Миёни Китобхонаи миллӣ ва Институти Гётеи Олмон санади ҳамкорӣ ба имзо расид
Имрӯз ваколатдори махсуси Вазорати корҳои хориҷии Олмон оид ба Аврпои шарқӣ, Осиёи Марказӣ ва Қафқози ҷанубӣ Конрад фон Штрауссенбург ба Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон ташриф овард. Ӯро директори Китобхонаи миллӣ, доктори илмҳои педагогӣ, профессор Ҷумахон Файзализода ба ҳузур пазируфт.
Ҷаноби Конрад фон Штрауссенбургро намояндаи Вазорати корҳои хориҷии Ҷумҳурии Тоҷикистон ҳамроҳӣ намуд. Суҳбат дар фазои дӯстиву ҳамдигарфаҳмӣ идома ёфта тарафҳо масъалаҳои муҳими ҳамкориро матраҳ намуданд.
Ҷонибҳо дар заминаи рақмигардонии китобхона низ таваҷҷуҳи хоса зоҳир намуда, онро масъалаи зарурӣ донистанд.
Директори Муассиса иброз намуд, ки дар ин замина 350 000 китоби Китобхонаи миллӣ ба шакли электронӣ гардонда шуданд ва ин кор ҳоли идома аст. Аввал он китобҳое ба шакли электронӣ баргардон мешаванд, ки аз онҳо дар Китохона 1 нусха мебошад, гуфт сарвари Китобхона.
Пас аз пазириши гарму суҳбатҳо доир ба ҳамкориҳои оянда миёни Китобхонаи имллӣ ва Институти Гёте санади ҳамкорӣ ба имзо расид.
Дар поёни вохӯрӣ директори Китобхонаи миллӣ ба ҷаноби Штрауссенбург китоби Асосгузори сулҳу ваҳдати миллӣ Пешвои миллат Эмомалӣ Раҳмон ”Тоҷикон дар оинаи таърих. Аз Ориён то Сомониён”-ро туҳфа намуд.
Ваколатдори махсуси Вазорати корҳои хориҷии Олмон оид ба Аврпои Шарқӣ, Осиёи Марказӣ ва Қафқози Ҷанубӣ Конрад фон Штрауссенбург иброз намуд, ки китоб туҳфа намудан бисёр анъанаи хуб аст ва дар Китобхонаи миллии Олмон барои ин китоб бисёр ҷои хуб пайдо мешавад.
Маврид ба ёдоварист, ки Институти Гёте ё Муассисаи Гёте, ки ба номи шоири маъруфи Олмон Ёҳан Волфган Гёте номгузорӣ шудааст, созмонест, ки вазифаи он густариши забон ва фарҳанги олмонӣ дар берун аз марзҳои ин кишвар аст.
Аз 157 маркази ин муассиса 12 адади он дар дохили Олмон ва 145 марказ дар хориҷ аз Олмон қарор дорад. Дар доираи фаъолиятҳои педагогӣ ин ташкилоти бонуфуз инчунин барои давом додани омӯзиши забони олмонӣ маводҳои бешумореро низ барои донишомӯзон пешниҳод мекунад.
Раҳима Аъзам, бахши матбуот ва робита бо ҷомеа.