки адиби дӯстдоштаи кӯдакон Азизи Азиз баргузор шуд, ки дар он хонандагони фаъоли шуъбаи адабиёти кӯдакон ва наврасон ва ҳамчунин довталабони озмуни “Фурӯғи субҳи доноӣ китоб аст” дар бораи асари машҳури “Муаллми сахтгир”-и Баҳром Фирӯз суханронӣ карданд.
Азизи Азиз маҳфилро оғоз намуда, аз одобу ахлоқи баланд ва дӯстдории китобу мактаб бо хонандагон суҳбат кард. Панд гирифтан аз ҳар амали калонсолон ва эҳтиром доштан ба онҳо аз мавзӯҳое асосие буд, ки дар идомаи маҳфил мавриди гуфтугу қарор доданд.
Дар ҷамъбаст иштирокдорон миёни ҳам суолу ҷавоб карда, порчаҳо аз лаҳзаҳои ҷолиби асарро хонданд. Ҳамаи ин барои баланд бардоштани завқи китобхонии бачаҳо махсусан кӯдакону наврасон таъсири калон дорад, ки сафи китобдӯстдорон ба маротиб зиёд гардида истодааст.
Бояд зикр намуд, ки тибқи дастури Пешвои миллат соли ҷорӣ низ барои иштирокчиёни даври чумҳуриявии Озмун имтиёзи махсус пешбинӣ гардидааст, ки мувофиқи он, довталабони даври чоруми Озмун (хонандагони синфи 11) ба ихтисосҳои равияи омӯзгорӣ ва филологии муассисаҳои таҳсилоти миёна ва олии касбии кишвар бе озмун ба гурӯҳҳои ройгон қабул карда мешаванд.
Бо дарназардошти тағйироти воридгардида маблағи умумии мукофоти Озмун 4 570 000 (чор миллиону панҷсаду ҳафтод ҳазор) сомониро ташкил дода, нисбат ба соли гузашта 695 000 (шашсаду наваду панҷ ҳазор) сомонӣ зиёд пешбинӣ гардидааст.
Абдуғаюр Саломов
шуъбаи тарғиб ва
барномаҳои фарҳангӣ