Компютерҳои нави толори кормандони илм. Дастарсии хонандагон ба диссертатсияҳои илмии 77-солинаи Китобхонаи давлатии Русия
15-уми ноябри соли 2021 бо дастгирии бевоситаи директори Муассисаи давлатии «Китобхонаи миллии Тоҷикистон»-и Дастгоҳи иҷроияи Президенти Ҷумҳурии Тоҷикистон, доктори илмҳои педагогӣ, профессор Файзализода Ҷумъахон Хол «Толори кормандони илм»-и назди шуъбаи нигоҳдории рисолаҳои илмӣ бо компютерҳои нави замонавӣ таҷҳизонида шуданд.
Қобили зикр аст, ки роҳбарияти Китобхона дар қатори дигар шуъбаву марказҳо ва бахшҳои муассисаи мазкур ба шуъбаи нигоҳдории рисолаҳои илмӣ низ таваҷҷуҳи хосса зоҳир карда, пайваста аз вазъияти «Толори кормандони илм» ва «Толори академикон ва докторони илм» огаҳ гардида, ҷиҳати бартараф намудани камбудиҳои он ва беҳтар намудани сифати хизматрасонӣ чораҳои зарурӣ меандешад.
Имрўз аз ин Толор кормандони илм, унвонҷўён ва муҳаққиқони ҷавон бо истифода аз шабакаи байналмилалии Интернет ба 1100000 номгўй матни электронии рисолаҳои номзадӣ ва доктории фонди электронии диссертатсияҳои Китобхонаи давлатии Русия дастрасӣ доранд. Ин рисолаҳои илмиву пажӯҳишӣ давраи аз соли 1944 то ба имрӯзро дар бар мегиранд, ки бешак як хазинаи гаронбаҳои илмиву маърифатӣ ва пажӯҳишӣ дар паҳнои собиқ Иттиҳоди Шӯравӣ ба шумор мераванд.
Инчунин айни ҳол дар фонди шуъба зиёда 2000 нусха рисолаҳои номзадӣ ва докторӣ аз Ҷумҳурии Тоҷикистон (дар нусхаи асл) мавриди истифода қарор дода шудааст. Гуфтанист, ки қариб ҳар моҳ бо вуруди рисолаҳои нави илмӣ бойгонии ин шуъба ва толори хониш ғанӣ мегардад.
Ҳамзамон дар фонди авторефератҳои шуъбаи нигоҳдории рисолаҳои илмӣ зиёда аз 705000 нусха автореферат маҳфуз дошта шудааст, ки ҳамарўза кормандони шуъба дар асоси дархост пешкаши муштариён менамоянд.
Роҳбарияти муассиса дар фаъолияти минбаъда тасмим гирифтааст, ки барои боз ҳам фароҳам овардани шароити хуби корӣ ва беҳтар намудани сатҳи хизматрасониро ба роҳ монад.
Бибираъно Ҷӯраева, Сардори шуъбаи
нигоҳдории рисолаҳои илмӣ.
Теги: шуъбаи нигоҳдории рисолаҳои илмӣ.