Матбуоти даврӣ ҳифзкунандаи таъриху дастовардҳои Истиқлол
Истиқлоли давлатӣ барои ҳар миллат арзиши олӣ дошта, заминаи асосии мавҷудияти давлат ва кафили рушди давлатдории миллӣ ба шумор меравад. Ҷумҳурии Тоҷикистон зарфи 30 сол дар фазои соҳибистиқлолӣ ба дастовардҳои арзишманди сиёсӣ, иқтисодӣ ва фарҳангӣ ноил гардид. Дар ин росто матбуоти тоҷик низ барои пешравии ҷомеа, фаъолияти хуби мақомоту муассисаҳо ва таҳким бахшидани давлатдорию пешравии кишвар нақши босазо бозидааст. Аз ҷумла, нақши рӯзномаву маҷаллаҳо, ки дар саҳифаҳояшон воқеоту рӯйдодҳои давлатдории миллии моро инъикос кардаанд, хеле муҳим арзёби мешавад.
Хушбахтона, шуъбаи матбуоти даврии Китобхонаи миллии Тоҷикистон ин мероси гаронбаҳои матбуот ва фарҳанги миллатро, ки солҳои гуногун бо ҳуруфи тоҷикӣ, форсӣ, русӣ-криллӣ ва лотинӣ нашр шудаанд, ҳифзу нигаҳдорӣ намуда, дар ғанӣ гардонидани маърифату маънавиёти мардум саҳми арзанда гузоштааст. Ба пажӯҳишгарон, аспирантону, докторантоне, ки доир ба паҳлуҳои муҳимми илми тоҷик рисолаҳо таҳия кардаанду карда истодаанд, кормандони шуъбаи матбуоти даврӣ бо дарки масъулият ва рисолати касбияшон хидмат мерасонанд.
Бо хушнудӣ метавон зикр намуд, ки дар таҳияи филм доир ба 30-соли Истиқлоли давлатии Ҷумҳурии Тоҷикистон шуъбаи матбуоти даврӣ саҳм гузоштааст. Бо ин мақсад соли ҷорӣ дар Китобхона ду толори алоҳида ба рӯзноманигорони воситаҳои ахбори оммаи кишвар ҷудо карда шуд ва ба онҳо рӯзномаву маҷаллаҳое, ки дар фонди шуъба ҷой доранду дар саҳифаҳояшон ҳаёти сиёсию иқтисодӣ, иҷтимоию фарҳангии мамлакатро дар солҳои Истиқлол инъикос кардаанд, пешкаш карда шуд.
Имрӯз фонди тиллоии шуъбаи матбуоти давриро наздики 1 милион нусха рӯзнома ва беш 526 ҳазор нусха маҷалла бо забонҳои тоҷикӣ, русӣ ва ӯзбекӣ ташкил медиҳад. Бо мақсади қонеъ намудани талаботи хонандагон бо рӯзномаву маҷаллаҳои тозанашр, ки таваҷҷуҳи хонандагон ба онҳо бештар аст, аз ҷониби роҳбарияти Китобхона бо теъдоди зарурӣ харидорӣ карда мешаванд. Танҳо соли 2020 ба шуъба 9733 нусхаи рӯзномаву маҷаллаҳои тозанашр бо забонҳои тоҷикӣ, русӣ ва узбекӣ дар асоси нусхаҳои обунавӣ ва ҳатмӣ ворид гардид.
Як нукта боиси нигаронӣ аст, ки мутаасифона, на ҳама рӯзномаву маҷаллаҳое, ки имрӯз дар дохили кишвар нашр мешаванд, ба фонди шуъбаи матбуоти даврии Китобхонаи миллӣ ворид мешаванд.
Тиббқи иттилоъи масъулони Вазорати фарҳанг то моҳи марти соли ҷорӣ дар ҷумҳурӣ беш аз 376 рӯзнома ва 245 маҷаллаи давлатию ғайридавлатӣ ба қайд гирифта шудааст, вале аксарияти онҳо ба дасти Китобхонаи миллӣ намерасанд. Ҳол он, ки дар асоси Қарори Ҳукумати Ҷумҳурии Тоҷикистон «Дар бораи гирандагони нусхаи ҳатмии ройгони ҳуҷҷатҳо» бояд идораҳои маҷаллаю рӯзномаҳо маҳсулоти чопии хешро саривақт сенусхагӣ ба Муассисаи давлатии «Китобхонаи миллии Тоҷикистон» пешниҳод намоянд. Мутаассифона, на ҳамаи нашрияҳо қарори мазкурро риоя менамоянд. Бо ин мақсад мо ҳамкориҳоямонро бо идораи нашрияҳо ҷоннок намуда истодаем ва умедворем, ки мушкилоти мазкур бартараф мешавад, зеро вазифаи асосии шуъбаи матбуоти даврии Китобхонаи миллӣ ҷамъоварӣ, ҳифзу нигаҳдорӣ ва муаррифӣ кардану пешкаши хонанда намудани ганҷинаҳои матбуоти миллат аст, ки имрӯз дар сартосари ҷумҳурӣ ба нашр мерасанд.
Яке аз дастовардҳои мо дар замони Истиқлолият ин таҳияи “Донишномаи матбуоти даврии тоҷик” мебошад, ки бо ташаббус ва саҳми кормандони шуъбаи матбуоти даврӣ рӯйи кор омада, интизор дорем, ки бо дастгирии бевоситаи директори Китобхонаи миллӣ дар рӯзҳои наздик ба нашр мерасад. Донишномаи мазкур нахустин ҳуҷҷате хоҳад буд, ки таърихи рӯзномаву маҷаллаҳои тоҷикро аз оғози фаъолият то ба имрӯз дар бар гирифта роҷеъ ба аҳдофу фаъолияти онҳо маълумоти заруриро ба хонанда пешкаш менамояд.
Абдураҳими АБДУҚАҲҲОР
шуъбаи матбуоти даврӣ.