Бузургмеҳри Баҳодур дар суҳбат бо шахсони имконияташон маҳдуд дар Китобхонаи миллӣ
Маҳфили “Ганҷи сухан”-и шуъбаи хидматрасонӣ ба шахсони имконияташон маҳдуди Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон имрӯз бо ширкати шоири ҷавон Бузургмеҳри Баҳодур баргузор гардид.
Дар барнома муовини директори Китобхонаи миллӣ Муҳаммадиқбол Атозода суханронӣ намуда, маҳфилро оғоз ва меҳмонро хушомадед гуфт. Ӯ иброз намуд, ки имрӯзҳо ҷашни ҷаҳонии Наврӯз дар кишвари мо тантана дорад дар саросари кишвар маҳфилҳои наврӯзӣ бо шукуҳу шаҳомати хоса баргузор меградад. Ин маҳфили мо низ дар арафаи ҷашни Наврӯз барпо шуд, ки паёми нек аст.
Яке аз шоирони бисёр ҷавону умедбахш, ки каломаш новобаста аз синну солаш дар дилҳо ҷо гирифтааст ва бар ашъори рангину зебои ӯ чандин оҳангсозон оҳанг баставу овозхонон суруд хондаанд, Бузургмеҳри Баҳодур ба Китобхонаи миллӣ ташриф овардааст.
Дар оғоз Бузургмеҳри Баҳодур барои ҳаводорони шеъри нобаш дубайтиву ғазалҳои тару тозаашро хонд ва аз аҳли нишаст хост суолу андешаҳояшонро иброз доранд.
Миёни аъзоёни шуъбаи хидматарсонӣ ба шахсони имконоти маҳдуддошта ва меҳмони маҳфил Бузургмеҳри Баҳодур пурсишу посух ва табодули афкор сурат гирифт.
Меҳмони маҳфил дар идомаи суханрониаш зикр намуд, ки бо шахсони камбуди ҷисмонӣ доранд, се сол пеш дар маҳфили ни шуъба ширкат доштааст ва аз он хотироти хубе дорад.
-Шумо аз ҳар ҷиҳате, ки муқоиса кунем, бузургтар ва нерумандтар аз мо ҳастед. Мутаасифона, мо шахсони солим танбалӣ мекунем, зарфиятҳоямонро истифода намекунем. Аз ҳама муҳим шукр намекунем.
– Ман гардонандаи аввалин ҳамоиши ҷаҳонии шахсони имконияташон маҳдуд дар Тоҷикистон ҳастам. Се рӯз ман он ҷо ровӣ будам ва дӯстони зиёд аз миёни ин қишри ҷамъият пайдо кадам.
3 рӯз ҳаёти маро тағйир дод, назари маро ба зиндагӣ тамоман дигар кард, чунки дар семинар-тренинги серӯза медидам, ки шумо чӣ гуна иқдомҳои аҷиб ба роҳ мемондед, баъзеҳо роҳбари ташкилоти худ буданд, бархе соҳиби ташкилоти машварати ройгон барои шахсони камтавон доштанд, ки ба ҳамтақдиронашон маслиҳати бепул медоданд.
Ин маҳфили серӯза дар ман эҳсоси шукрро бедор кард, ки зиндагӣ пасту баландиҳо дорад, бо вуҷуди он ки дар зиндагӣ чоҳканҳо ҳастанд, бояд шукр кунем.
Агр ягон кас шеър ё ҳикоя навишта бошад, метавонем таҳрир кунем, машварат бидиҳем.
Дар поёни суҳбат Бузургмеҳри Баҳодур ба баъзе хонандагони шуъбаи мазкур китобчаи худро ҳадя намуд.
Раҳима Аъзам, бахши матбуот ва робита бо ҷомеа.