Маҳфили адабӣ бахшида ба Рӯзи Президенти Ҷумҳурии Тоҷикистон
Маҳфили адабӣ бахшида ба Рӯзи Президенти Ҷумҳурии Тоҷикистон миёни довталабони озмуни ҷумҳуриявии “Фурӯғи субҳи доноӣ китоб аст” ва хонандагони фаъоли шуъбаи адабиёти кӯдакон ва наврасони Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон доир гардид.
Ровиёни барнома бо бачаҳо саволу ҷавоб намуда ва ҳар яки онҳо дар васфи Пешвои миллат, Тоҷикистон, Ватан, Модар, қироъат намуданд.
Аз бачаҳо суол карда шуд, ки оё дар байни шумо нафаре ҳаст, ки боре ҳам дар нишаст ва ё вохӯриҳо Пешвои миллат иштирок карда, бо Асосгузори сулҳу ваҳдати миллӣ, Пешвои миллат мӯҳтарам Эмомалӣ Раҳмон ҳамсӯҳбат шуда бошад?
Дар байни онҳо бачаҳое буданд, ки бо Пешвои миллат ҳамсӯҳбат шуда дар наздашон шеър қироъат намудаанд ва аз эҳсосоташон бисёр хурсандона васф мекарданд.
Ҳамасола, рӯзи 16-уми ноябр мувофиқи Қонуни Ҷумҳурии Тоҷикистон «Дар бораи рӯзҳои ид» ҳамчун Рӯзи Президенти Ҷумҳурии Тоҷикистон ҷашн гирифта мешавад.
Сабаби ба ин рӯз рост омадани чунин ҷашни муборак дар он аст, ки маҳз дар ҳамин рӯзи таърихӣ, яъне 16-уми ноябри соли 1994 Пешвои маҳбуби миллат, муҳтарам Эмомалӣ Рахмон бори нахуст ҳамчун Президенти Ҷумҳурии Тоҷикистон дар назди халқу Ватан Савганд ёд карданд. Дар аввалин Конститутсияи Тоҷикистони соҳибистиқлол, ки аз тарафи мардум қабул карда шуд, шакли идории Тоҷикистон ба шакли Ҷумҳурии президентӣ табдил дода шуд.
Дар он марҳалаи хассоси таърихӣ, ки ватанамон пеш аз ҳама ба сулҳу субот ва ваҳдату сарҷамъӣ ниёз дошт, низоми идоракунии президентӣ маҳз бо мақсади пурзӯр намудани ҳокимияти иҷроия, баланд бардоштани самаранокии он, қабули фаврии қарорҳои идорӣ, такмили механизми иҷрои қонунҳо, таҳкими қонуният ва тартиботи ҳуқуқӣ ҷорӣ карда шуд. Он як интихоби огоҳона буда, маҳсули сабақҳои таърихӣ ва натиҷагириҳо аз самараи фаъолияти давлатдории гузашта ва имрӯзаи мо ба ҳисоб меравад. Хушбахтона, гузаштан ба низоми президентӣ на танҳо боиси наҷоти давлату миллат, балки омили рушди устувори тамоми соҳаҳои идораи давлатӣ, аз ҷумла иқтисодиёт, сиёсат, фарҳанг, маориф ва дигар соҳаҳо гардид.
ГАНҶИНА Ҷолаева,
бахши матбуот ва
робита бо ҷомеа