Чӣ хуб аст, агар сарвар қаҳрамонро мешиносад…
Аз мутолиаи китоби «Шаҳиди корзори нангу номус» ҳамин ҷумла пеши назар омад. Саймумин Ятимов-Раиси Кумитаи давлатии амнияти миллии Ҷумҳурии Тоҷикистон дар пешгуфторе ба ин китоб бо номи “Нигаҳ кун бад-ин лашкари номдор” аз рӯзгору зиндагии басо кутоҳи қаҳрамони ин китоб сатрҳое навишта, ки гумон мекунӣ ҳамдаму ҳамнафаси ӯ буда. Аммо чунин нест, балки сарвари идораи амнияти кишвар на танҳо ҳаводиси гузаштаро хуб медонад, балки қаҳрамонони марзу бумро на танҳо бо ному насаб,балки бо корномаашон мешиносад.
Ӯ аз ҷумла навиштааст:
Субҳи 14-уми сентябри соли 2022 навбатдори қисми низомӣ бонги хатар эълон кард.Ҷанговарон саф оростанд. Командир гузориш дод, ки душман аҳдшиканона ба дидбонгоҳи сарҳади мо ҳуҷум кардааст. Дар натиҷа як сарбоз ба ҳалокат расида, сарбози дуюм сахт маҷрўҳ шудааст. Тибқи маълумоти дастрасгардида, душман дар тамоми хати сарҳад сафарбарии ҷанг эълон доштааст ва эҳтимолияи задўхурди шадид вуҷуд дорад.
Сардори қисми низомӣ, ҳамзамон таъкид намуд, ҳама таъҷилан мавқеъҳои ҳарбии худро ишғол намоянд. Аммо шарти асосӣ он аст, ки бо иғвогариҳои душман дода нашаванд. Бидуни оташкушоии адў аз силоҳ истифода нанамоянд. Вазифаи аслӣ ҳимоя кардани қаламрави мамлакат, марзу буми он ва пеш, аз ҳама, аҳолии осоишта мебошад .
Бо гирифтани мавқеъҳои ҷангии таъиншуда, маълум гашт, ки душман дар ҳар қисмати сарҳад бо истифода бо тамоми намуди силоҳ ба иғвогарӣ сар карда, мехоҳанд макони истиқрори неруҳои худро мустаҳкам намуда, ба ҳуҷуми ғосибона гузарад. Сарбозону афсарони тоҷик дар куллаи самтҳои низои мусаллаҳона ҷавонмардӣ ва истодагарӣ нишон медиҳанд. Ба хотири нигаҳ доштани сулҳу оромӣ вориди ҷанги муташаккилона ва дастаҷамъӣ нагаштанд. Фармондеҳони ситод тибқи супориши Роҳбари давлат амал карда, кўшиш менамуданд, ки муноқиша байни ду мамалакат хусусияти умумӣ нагирад. Минтақа се нуфуз аст. Аз иштибоҳоту нофаҳмиҳо одамони ҳарду ҷониб талаф меёбанд.
Аммо ба ҷои гуфтушуниди сулҳҷўёна ва музокироти солеҳ душман роҳи фитнаву хиёнатро пеш гирифт.
Шоми рўзи 15 –уми сентябр эълон кард, ки субҳи рўзи 16 – ум омодаи гуфтушунид мебошанд. Вақт ва макони мулоқот ҳам муайян гардид. Ба ҳамин восита хост, моро дар ғафлат бимонад.
Аммо субҳи барвақти тайингардидаи соати 4:30 дақиқа душман аҳдшиканона, дар тамоми тўли хатти сарҳади давлатӣ, бо истифода аз ҳамаи қувваи дар ихтиёраш қарордошта ба ҳуҷуми мусаллаҳона гузашт. Объектҳои ҳарбӣ, дидбонгоҳҳо, постҳои сарҳадӣ ва деҳаҳоро зери оташ қарор дод.
Сарҳадчиён ва дастаҳои таъйиноти махсуси мо маҷбуар шуданд, ки барои ҳимояи марзу буми ватанамон ва хунсо намудани ҳамлаи фурсатталаб бархезанд.
Дар муддати шаш соати ҷанги шадид сарҳадчиён ва воҳидҳои таъйиноти махсус, дар кулли хатти фронт, ҳуҷуми ваҳшиёнаи адуро зада гардониданд. Самтҳои асосие, ки душман мехост зарари харобкунанда расонад, маҳалҳои аҳолинишин маҳсуб мегаштанд.
Дар хатти пеши ҳимояи ҷамоати Ворух Муҳаммадҷон Одинаев масъули ҷангӣ буд. Дастаи ў дар муддати чор соати ҷанги беамон тавонист, на танҳо зарбаҳои пайдарҳами душманро мардонавор зада баргардонад, балки нагузошт, ки осеби ҷиддӣ ба сокинони деҳаи Ворух бирасад.
Ду нафар аз ҷангиёни гурӯҳи Муҳаммадҷон маҷруҳ шуда бошанд ҳам, онҳо ҷабҳаро тарк накарданд ва бо вуҷуди даштани камтарин қувва, бо шуҷоату мардонагӣ, амали қаҳрамонона ба душман посух медоданд, ки: « Ҷангҳои Рустамона андар ин майдон кунем, даст агар аз тан биафтад, ҷанг ба дандон кунем», ва ба хасми ҳамлагар зарбаҳои ҳалокатбор мезаданд.
Оқибат дастаҳои одамхори душман силоҳу муҳиммоти худро дар майдони разм партофта, рў ба гурез ниҳоданд.
Гурӯҳҳои дар баландиҳо камингирифтаи душман вакте ҳис карданд, ки маҳз ҷанговарони гурўҳи Муҳаммадҷан Одинаев бартарияти ҷангиро дар мавқеи хароб ба даст оварда истодаанд, тирандозони касбии худро барои таҳти нишон гирифтани онҳо сафарбар намуданд.
Тири душмани бадхоҳу ҷанҷў оқибат ҷавонмарди шуҷои ватанро аз по афтонд.
Ҳамсангарҳои Муҳаммадҷон Одинаев бо эҳсоси дард дар қалби хеш ва ҳисси интиқом дар сар, командири худро зери оташи тир аз майдони чанг берун бароварда, ба ақибгоҳ равон карданд.
Вале афсус сад дареғ! Аз талафи хуни зиёд, дили сарбози вафодору ҷоннисори ватан аз тапидан боз монд. Ватан боз як фарзанди содиқу қаҳрамонашро аз даст дод.
Ҳамяроқони қаҳрамон дар пайравӣ ба командири далери хеш бо тамоми қувва болои душмани қаттолу ғаддор ҳамла намуданд, лонаи чуғзони ҷангро ошкор карда, ба онҳо зарбаҳои ҷонкоҳу ҳалокатбор заданд.
Родмардони Ватан, ҳамсафони Муҳаммадҷон Одинаев то охири рўз дар тамоми ҷабҳаҳо хасмро дар камингоҳи хунинаш несту нобуд сохтанд. Сарзамини аҷдодии худро соҳиб гаштаанд.
Корномаи чунин фарзанди Ватан ба мисли Муҳаммадҷон Одинаев сабаб шуд, ки тарафи муқобил бо эҳсоси хиҷолату сари паст байрақи сафеди мағлубият бардошта, бо илтиҷои гуфтушунид вориди Тоҷикистон гардиданд…
Маҷмуаи мақолот ва ашъор таҳти унвони «Шаҳиди корзори нангу номус» ба хотири яке аз қурбониёни роҳи Истиқлоли ватан Муҳаммадҷон Одинаев , ки 16 .02 .2022 дар маҷораҳои сарҳади Тоҷикистон ва Қирғизистон ҷони худро аз даст додааст, бахшида шудааст.
Ин китоббро хонандагони азиз метавонанд дар Китобхонаи миллӣ мутолиа намоянд.
Фарзона ШАРИФОВА,
мутахассиси шуъбаи
мукаммалгардонии фонд