Дасти мадади хайрхоҳон ба ниёзмандон дар арафаи ид

Дил ба даст овар, ки ҳаҷҷи Акбар аст,
Аз ҳазорон Каъба як дил беҳтар аст.

Нафарони дарёдилу нармдил ва меҳрубон ин мисраъҳои шоирро шиори худ қарор дода, пайваста ба ниёзмандону барҷомондагон дасти мададу хайр дароз мекунанд.

Дара арафаи иди Рамазон шахсони неку хайрхоҳ ба хонандагони шуъбаи хидматрасонӣ ба шахсони имконияташон маҳдуди Муассисаи давлатии “Китобхонаи миллӣ”-и Дастгоҳи иҷроияи Перезиденти Ҷумҳурии Тоҷикистон дасти мадад расонданд.

Зулфия Раҳматова, роҳбари созмони хайриявии “Нури Фирдавс” 28-уми марти соли 2025 ба 20 аъзои шуъбаи хидматрасонӣ ба шахсони дорои имконоти маҳдуд кӯмаки моливу ғизоӣ намуд.

Орд, гӯшти мурғи истеҳсоли ватанӣ, чой, шакар, маҳсулоти макаронӣ, шириниҳо, тухм, равған,  биринҷ ва дигар ғизои ниёзи аввал ва 260-сомонӣ маблағ барои 20 нафар аз ҷумлаи кумаки хайрияе буд, ки созмони “Нури Фирдавс” барои хонандагони шахсони камтавони шуъбаи хидматрасонӣ ба шахсони имконоташон маҳдуд тақдим намуд.

Дар тӯли мавҷудияташ шуъба бори аввал бо ин созмони хайрия ҳамкорӣ намуда, аз натиҷаи ҳамкориҳо қаноатманд аст.

Бояд гуфт шуъбаи мазкур барои ҳамокриҳои судманд ва таваҷҷуҳи самимӣ ва кӯмаки беғараз ба сарвари ин ниҳоди хайрия сидқан изҳори сипос намуда, дар посухи дастгириҳои холисона ба ин ширкат ҳадяи рамзӣ тақдим намуд.

Қобили зикр аст, ки дар моҳи Рамазон бо лутфу дастгирии шахсони хайрхоҳ ва ширкатҳои ватанӣ барои аъзоёни шуъбаи зикршуда ифтор дар тарабхонаҳои пойтахт дода шуд.

Ҳамчунин барои 20 нафар хонандагони шуъбаи хидматарсонӣ ба шахсони имконияташон маҳдуд аз ҷониби саховатманде  2000 сомонӣ расид. Барои ҳар нафар 100 сомонӣ. Ин маблағ шояд барои касе хеле муҳим бошад, шояд барои доруву дармони беморе ё ниёзманде ҳалли мушкилот гардад.

Пас сипос ба шахсоне, ки дар сарнавишти инсонҳо нақш мебозанд бо кӯмак, дастгирӣ, таваҷҷуҳ ва меҳрубониашон.

Изҳори сипоси бепоён ба Зулфия Раҳматова- сарвари созмони хайрияи “Нури Фирдавс”!

Умедворем ҳамокриҳои судманду пурсамари мо дар оянда низ идома меёбад.

Саломат Яъқубова,
сармутахассиси шуъбаи
хидматрасонӣ ба шасхони
имконияташон маҳдуд.