Имзои Тафоҳумномаи ҳамкорӣ миёни Китобхонаи миллии Озарбойҷон ва Китобхонаи миллии Тоҷикистон

22-уми майи соли 2025 дар Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон ифтитоҳи гӯшаи адабиёти Озарбойҷон дар Китобхонаи миллӣ ва имзои Тафоҳумномаи ҳамкорӣ миёни Китобхонаи миллии Озарбойҷон ва Китобхонаи миллии Тоҷикистон сурат гирифт.

Ҳамоишро директори Китобхонаи миллӣ, доктори илмҳои педагогӣ, профессор Ҷумахон Файзализода оғоз намуда, меҳмононро хушомадед гуфт ва иброз дошт, ки дар давоми 100 сол Ҷумҳурии Тоҷикистон бо кишвари дӯсти Озарбойҷон ҳамкорӣ дорад.

Дар маҳфил мушовири Вазири фарҳанги Ҷумҳурии Озарбойҷон Олег Амирбеков, директори Китобхонаи миллии Озарбойҷон, профессор Керим Тахиров, директори генералии Институти дастнависҳои ба номи М. Фузулии Академияи миллии илмҳои Озарбойҷон, академик Теймур Керимлӣ, мушовири Сафорати Ҷумҳурии Озарбойҷон дар Ҷумҳурии Тоҷикистон Вугар Ибрагимов ва муовини раиси Иттифоқи нависандагони Тоҷикистон Равшани Махсумзод ширкату суханронӣ намуданд.

Директори Китобхонаи миллӣ ҳангоми суханронӣ иброз намуд, ки Ҷумҳурии Озарбойҷон яке аз аввалин кишварҳоест, ки соли 1992 бо Ҷумҳурии Тоҷикистон муносибатҳои дипломатиро барқарор намуд.

Муносибати дуҷониба ва бисёртарафаи Тоҷикистон ва Озарбойҷон дар руҳияи шарикиву ҳамдигарфаҳмӣ ба таври анъанавӣ рушд мекунад. Тоҷикистон ва Озарбойҷон дар созмонҳои сатҳи ҷаҳонӣ, мисли Созмони Милали Мутаҳид,  Созмони амнияту ҳамкорӣ дар Аврупо, Иттиҳоди Давлатҳои Муштаракулманофеъ ва Созмони ҳамкориҳои иқтисодӣ шариканд.

Ҳамчунин сарвари Китобхонаи миллӣ зимни суханонияш дар маросими имзои Тафоҳумномаи ҳамкорӣ иброз намуд, ки имрӯз дар шаҳри Душанбе Рӯзҳои фарҳанги Озарбойҷон баргузор мегардад. Мисоли рӯшани гуфтҳои боло наздикии мусиқии “Шашмақом” ва “Мугам”, ҳамчунин ҳамоҳангӣ миёни “Фалак”-и тоҷикӣ ва “Ашыга”-и озарбойҷонӣ мебошад.

Профессор Файзализода дар идомаи суханонаш аз рушди муносибату ҳамкориҳои судманди ҳарду кишвар дар соҳаи маориф ва фарҳанг мисолҳои мушаххас овард.

Дар доираи имзои Тафоҳумнома ҷониби Озарбойҷон барои гӯшаи адабиёти Озарбойҷон дар Китобхонаи миллӣ китобҳо ба забони озарбойҷонӣ туҳфа намуд ва дар хотимаи нишаст намоиши китоб баргузор гардид.

Маҳфилро васоити ахбори оммаи Ҷумҳурии Озарбойҷон, бахусус телевизионҳои он сабт намуданд.

Раҳима Аъзам, бахши матбуот ва робита бо ҷомеа.