Идомаи тантанаҳои “Рӯзи дарҳои боз” дар Китобхонаи миллӣ
Тантанаҳои идонаи Рӯзи Истиқлол ва Рӯзи китоб дар Китобхонаи миллӣ идома дорад. Дар рӯзи дуюми Рӯзи дарҳои боз ба Китобхонаи миллӣ 150 нафар донишҷӯёни Донишгоҳи давлатии омӯзгори Тоҷикистон ба номи Садриддин Айнӣ ташриф оварданд.
Аз литсейи ҳарбии Вазорати мудофиаи Ҷумҳурии Тоҷикистон 50 нафар, литсейи касбии техникии махсуси шаҳри Душанбе 17 нафар имрӯз ба Китобхонаи миллӣ қадам ранҷа намуданд.
Дар баробари сокинону меҳмонони кишвар, сайёҳону меҳмонони эронӣ, олмонӣ, чинӣ ва афғонистонӣ бо ҳузурашон ин тантанаҳоро шукуҳ бахшиданд.
Дар доираи ин ид дар баробари сокинони пойтахт ва меҳмонони дохилу хориҷ ба ин ҷашни фархунда собиқадорони соҳаи китобдорӣ, ки дар ин боргоҳи дониш фаъолият намудаанд, ба макони дӯстдоштаашон баҳри дидани ҳамкорони собиқашон ва аз ҳоли ҳам огоҳ шудан омаданд.
Вақте онҳо аз ҷониби роҳбарияти Китобхонаи миллӣ даъват ва бо ҳадяҳои идона ҳавасманд гардиданд, ашки шодӣ рехтанд. Зимни зиёрати ҷашнӣ дар Рӯзи китоб дар ошхонаи Китобхонаи миллӣ гирди ҳам ҷамъ омаданду хушҳолӣ намуданд. Маълум буд, ки ташнаи дидори ҳамдигаранд, якдигарро пазмон шудаанд. Ин баҳонае буд барои дидорбнии онҳо, ки интизор надоштанд ва инро зикр низ намуданд дар суҳбатҳояшон. Онҳо ба шуъбаҳое, ки қаблан кор мекарданд, сар заданд, аз ҳоли шуъба ва кормандону вазъи кор дар китобхона пурсон шуданд ва машваратҳои зарурӣ низ барои ҳамкорон доданд.
Раҳима Аъзам, бахши матбуот в аробита бо ҷомеа.