Китоби нав. “Забонҳои барномасозӣ дар муассисаҳои таълимӣ”
Муаллифони ин китоб, ки соли ҷорӣ дар шаҳри Хуҷанд чоп шудааст, С.Раҷабова, Ғ.Темуров, М.Темирова ва М.Назаров мебошанд ва асари худро ба эълон шудани солҳои 2020 – 2040 “Бистсолаи омӯзиши фанҳои табиатшиносӣ, дақиқ ва риёзӣ дар соҳаи илму маориф дар Ҷумҳурии Тоҷикистон” бахшидаанд.
Муаллифон гуфтаанд, ки дастури таълимии мазкур ба барномаҳои фанҳои “Технологияи иттилоотии синфи 10”, “Методикаи таълими технологияи иттилоотӣ” ва “Барномасозӣ” мутобиқ буда, бароои гузаронидани машғулиятҳои амалӣ ва лабораторӣ пешбинӣ шудааст.
Дар муқаддима омадааст, ки Асосгузори сулҳу ваҳдати миллӣ, Пешвои миллат, Президенти мамлакат, мухтарам Эмомалӣ Раҳмон дар паёми 26.12.2019 пешниҳод намуданд, ки «Роҳбарону кормандони соҳаи маорифро зарур аст, ки дар баробари чунин дастгириҳои давлат ва афроди ватандӯст сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо ва дар ҳамаи зинаҳои таҳсилот баланд бардоранд. Инчунин, назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд….”
Дар дастур намунаи барномаҳо ва маҷмӯи мисолу масъалаҳо оварда шудааст, ки хонандагон, донишҷуён ва омӯзгорони мактабҳо ба онҳо эҳтиёҷи зиёд доранд.
Дастури “Забонҳои барномасозӣ дар муассисаҳои таълимӣ”-ро шумо метавонед дар Китобхонаи миллӣ бихонед.
Гулистон ЛУНДИШОЕВА