«Дастурҳои библиографӣ дар давраи истиқлол: вазъ ва тамоюли рушд»
Чунин ном дошт мизи гирде, ки 27-уми сентябри соли 2024 бо ташаббуси шуъбаи маълумотдиҳӣ-библиографии Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон баргузор гардид.
Мизи гирдро муовини директори Китобхонаи миллӣ Салима Раҷабзода оғоз намуда, аз тақозои ҷомеаи муосир дар раванди пешрафти илму техника, вусъати техникаву технологияи иттилоотиву телекоммуникатсионии ҳар соҳа ва самти фаъолияти библиографии китобхонаҳо сухан ронд. Дар идомаи ҳарфҳояш Салима Раҷабзода аз дастовардҳои мутахассисону библиографони касбии Китобхонаи миллӣ дар самти таҳияи даструҳои библиографӣ ёдовар шуд.
Директори Китобхонаи марказии илмии ба номи Индира Гандии Академияи миллии илмҳои Тоҷикистон доктори илмҳои филологӣ, профессор Шодимуҳаммад Сӯфизода, дар мизи гирд доир ба китобхонаи зикршуда маълумот дода, афзуд татбиқи самтҳои афзалиятноки стратегияи рушди миллӣ аз қобилияту истеъдоди олимони кишвар ва сатҳу сифати дастёбии онҳо аз иттилооти тозаи илмӣ вобаста аст. Дар ин радиф ӯ Китобхонаи марказии илмии ба номи Индира Гандии Академияи миллии илмҳои Тоҷикистонро ҳамчун як сохтори калидии иттилоърасонии Академияи илмҳои ҷумҳурӣ мисол овард.
Ба маълумоти профессор Сӯфизода муассисаи мазкур чун объекти арзишманд ва нодири мероси фарҳангӣ ва илмии Ҷумҳурии Тоҷикистон, маркази дорои аҳамияти миллии илмӣ-таҳқиқотӣ, илмӣ-иттилоотӣ ва фарҳангӣ дар тӯли фаъолияти беш аз 90-солаи хеш тавассути фароҳамоварӣ, ҳифзу нигаҳдории фондҳои гуногунсоҳа, библиографинамоӣ, хидматарсонии китобдорӣ-иттилоотӣ дастрасии озодонаи олимону мутахассисонро ба комёбиҳои илмӣ ва фарҳангии ҷаҳонию миллӣ таъмин менамояд.
Назира Раҷабова, муаллимаи калони кафедраи китобхонашиносӣ ва библиографишиносии Донишкадаи давлатии фарҳанг ва санъати ба номи М. Турсунзода атрофи вазъи истифодабарии даструҳои библиографӣ дар Китобхонаи миллӣ ҳарф зад.
Таъмин намудани китобхонаҳои давлатӣ- оммавӣ бо дастурҳои библиографӣ яке аз вазифаҳои асосии илми библиографияшиносӣ мебошад. Таҳлили вазъи имрӯзаи шӯъбаҳои библиографияи китобхонаҳои давлатӣ – оммавӣ ба хулосае меорад, ки дар ин самт кор суст ҷараёни дорад. Бо вуҷуди он ки дар замони соҳибистиқлолӣ нашри дастурҳои билиографӣ то андозае ҷоннок гардидааст, китобхонаҳои давлатӣ –оммавӣ бо теъдоди зарурии дастурҳои библиографӣ таъмин нестанд.
Сайидзароб Нодирзода, директори Хонаи Китоби Тоҷикистон дар мавзўи даструҳои билиографӣ изҳори андеша намуд.
Аввалин нашрияҳои иттилоотии библиографияи давлатии тоҷик 85 сол қабл, яъне соли 1939 зери унвонҳои “Солномаи китобҳо”, “Солномаи мақолаҳои маҷаллаҳо” ва “Солномаи мақолаҳои рӯзномаҳо” дар алоҳидагӣ бо се забон: тоҷикӣ, ӯзбекӣ ва русӣ бо ҳуруфи лотинӣ ва кирилӣ нашр шудаанд. Нашри мунтазами солнома дар самти баланд бардоштани иттилооти библиографӣ дар Тоҷикистон бевосита мусоидат кард ва дар заминаи он фаъолияти библиографиякунонӣ сол то сол сермаҳсул ва рангин гардид.
М. Азизқулова сардори шуъбаи феҳристҳои электронии Китобхонаи давлатии патентию техникии Тоҷикистон гуфт, ки имрӯз вижагиҳои ҷомеаи иттилоотӣ тақозо мекунад, ки китобхонаҳо барои қонеъ гардондани эҳтиёҷоти хонандагони худ ҳарчӣ беҳтару бештар аз технологияҳои муосир истифода кунанд. Дар китобхонаи давлатии патентию техникӣ корҳои автоматикунонӣ тавассути барномаи “ИРБИС” ба роҳ монда шудааст.
Дар мубодилаи афкор миёни ширкатдорон муовини директори Китобхонаи миллӣ Ҷалолуддин Нурзода низ ширкату суханроӣ намуд.
Раҳима Аъзам.