Ду намоиши китоб дар шуъбаи тарғиб ва барномаҳои фарҳангӣ

Шуъбаи тарғиб ва барномаҳои фарҳангии Китобхонаи миллӣ бахшида ба Рӯзи ҷаҳонии ҳифзи кӯдак ва 100-солагии Шоири халқии Тоҷикистон, адиби дӯстдоштаи бачаҳо Аминҷон Шукӯҳӣ ду намоиши китоб ташкил намуд.

Аминҷон Шукӯҳӣ аз ҷумлаи адибони маъруфи асри бистуми тоҷик аст, ки миёни ҳаводорони назму наср маъруфияти хоса дорад. Вай фаъолияти кории худро аз омӯзгориву рӯзноманигорӣ сар карда, муддате сармуҳаррири рӯзномаи овозадори “Тоҷикистони Советӣ”(ҳоло “Ҷумҳурият”) ва Раиси Кумитаи радио ва телевизиони Тоҷикистон ҳам будааст.

Унвони фахрии Шоири халқии Тоҷикистон ба ӯ соли 1994, баъди маргаш дода шудааст.

Аминҷон Шукӯҳӣ гарчанде дар вазифаҳои мухталифи давлатӣ кору фаъолият намуд, вале номашро дар адабиёт абадзинда кард. Ӯро имрӯз чун муаллифи пурхонандатарин повесту ҳикояҳо ва қиссаҳо ва шеърҳои лирикӣ мешиносанд.

Дар намоиши китоби шуъбаи тарғиб ва барномаҳои фарҳангӣ китобҳои ӯ “Боғи Шакарханд”, «Об аз куҷо меояд», «Фея Острова», «Упрямый ягнёнок», «Аз нӯги хамир», «Баргҳои тиллоӣ», «Шаҳло ва Шифо» ва дигар асарҳои бачагонаи муаллиф гузошта шудааст.

Сурайё ОДИНАЕВА,
сармутахассиси шуъбаи
тарғиб ва барномаҳои фарҳангӣ.