Кӯлбори пурбори сафари Корея. Имзои Ёддошти тафоҳуми ҳамкорӣ байни Китобхонаҳои миллии ду кишвар
Сафари кории Директори Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон, доктори илмҳои педагогӣ, профессор Ҷумахон Файзализода ба Кореяи Ҷанубӣ ба поён расид. Сарвари Китобхонаи миллӣ бо даъвати Сафарати Ҷумҳурии Корея дар Тоҷикистон ва Бунёди Корея ба шаҳри Суел сафар карда буд. Ҳадафи ин сафар рушди табодули фарҳангӣ миёни Ҷумҳурии Корея ва Ҷумҳурии Тоҷикистон буд.
Дар ҷараёни ин сафари корӣ профессор Файзализода бо дастовардҳои Китобхонаи миллии Кореяи Ҷанубӣ аз наздик ошно шуд. Вай имкон дошт аз кулли толорҳои хидматрасонӣ, осорхонаҳои китоб, шеваҳои хидматрасонӣ ба хонандагон, бойгонии китобхона, толорҳои хидматрасонии электронӣ ба хонандагон, хидматрасониҳои онлайнӣ, пажӯҳишҳои илмӣ, чопи китобу дастурамалҳо ва ғайра дидан кунад ва ба суолҳои худ аз масъулини он посух бигирад.
Дар суҳбат ба директори Китобхонаи миллӣ гуфтанд, ки Китобхонаи миллии Кореяи Ҷанубӣ (анг. National Centeral Library of Korea South) таърихи як садсола дорад. Таъсиси он ба соли 1925 бозмегардад. Маҳз ҳамин сол сохтмони он дар Суел ба поён расида буд. Соли 1974 китобхона аз маҳалии пешинааш ба ноҳияи Согондон кӯчонда шуд. Аммо 14 сол баъд ба биное интиқол ёфт, ки ҳоло Китобхонаи миллии Корея номида мешавад.
Соли 2007 сервиси электронии китобҳо фаъол шуд, ки кулли китобхонаи рақамии умумимиллиро дар бар мегирифт
Дар айни замон ин китобхона яке аз махзанҳои бузурги китоб дар минтақа ба шумор рафта, он шомили беш аз 7 миллион ҷилд китоб, рӯзномаву маҷалла ва асноди расмӣ мебошад. Аз ин миқдор наздик ба 1 миллион нусха китобу маҷалаву рӯзномаҳо ба забонҳои хориҷӣ нигаҳдорӣ мешаванд. Баъзе аз ин китобҳо хеле нодир ва пурарзиш буда, ба рӯйхати “Ганҷинаи миллии Кореяи Ҷанубӣ” дохил карда шудаанд.
Дар навбати худ Директори Китобхонаи миллии Тоҷикистон дар бораи таърихи бунёди Китобхона, шароити имрӯзаи он, таваҷҷуҳи Ҳукукмати кишвар ва бахусус Пешвои миллат муҳтарам Эмомалӣ Раҳмон ба китобу китобхонӣ, бойгонии пурғановати китобҳо, қадимитарин нусхаҳои қаламӣ ва дастхатҳову китобҳои чопи сангӣ, осорхонаҳои пурбинандаи китоб, озмунҳои ҷумҳуриявии китобхонӣ маълумот дод.
Дар мулоқот бо роҳбарияти Китобхонаҳои миллии ду кишвар дурнамои ҳамкориҳои барои ҷонибҳо судманд мавриди баррасӣ қарор гирифтанд. Натиҷаи ин диду боздидҳо, суҳбату муколамаҳо имзои Ёддошти тафоҳуми ҳамкорӣ миёни Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон ва Китобхонаи миллии Ҷумҳурии Корея буд.
- ИМЗОИ ЁДДОШТИ ТАФОҲУМИ ҲАМКОРӢ БАЙНИ КИТОБХОНАҲОИ МИЛЛИИ ТОҶИКИСТОНУ КОРЕЯИ ҶАНУБӢ
- ДАР СЕУЛ БАЙНИ КИТОБХОНАҲОИ МИЛЛИИ ТОҶИКИСТОН ВА КОРЕЯ ЁДДОШТИ ТАФОҲУМ БА ИМЗО РАСИД
Ёддошти тафоҳуми ҳамкорӣ миёни ду китобхона санади муҳимест, ки роҳро ба ҳамкориҳои фарҳангии барои ҷонибҳо судманд, табодули китобу таҷриба боз мекунад.
Маврид ба ёдоварист, ки робитаҳои фарҳангӣ миёни Кореяи Ҷанубӣ ва Китобхонаи миллии Тоҷикистон таърихи беш аз як даҳсола дорад. Дар Китобхонаи миллӣ Гўшаи фарҳангии Корея бо мақсади тавсеаи ҳамкориҳои дуҷонибаи судманди дўстона байни Ҷумҳурии Корея ва Ҷумҳурии Тоҷикистон барои таблиғи фарҳанги Корея таъсис дода шудааст. Он тибқи Ёддошти тафоҳум миёни Китобхонаи миллии Тоҷикистон ва Фонди Институти Подшоҳии Сеҷони Ҷумҳурии Корея дар шаҳри Душанбе соли 2013 ба муддати 5 (панҷ) сол ба роҳ монда шуда буд.
Баъдан, бори дуюм моҳи июли соли 2019 дар ҳошияи сафари Сарвазири Ҷумҳурии Корея ба Ҷумҳурии Тоҷикистон «Ёддошти тафоҳум байни Китобхонаи миллии Тоҷикистон ва Сафорати Ҷумҳурии Корея дар Ҷумҳурии Тоҷикистон барои таъсис додани Гўшаи Корея» ба имзо расид, ки айни ҳол амал мекунад.
Аз Гӯшаи фарҳангии Корея на танҳо хонандагони тоҷик, балки меҳмонони зиёде аз хориҷ дидан мекунанд ва бо фарҳанги мардуми Корея аз наздик шиносоӣ пайдо менамоянд. Гўшаи зикршуда ҳамвора аз фаъолияти худ ба роҳбарияти Китобхонаи миллӣ ҳисобот пешниҳод мекунад ва дар мавриди гузаронидани нишастҳоиҳои фарҳангиву китобдорӣ доимо бо шуъбаи робитаҳои байналмилалӣ дар иртибот аст.
Бобоҷон Шафеъ