Маҳфили “Дар суҳбати адиб” бо шоир ва нависандаи маҳбуби бачаҳо
Дар шуъбаи кӯдакон ва наврасони Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон бо иштироки шоир ва нависандаи кӯдакон Муродалӣ Собир, хонандагони фаъоли шуъба ва ҳамчунин хонандагон аз ноҳияҳои тобеи марказ маҳфили «Дар суҳбати адиб» баргузор шуд. Маҳфил дар ҳамкорӣ бо Иттифоқи нависандагони Тоҷикистон ва телевизиони кӯдакону наврасон “Баҳористон” баргузор мегардад.
Маҳфилро ровии барнома Нозанини Шӯҳрат – яке аз ғолибони озмуни ҷумҳуриявии “Фурӯғи субҳи доноӣ китоб аст”, ғолиби озмуни ҷумҳуриявии “Ту қалби Тоҷикистонӣ, Душанбе” ва ҳамчунин барандаи ҷоизаи озмуни “Тоҷикистон – Русия” ҳусни оғоз бахшида, иштирокдоронро бо тарҷумаи ҳол ва фаъолияти адабии Муродалӣ Собир – адиби маҳбуби кӯдакону наврасон шинос намуд.
Дар қисмати баъдии барнома адиб Муродалӣ Собир ба суолҳои хонандагон аз қабили:
- Аз лаҳзаҳои хотирмони бачагии худ чанд сухан мегуфтед.
- Кӣ ва ё чӣ сабаб шуд, ки шумо ин пешаро интихоб намудед?
- Аввалин ҳикояи шумо?
- Барои кӯдакон эҷод кардан мушкил аст, ё барои калонсолон?
- Эҷодкор метавонад аз эҷод даст кашад?
- Фасли дӯстдоштаи шумо?
- Имрӯз соҳаи маориф дар чопи китобҳо дар кадом сатҳ қарор дорад?
- Дар роҳи эҷод шумо киро устоди хеш мешуморед?
- Аввалин шеъри шумо?
Шоир ба суолҳои хонандагон посухҳои муфассал ва қаноатбахш гуфта, аз лаҳзаҳои хотирмони ҳаёташ қиссаҳо кард. Яке аз хотироти ҳаяҷонбахшу фаромӯшношудании Муродалӣ Собири наврас ин рӯзест, ки мактуби адиби хушбаёни бачагон Мавҷуда Ҳакимоваро дар даст дошт. Мактуб мужда аз он медод, ки шеърҳои навқаламонаи Муродалӣ Собир рӯи чоп хоҳанд омад. Шоири оянда гаштаву баргашта мактубро мехонду ба худ бовар намекард. Бисёр хушбахт буд он лаҳза. Бояд гуфт ки адиб он дам дар синфи 6-уми мактаби миёна таҳсил мекард.
Сипас иштирокчиёни маҳфил аз эҷодиёти адиб шеърҳо қироат карданд. Аз ҷумла:
КИТОБ
Кас мерасад ба мақсад,
Китоб агар бихонад.
Оқилу доно шавад,
Ҳама чизро бидонад.
Агар кушояд китоб,
Дарҳо шавад кушода.
Хонаду кам бихобад,
Илмаш шавад зиёда.
Ҳамсуҳбати хуби хуб
Барои мо китоб аст.
Равшангари дилу ҷон
Монанди офтоб аст
ЗОЧА
Ин духтарак – нури хона:
Ҳам духтарам, ҳам дугона.
Ду кокулаш тофтагӣ аст.
Пираҳанаш бофтагӣ аст.
Бе алла ҳам хобаш барад.
Дастат расад, чашмаш парад.
Аммо чаро доим хап аст?
Бо мо магар ӯ ногап аст?
ДАРЁҲОИ ТОҶИКИСТОН
Яку дуву севу чор,
Дарёҳоро ту бишмор.
Дарё дар Тоҷикистон
Бидон, бошад фаровон.
Яке аз онҳо Панҷ аст,
Дарёи пур зи ганҷ аст.
Дарёи дигар Вахш аст,
Саропояш дурахш аст.
Хонаи мо чароғон
Медорад Нораки он.
Роғун чун шавад бунёд,
Мамлакат шавад обод.
Дарёи дигар Сир аст,
Дарёи беназир аст.
Бин, дарёи Зарафшон
Зар меорад фаровон….
ҚУЛЛАҲО
Зебову хуррам доимо,
Эй қуллаҳои сарбаланд.
Боифтихор истодаед,
Чун посбонони Ватан.
Хуршед меояд бурун,
Аз китфатон ҳар субҳидам.
Бар хусии зебои шумо,
Хусни дигар бинмуда зам.
Эй қуллаҳо, эй қуллаҳо,
Зебо ба мисли қасрҳо,
Осеб набвад бар шумо
Аз боду борон асрҳо.
Эй қуллаҳо, ҳамчун шумо,
Халқам, ки бошад сарбаланд,
Ибрат бигирад аз шумо,
Монад ҳамеша бегазанд!..
Дар чунин як мавҷи зебову баланди шеъру шоирона маҳфили “Дар суҳбати адиб” анҷом ёфт.
Дар зимн, Муродалӣ Собир барандаи Ҷоизаи адабии ба номи Мирзо Турсунзода, Аълочии фарҳанг ва Аълочии маориф ва илми Ҷумҳурии Тоҷикистон мебошад.
Махфират Муҳиддинова,
бахши матбуот
ва робита бо ҷомеа
Теги: робита бо ҷомеа, кӯдакон ва наврасон