Имзои Ёддошти тафоҳум байни Китобхонаи миллии Тоҷикистон ва Созмони аснод ва Китобхонаи миллии Ҷумҳурии Исломии Эрон
Бобо8 ноябри соли 2023 баъди анҷоми мулоқоту музокироти сатҳи олии Тоҷикистон ва Эрон бо иштироки Сарони давлатҳо муҳтарам Эмомалӣ Раҳмон ва муҳтарам Иброҳим Раисӣ маросими имзои санадҳои нави ҳамкорӣ баргузор шуд.
Нахуст, Президенти Ҷумҳурии Тоҷикистон муҳтарам Эмомалӣ Раҳмон ва Раиси Ҷумҳурии Исломии Эрон муҳтарам Иброҳим Раисӣ Баёнияи муштараки Президенти Ҷумҳурии Тоҷикистон ва Раиси Ҷумҳурии Исломии Эронро имзо намуданд.
Сипас, бо иштироки сарони кишварҳо 19 санади нави ҳамкорӣ ба имзо расид. Аз ҷумла, Директори Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон, доктори илмҳои педагогӣ, профессор Ҷумахон Файзализода ва Вазири фарҳанг ва иршоди исломии Эрон Муҳаммадмаҳдии Исмоилӣ “Ёддошти тафоҳуми ҳамкорӣ байни Китобхонаи миллии Тоҷикистон ва Созмони аснод ва Китобхонаи миллии Ҷумҳурии Исломии Эрон”-ро имзо карданд.
Ин Ёддошти тафоҳум аз 6 модда иборат буда, ҳамкорӣ дар соҳаи иттилоот ва табодули таҷрибаҳо, мубодилаи мутахассис ва коршинос, мубодилаи маводи китобхона, ташкил намудани курсҳои такмили ихтисос, таҷрибаомӯзӣ, намоишҳо, семинарҳо ва конфронсҳо, ҳамкориҳои пажӯҳиширо дар бар мегирад.
Гуфтанист, ки Созмони аснод ва Китобхонаи миллии Ҷумҳурии Исломии Эрон муассисаи омӯзишӣ, пажӯҳишӣ, илмӣ ва хадамотӣ аст, ки асосномаи он ба тасвиби Маҷлиси Шӯрои исломӣ расидааст ва раёсати кулли онро Райиси Ҷумҳурии Эрон таъин мекунад.
Ин китобхона соли 1316 ҳиҷрии шамсӣ, мутобиқ ба соли 1937 милодӣ ба кор оғоз кардааст.
Дар айни замон ин китобхона дорои 2 миллиону 841 ҳазору 665 ҷилд китоб мебошад. 910 ҳазору 835 манобеъи ғайрикитобӣ шомили 301 ҳазору 782 поённома ва боқӣ аксу лавҳаҳо иборат аст.
Чаҳор миллион шумора нашрия дар 140 ҳазору 619 ҷилд, ки аз ин теъдод 24 ҳазору 997 ҷилд анвоъи нашрияҳои ҳуруфи лотин ва арабӣ аст. Китобхона ҳамчунин дорои 298 ҳазору 150 ҷилд китоби кӯдак ва навҷавон, 23 ҳазору 323 нусха китоби гӯё барои нобиноён мебошад.
Маврид ба таъкид аст, ки то кунун Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон ҷиҳати тавсеаи бештари робитаҳо бо китобхонаҳои дунё ва ҷалби таҷрибаи онҳо дар беҳтар намудани фаъолияти китобдорӣ аз соли 2013 то имрӯз (2023) 21 Ёддошти тафоҳуми ҳамкорӣ бо 14 давлати хориҷӣ ба имзо расондааст.
Дар доираи ин ҳамкориҳо Гўшаи фарҳангии Ҷумҳурии Халқии Чин ва Корея таъсис ёфт. Имрўз шумораи хоҳишмандони забони куриёӣ ва англисӣ ба маротиб афзудааст. Дар доираи Барномаи ҳамкории техникӣ ва иқтисодии Ҳиндустон АЙТЕК (ITEX) соли 2022 ва 2023 беш аз даҳ нафар кормандони Китобхонаи миллӣ ба Ҷумҳурии Ҳиндустон барои такмили забони англисӣ сафари омўзишӣ доштанд.
Китобхона тасмим гирифтааст, ки дар соли 2023 бо як қатор китобхонаҳои кишварҳои хориҷӣ, аз ҷумла бо Китобхонаҳои миллии Малайзия, Ҳиндустон, Туркия, Фаронса, Ҷумҳурии Исломии Эрон, Китобхонаи Искандарияи Ҷумҳурии Мисри Араб, Китобхонаи оммавӣ, илмӣ-техникии Академияи илмҳои Русия дар минтақаи Сибир ва Китобхонаи миллии парлумонии Ҷопон ҳамкориро дар самти китобу китобдорӣ ба роҳ монад.
Б.Шафеъ