Дарси имлои забони тоҷикӣ барои кормандони Китобхонаи миллӣ

Бо ташаббуси роҳбарияти Китобхонаи миллӣ имрӯз, 4 – уми апрел бо иштироки сардорони шуъба ва бахшҳо дарси имлои забони тоҷикӣ  гузаронида шуд.

Дарс бо сухани муқаддимавии Директори Китобхонаи миллӣ, профессор Ҷумахон Файзализода оғоз шуд. Сарвари Китобхона таъкид намуд, ки донистани имлоӣ забони тоҷикӣ яке аз баҳсҳои асосии  рӯз гардидааст. Бо қабул шудани имлои нав дар навишт ва суханронии ҳар яки мо хатоҳои зиёд мушоҳида мешавад,  ки ин боиси нигаронист. Аз ҳамин лиҳоз гузаронидани дарси имлои забони тоҷикӣ айни мудаост.

Ба дарс Раиси Кумитаи забон ва ислоҳоти назди Ҳукумати Ҷумҳурии Тоҷикистон Олимҷон Муҳаммадҷонзода ва муовини Раиси Кумитаи забон ва истилоҳоти назди Ҳукумати Ҷумҳурии Тоҷикистон  Сахидод Раҳматуллозода  даъват шуда буданд.

Олимҷон Муҳаммадзода дар бораи таърих ва зарурати қабули қоидаҳои имлои забони тоҷикӣ ва хату имло то имрӯз суханронӣ кард.

Хоси забони тоҷикӣ набудани ташдид, ҷинсият  инчунин истифодаи ихтисорҳо ҳангоми навиштани номи шоирону нависандагон мавзӯҳои асосие буданд, ки дар идома мавриди баҳс қарор гирифтанд.

Аломатҳои китобӣ ва истифодаи онҳо дар навишт, ки дар имлои нав бо баъзе тағйироту иловаҳо ворид гардидаанд, мавзӯи дигари дарси имрӯза буд.

Аломатҳо ба матн эҳсос мебахшанд. Истифодаи дурусти онҳо  метавонад, матнро фаҳмо ва равшантар намояд – таъкид кард,  Сахидод Раҳматуллозода муовини Раиси Кумитаи забон ва истилоҳоти назди Ҳукумати Ҷумҳурии Тоҷикистон дар идомаи суҳбат.

Дар қисмати ҷамъбастӣ миёни иштирокдорон ва меҳмонон дар доираи мавзӯи имлои забон табодули афкор сурат гирифт.

Ёдовар мешавем, ки дарси имлои забони тоҷикӣ дар Китобхонаи миллӣ фардо низ идома меёбад.

Наргис НАЗАРЗОДА,
бахши матбуот
ва робита бо ҷомеа.
Расмҳо аз Абдуғаюр Саломов