Китобхона дар аксҳои таърихӣ. Бахши 11. Шуъбаи адабиёт доир ба фарҳанг ва ҳунар
Тибқи иттилои аксҳои таърихӣ шуъбаи адабиёт доир ба фарҳанг ва ҳунар моҳи январи соли 1977 таъсис ёфтааст ва нахуст он шӯъбаи нотавӣ- мусиқӣ номгузорӣ шуда буд. Вазифаи асосии ин шуъба аз тарғиби адабиёт доир ба фарҳанг ва ҳунар ба дўстдорону ҳаводорони суруд ва мусиқии классикӣ, муосир ва хориҷӣ иборат буд.
Истифодабарандагони мунтазами фонди мусиқӣ коргарон, хидматчиён, ҳунармандон ва донишҷўён ба шумор мераванд.
Нақшаи асосии кормандони шуъба баланд бардоштани шавқу рағбати насли наврас ба санъату ҳунари волои санъаткорону ҳунарпешагони миллату давлати мо ва инчунин шиносоӣ бо ҳунармнадони бурунмарзии кишвар ба шумор меравад. Дар ин шуъба мутахассисони гуногун фаъолият доштанд.
Аксҳои таърихи шаҳодат медиҳанд, ки дар рўзҳои адабиёт ва санъати Федератсияи Русия дар Ҷумҳурии Тоҷикистон ба китобхона ҳунармандони шинохтаи синамои Русия ташриф оварданд. Онҳо бо кормандони китобхона вохўрда, дар бобати санъату ҳунар суханронӣ мекунанд, ки аз ин вохўриву ҷамъомадҳо онҳо бобати адабиёт ва санъати синамо ҷаҳони маънӣ мегиранд.
Инчунин дар аксҳо дида мешавад, ки соли 1975 ҳайати вакилони Ироқ дар намоишгоҳ бахшида ба рўзҳои санъату маданияти Ироқ, ки дар китобхонаи ба номи А. Фирдавсӣ баргузор шудааст, ташриф оварданд.
Коркунони шуъба адабиёти мусиқӣ ва пластинкаҳои патефониро коркард мекарданд. Ба ороиши намоишномаҳо, тамошо ва шунидани адабиёту дискҳои нав гирифташуда диққати калон медоданд. Кори мунтазам ва муҳими шуъба такмил додани феҳристи китобҳо ва дискҳо ба шумор мерафт. Барои ҷалби хонандагон корҳои зиёди назаррас ба ҷо оварда мешуд.
Моҳи январи соли 1977 маводи он ба 47 ҳазору 505 нусха мерасид, ҳоло дар фонди шуъба дорои 77 ҳазору 904 нусха мавод нигоҳдорӣ мешавад, ки аз ин шумора 62 ҳазору 721 адад нотаҳо, 3504 адад пиесаҳо, 7698 адад китобҳо, (2254 адад ба забони тоҷикӣ ва 5444 адад ба забони русӣ), 3333 адад грампластинкаҳо, 541 адад фиттаҳо (дискҳо), 61 адад варақаҳои тарғиботӣ, 47 адад китобҳои изографӣ (изографика) мебошанд.
Фонди электронии аудиои рақамӣ – видеосабти мероси мусиқавии Тоҷикистон соли 2012 таъсис гардидааст. Ҳадаф аз таъсиси фонд пеш аз ҳама ин ҳифз ва нигоҳдории беҳтарин осори фарҳанги миллӣ мебошад.
Шӯъбаи нотавӣ- мусиқӣ аз 1 августи соли 2009 ба шуъбаи фарҳанг ва ҳунар табдил дода шуда, баъдан, аз 2 апрели соли 2012, ба шуъбаи адабиёт доир ба фарҳанг ва ҳунар табдили ном кард.
Аз аксҳои таърихӣ маълум мешавад, ки аз рўзи ташкилёбии шуъба сарварии онро Л.Шакарова ба уҳда доштанд, инчунин дар он китобдори калон Долгова Г.Г. Ванштейн Н.Г. ва Исмоилова С. низ фаъолият мекарданд.
Шуъбаи илмӣ-методӣ ва таҳқиқотӣ