Даври ниҳоии Озмуни ҷумҳуриявии «Фурӯғи субҳи доноӣ китоб аст» субҳи имрӯз оғоз шуд
Дар Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон даври ниҳоии Озмуни ҷумҳуриявии «Фурӯғи субҳи доноӣ китоб аст» оғоз гардид. Пеш аз оғоз бо иштироки намояндагони Дастгоҳи иҷроияи Президенти Ҷумҳурии Тоҷикистон, Вазорати маориф ва илми кишвар, Китобхонаи миллии Ҷумҳурии Тоҷикистон, Кумитаи телевизион ва радиои назди ҳукумати Ҷумҳурии Тоҷикистон, Кумитаи кор бо ҷавонон ва варзиш, шоирону нависандагон, ходимони илмӣ, намояндагони ВАО ва иштирокчиёни озмун ҷаласа баргузор шуд.
Муовини Сарвазири Ҷумҳурии Тоҷикистон Дилрабо Мансурӣ бо самимияти хос устодону шогирдонро бо санаи мубораки Рӯзи Президенти Ҷумҳурии Тоҷикистон, солгарди Иҷлосияи XVI Шӯрои Олии Ҷумҳурии Тоҷикистон ва иштирок дар марҳалаи беҳтарини озмуни “Фурӯғи субҳи доноӣ китоб аст” аз номи Ҳукумати Ҷумҳурии Тоҷикистон табрику таҳният намуда, дар иҷрои мақсаду мароми нек – бунёди Тоҷикистони ободу озод барору комёбиҳои нав ба нав таманно намуд.
Ҳамчунин қайд гашт, ки мардуми соҳибназар ва шарафманди мамлакат дар симои Сарвари давлат, Роҳбари бунёдкору созанда ва падари ғамхор ва пуштибонро мебинад. Ҷумҳурии Тоҷикистон дар арсаи байналмилалӣ сол то сол мақоми баландро касб менамояд. Имрӯз ҷомеаи ҷаҳонӣ Тоҷикистонро ҳамчун давлати соҳибтамаддуну пешрафта мешиносад ва эътироф менамояд.
Зимнан, Озмуни Ҷумҳуриявии “Фурӯғи субҳи доноӣ китоб аст” аз соли 2019 оғоз гардидаст. Ин Озмун таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон ҳамасола дар сатҳи баланд ташкил ва баргузор мегардад. Баргузории Озмун ба ҳукми анъанаи неку устувор табдил ёфта, боиси он гардидааст, ки сол то сол сафи иштирокчиёни Озмун афзояд.
Щамчуноне гуфтедм, Озмуни ҷумҳуриявии «Фурӯғи субҳи доноӣ китоб аст» соли ҳафтум аст бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва тақвияти ҷаҳони маънавӣ дар байни аҳолии мамлакат баргузор мегардад.
Дар даври чоруми озмун 74 довталаб аз Вилояти Мухтори Кӯҳистони Бадахшон, 90 нафар аз вилояти Суғд, 90 нафар аз вилояти Хатлон, 90 нафар аз ноҳияҳои тобеи ҷумҳурӣ ва 90 довталаб аз шаҳри Душанбе сабқат менамоянд.
Ҳамчунин бояд гуфт ки даври чоруми Озмуни ҷумҳуриявии «Фурӯғи субҳи доноӣ китоб аст» то 28 ноябри соли равон идома меёбад ва ғолибон бо диплом, ҷом ва мукофотпулӣ қадрдонӣ карда мешаванд.
Ногуфта намонад, ки тибқи Амри Президенти Ҷумҳурии Тоҷикистон аз 2 январи соли 2025, ба Низомномаи Озмуни ҷумҳуриявии «Фурӯғи субҳи доноӣ китоб аст» тағйиру иловаҳо ворид гардида, соли 2025 номинатсияи эҷоди назм ва наср тибқи хулоса ва пешниҳоди коршиносон аз низомнома берун карда шуд.
Ҳамзамон барои боз ҳам такмил ва таҳким бахшидани раванди баргузории озмун ва ҳавасмандсозии бештари иштирокчиён бо дастури Президенти Тоҷикистон ба Низомномаи озмун дар соли 2025 навгониҳо ворид карда шуданд.
Махфират Муҳиддинова,
бахши матбуот ва робита бо ҷомеа
Теги: робита бо ҷомеа