Дастури методии “Истиқлолият – дастоварди бузурги миллат” аз чоп баромад
Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон дар баробари хизматрасонии босифату саривақтӣ, таъмини шароити мусоиди мутолиа, баргузории конфронсу семинар, маҳфилу чорабиниҳо инчунин дар таҳия, тадвин ва нашри адабиёти илмӣ ва дастурҳои методиву библиографӣ давоми соҳои охир натиҷаҳои қобили таваҷҷуҳ дорад.
Таҳия, нашр ва дастраси китобдорони ҷумҳурӣ гардонидани тавсияномаҳо ва дастурҳои методиву роҳнамоҳо яке аз самтҳои муҳимми фаъолияти Китобхона буда, ҷиҳати таъмини китобдорони кишвар бо сарчашмаҳои иттилоотиву маълумотномаҳо бо истифода аз захираҳои илмӣ ва кадрии худ пайваста талош меварзад.
Инак дар идомаи иқдомҳои неки Китобхонаи миллӣ дастури методӣ-тавсиявии “ИСТИҚЛОЛИЯТ – ДАСТОВАРДИ БУЗУРГИ МИЛЛАТ” бо теъдоди 100 нусха аз чоп баромад, ки барои китобдорони саросари кишвар туҳфаи арзишманди идона ба муносибати 33-солагии Ҷашни истиқлол ва Рӯзи китоб хоҳад буд.
Қобили зикр аст, ки дар замони соҳибистиқлолии Ҷумҳурии Тоҷикистон танҳо аз ҷониби Китобхонаи миллӣ якчанд дастурҳои методию библиографӣ рўи чоп омаданд, ки дар онҳо чорабиниҳои оммавӣ бахшида ба мавзуи истиқлолияти давлатии кишвар оварда шудаанд ва истифодаи онҳо ба фоидаи кори китобдорон хоҳад буд.
Барои китобхонаҳои вилоятию марказии шаҳру ноҳияҳои мамлакат пешниҳод менамоем, ки дар рафти семинарҳои кормандони китобхонаҳо – китобдорон хулосаҳои библиографӣ ташкил намуда, ба ташкилу баргузории чорабиниҳо дар байни аҳолии минтақаи хизматрасонии онҳо тавсияҳо диҳанд, то ки ин кор тибқи нақша сурат гирифтаву ба ҳар як хонандаи китобхона самар оварад.
Дастури методии “ИСТИҚЛОЛИЯТ – ДАСТОВАРДИ БУЗУРГИ МИЛЛАТ” фарогири якчанд намуди чорабиниҳо буда, барои истифодаи китобдорон пешниҳод мегардад:
- Матни хулосаи библиографӣ таҳти унвони «Дастурҳо барои тарғиби махзани китобхона».
- Нақшаи намоиши китобии «Истиқлолият – дастоварди бузурги миллат».
- Нақшаи конфронси хонандагон бо муҳассилини МТМУ таҳти унвони «Истиқлолияти Тоҷикистон – ормони таърихии тоҷикон».
- Нақшаи конфронси назариявӣ бо иштироки донишҷўёни муассисаҳои таҳсилоти олии касбӣ таҳти унвони «Истиқлолият – ганҷинаи нодири миллат».
- Матни шаби саволу ҷавоб «Истиқлолият ифтихори миллат аст».
- Тарҳи картотекаи библиографӣ «Истиқлолияти Тоҷикистон дар тўли 32 сол».
Дар охир адабиёт оид ба мавзуи чорабиниҳои оммавӣ пешниҳодшуда манзури китобдорон гардонида шудааст.
Кормандони китобхонаи мамлакат барои дастрасии дастур метавонанд ба Китобхонаи миллӣ ба таври расмӣ муроҷиат намоянд.
Шуъбаи илмӣ-методӣ ва таҳқиқотӣ