Дар Китобхонаи миллӣ Конфронси байналмилалии илмӣ-амалии «Мавлоно муршиди ваҳдат ва гуфтугӯи тамаддунҳо» оғоз шуд

Чанд лаҳза пеш дар Китобхонаи миллии Тоҷикистон  бахшида ба 815- солагии Мавлоно Ҷалолуддини Балхӣ бо ширкати ҷамъе аз донишмандони ватаниву хориҷӣ Конфронси байналмилалии илмӣ-амалӣ оғоз ба кор кард.

Конфронсро бо сухани ифтитоҳи директори Китобхонаи миллӣ – доктори илмҳои педагогӣ, профессор Файзализода Ҷумахон Хол оғоз намуд. Вай меҳмононро хайрамақдам гуфт ва афзуд: Ҳузури мубораки Шуморо донишмандони муҳтарам ба боргоҳи хираду маърифат – Китобхонаи миллии Тоҷикистон хайрамақдам мегӯям ва таманнои саломативу баракати рӯзгори азизонро дорам.

Рӯҳи муқаддас ва хотири арҷманди пири хирад – Мавлоно Ҷалолиддини Балхӣ-Румӣ имрӯз сабаби дидор ва мубодилаи афкори азизони донишманд ва пажӯҳишгарони осори ӯ гардидааст.

Китобхонаи миллии Тоҷикистон тасмим гирифтааст ба ифтихори 815-солагии орифи бузург, муршиди саодати башарӣ ва муаллими одобу ахлоқ Мавлонои бузург конференсияи байналмилалӣ таҳти унвони “Мавлоно – муршиди ваҳдат ва гуфтугӯи тамаддунҳо”-ро бо иштироки донишмандон, адабиётшиносон, шоирону нависандагон ва мавлонопажӯҳон аз кишварҳои гуногуни олам баргузор намояд.

Аз гӯшаву канори ҷаҳон ҷамъ омадани ворисони Мавлоно ва мухлисони андешаву афкори ӯ баёнгари толиби ваҳдати саросарии бани башар будани худи Мавлонои бузург мебошад.

Профессор Файзализода дар идомаи суханронии муқаддимотии худ иброз дошт, ки дар воқеъ Мавлоно Ҷалолиддини Балхӣ фарзанди як миллат, минтақаи ҷуғрофӣ ва ё давраи мушаххас набуда, балки андешаи ӯ созгору мувофиқ ба кулли бани башар ва наслҳои замони худу имрӯзу фардои инсоният аст.

Таълимоти ӯ ҳидоятгари роҳи рост, андешаи дуруст, ахлоқи ҳамидаи инсонӣ, ваҳдату инсондӯстӣ ва саодати ҳамешагии кули “Одам” аст. Ҳамин аст, ки имрӯз дар саросари ҷаҳон новобаста аз қавму миллат ва дину оин пайравон ва мухлисону пажуҳандагони осори ӯ аз таълимоташ баҳра мегиранд ва насли имрӯзи инсониятро ба роҳи саодати башарӣ ҳидоят менамоянд. “Мавлоно – муршиди ваҳдат ва гуфтугӯи тамаддунҳо” ном гирифтани конференсияи имрӯза низ ба ҳамин мантиқ аст.

Директори Китобхонаи миллӣ аз нақши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар гиромидошти саромадони адабу фарҳанги форсу тоҷик сухан гуфт ва афзуд: Дар замони Истиқлоли давлатии Тоҷикистон гиромидошти фарзонафарзандони миллат, ниёкони арҷманд ва шоирону нависандагони халқи тоҷик ба ҳукми анъана даромадааст, ки ин бевосита аз ҳидоятҳо ва ибтикороти хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сарчашма мегирад. Бо дастури наҷибонаи Пешвои миллат ҳамасола бузургдошти чеҳраҳои мондагор ва шахсиятҳои муътабари миллат таҷлил мегардад.

Боиси сарфарозист, ки имрӯзҳо гиромидошти ниёкони бузурги мо ба феҳристи ҷашнҳои созмони Юнеско ворид мегардад, ки сабабгори шинохти миллати тоҷик дар саросари ҷаҳон мегарданд.

Ҳамасола дар кишвари азизи мо – Тоҷикистони соҳибистиқлол 30-юми сентябр ҳамчун рӯзи гиромидошти орифи барҷаста Мавлоно Ҷалолиддини Балхӣ таҷлил мешавад, ки ҳамоиши имрӯзи мо низ ба ифтихори ин санаи муборак бахшида шудааст.

Дар замони басо мушкили вазъи сиёсии ҷаҳон ва бархурди тамаддунҳо, ки сабабгори аз миён рафтани унсурҳои бунёдии инсонӣ аз қабили ваҳдату ҳамдилӣ ва инсондӯстиву хирадпарварии башарият гардидааст, баррасии таълимоти ваҳдатофар ва сулҳҷӯёнаи Мавлонои бузург дар ҳамбастагии инсонҳо ва барқарории суботу амният дар ҷаҳони имрӯз нақши калидӣ хоҳад дошт. Маҳз раванди бархурди манфиатҳо ва худкомагии баъзе аз қудратҳои ҷаҳонӣ, донишмандон ва аҳли фазлу хирадро водор месозад, ки аз дарсҳои инсондӯстӣ ва ҳамдиливу сулҳҷӯёнаи ниёкони фарҳехтаамон сӯд ҷуста, насли имрӯзи башариятро ба роҳи рост ва андешаи дуруст ҳидоят намоянд. Бе шакку шубҳа дар ин росто таълимоти Мавлои бузург сарчашмаи боэътимод ва роҳу равиши дуруст мебошад. Худи Мавлоно дар ҷое аз “Маснавии маънавӣ” мегӯяд:

Маснавии мо дукони ваҳдат аст,

Ғайри воҳид ҳар чи бинӣ он бут аст.

Дар воқеъ мавзӯи марказии “Маснавии маънавӣ” ваҳдату якдилӣ, инсондӯстӣ, шафқату меҳрубонӣ, маърифати хеш ва инсонпарварӣ аст.

Бо умеди пойдории сулҳу субот дар ҷаҳон ва равони шоди Мавлои бузург бори дигар устодони арҷманд, пажуҳишгарони осори Мавлоно, шоирону нависандагон, намояндагони корпусҳои дипломатӣ ва мухлисону дӯстдорони ашъори мондагори орифи бузург ва ҳидоятгари тариқи саодат Мавлоно Ҷалолиддини Балхиро ба Тоҷикистони азиз махсусан ба Китобхонаи миллии Тоҷикистон хайрамақдам мегӯям ва барои иштирокчиёни конференсия барори кор ва муваффақияту бурдборӣ таманно менамоям.

 То ин лаҳзаҳо намояндагони Академияи миллии илмҳо, Вазорати маориф ва илм, Комиссияи миллӣ оид ба корҳои ЮНЕСКО ва чандин нафари дигар суханронӣ намуданд.

Раҳима Бобоева