Истиқболи гарми ширкаткунандагони рӯнамоӣ аз китоби Қодири Қосим “Пешвои сангаршикани миллатсоз”
15-уми ноябр ба Пешвози Рӯзи Президенти Ҷумҳурии Тоҷикистон дар Китобхонаи миллӣ рӯнамоии китоби “Пешвои сангаршикани миллатсоз” –и Қодири Қосим бо ташаббуси Иттифоқи журналистони Тоҷикистон баргузор гардид. Дар ин ҳамоиш намояндагон аз Дастгоҳи иҷроияи Президенти Ҷумҳурии Тоҷикистон, Маҷлиси Олии Ҷумҳурии Тоҷикистон инчунин роҳбарияти Китобхонаи миллӣ иштирок ва суханронӣ намуданд.
Дар ифтитоҳи ҳамоиш Мавсума Муинӣ-муовини Раиси Маҷлиси намояндагони Маҷлиси Олии Ҷумҳурии Тоҷикистон баромад намуда, ҳозиринро бахшида ба рӯзи Президенти Ҷумҳурии Тоҷикистон шодбош намуд. Вай гуфт, ки таърихи ҳазорсолаи давлатдории дунё далолат мекунад, ки бунёд, таъсису ташаккули империяҳо, давлатҳо танҳо ба ақлу заковат, хирад, маҳорат ва ҷонбозиҳои ашхоси алоҳида марбут аст. Пешвои миллат муҳтарам Эмомалӣ Раҳмон аз шахсиятҳои таърихсозе маҳсуб меёбанд, ки барои саодати миллат ва халқи худ ҷонисориҳое беназире анҷом додаанд.
Дар идома Масрур Абдуллозода – намояндаи Дастгоҳи иҷрояияи Президенти Ҷумҳурии Тоҷикистон суханронӣ намуда, аз нақш ва мақоми китоби “Пешвои сангаршикани миллатсоз” –и Қодири Қосим, ки мундариҷаи матлабҳои публитсистии ӯ посухи арзанда ба навиштаҳои заифонаи душманону хоинони Тоҷикистони соҳибистиқлол аст, сухан гуфт.
Дар суханронии худ Муҳаммадраҳим Юсуфӣ – вакили Маҷлиси намояндагони Маҷлиси Олии Ҷумҳурии Тоҷикистон аз хотираҳои таърихии китоби болозикр ёдовар шуда, ин асарро, ки аз он ҳамчун асари ёддоштӣ ном бурд, санади муҳим ва тақдирсоз унвон кард. Дар ҳақиқат, вазъи сиёсиву иқтисодӣ ва иҷтимоии солҳои навадуми асри ХХ мушкил ва хатарнок буд, вале Роҳбари давлат барои наҷоти миллат, алорағми фишорҳо, сӯиқасдҳо ва монеаҳои зиёд, бо иродаи устувор, ҷасорати беназир ва фазилати ақлонӣ сулҳу оромию рушди бомаромро таъмин намуданд.
Дар робита ба давлатдории навин ва тасвири он дар публитсистикаи Қодири Қосим вакили Маҷлиси намояндагони Маҷлиси Олии Ҷумҳурии Тоҷикистон Фазлиддин Икромӣ маъруза намуд. Вай таъкид кард, ки бунёду рушди давлатдории навин ҳамчун ҷомеаи дунявӣ, демократӣ, ҳуқуқбунёд ва ягона дар Тоҷикистон маҳз ба ташабусҳои бевоситаи Пешвои миллат тавъаманд. Дар мавриди рушди босуботи иқтисоди ҷумҳурӣ ва амну суботи комили сартосарии кишвар муаллиф дар китоби худ далелҳои раднопазирро оварда, назари ноадолатонаи бархе аз ҳамватанонро танқид кардааст. “Маро ченаку меъёри ватандӯстии бархе аз тоҷикони бурунмарзӣ баъзан асабӣ мекунад ва ман андешаҳоямро дар тамоми шабакаҳо пахш мекунам. Наметавонам нисбат ба андешаҳои хилофи давлату миллатам бепарво бошам”,-гуфт ӯ.
Муҷибахон Ҷавҳарӣ – вакили Маҷлиси намояндагони Маҷлиси Олии Ҷумҳурии Тоҷикистон дар робита ба мавзуи “Тасвири бомароми Тоҷикистони соҳибистиқлол” андешаронӣ карда, китоби “Пешвои сангаршикани миллатсоз”-ро ҳамчун асари ёддоштӣ, ки муаллиф аз ҳадафҳои дурбинонаи Пешвои миллат дар роҳи расидан ба саодати комил, таъмини истиқлоли энергетикӣ, низоми рушди иқтисод ва даҳҳо соҳаҳои муҳими ҳаётӣ рӯи кор омадаанд, номид.
Дар қисмати дигари ҳамоиш директори Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон, доктори илмҳои педагогӣ, профессор Ҷумахон Файзализода дар мавзуи “Публитсистикаи сиёсӣ ва чеҳранигорӣ” маърузаи пурмуҳтавое намуданд. Вай таъкид кард, ки дар тӯли таърих, симо чеҳра ва шахсиятҳои фавқулода ва қудратманд, ки ба ин ё он миллат мутаалиқанд, оғози марҳилаи рушд ва таърихсозии маҳсуб меёбанд. Зуҳури чунин шахсиятҳои нобиға дар ин ё он миллат нишони он аст, ки ояндаи дурахшон ва тарақиёти беҳтар дар интизори онҳост.Ба таври қиёс метавон аз Фаридуну Куруш Анушервону Бузургмеҳр, Низомулмулку Исмоил Сомонӣ ном бурд, ки рисолати худро дар назди миллату давлати худ иҷро намуда, таърихи навинеро сохтаанд. Корнамоиҳои мондагори онҳо сафҳаҳои таърихи миллатро оро медиҳад. Пешвои миллат муҳтарам Эмомалӣ Раҳмон марде дар арсаи сиёсат рӯи кор омадаанд, ки мисли даҳҳо родмардоне, ки аз онҳо ёд овардем, рисолати худро баҳри ватану миллат анҷом додаанд ва онҳоро таърих ҳамеша ба ёд хоҳад дошт.
Дар ҷамъбасти ҳамоиш Қодири Қосим – муаллифи китоби “Пешвои сангаршикани миллатсоз” сухан гуфта, изҳор дошт, ки воқеан Пешвои миллати мо барои ин Ватану миллат корҳое анҷом дода, ки ҳаргиз фаромӯш намешаванд, вале ин асар танҳо як ёддошт аст ва хеле сипосгузорам, ки чунин хуб пазируфта шуд ва пешкаши хонандагон гардид.
Ҳамоиш бо муҳокиморониҳои ҳайати иштирокдорон хотима ёфт.
Маврид ба ёдоварист, ки рӯнамоии китоби мазкур бо ташаббуси Иттифоқи журналистони Тоҷикистон дар Китобхонаи миллӣ доир гардида, ба пешвози рӯзи Президенти Ҷумҳурии Тоҷикистон рӯнамои гардид.
Наргис НАЗАРЗОДА