Мизи гирд дар Китобхонаи миллӣ: “Саодати миллат дар Ваҳдат аст”

Бо ташаббуси шуъбаи тарғиб ва барномаҳои фарҳангии Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон, бахшида ба 28 –умин солгарди ҷашни Ваҳдати миллӣ мизи гирд таҳти унвони “Саодати миллат дар ваҳдат аст” баргузор гардид. Дар кори ин ҳамоиш намояндагон аз Маҷлиси намояндагони Маҷлиси Олии Ҷумҳурии Тоҷикистон, Маркази тадқиқоти стратегии назди Президенти Ҷумҳурии Тоҷикистон, Вазорати фарҳанг ва Иттифоқи нависандагони Тоҷикистон иштирок ва суханронӣ карданд. Дар ҷараёни ин мизи гирд ҳамчунин Дастури библиографии “Ахбори Маҷлиси Олии Ҷумҳурии Тоҷикистон”, ки бо ибтикори Медиатекаи Президенти Ҷумҳурии Тоҷикистон таҳия ва нашр гардидааст, рӯнамоӣ шуд.

Дар ифтитоҳи нишаст Сайфиддин Камолзода, муовини директори Китобхонаи миллӣ суханронӣ намуда, ҳозиринро ба ин ҷашни муборак, ҷашни сулҳу оромӣ ва суботу осоиштагӣ шодбош намуд.

Вай зикр кард, ки маҳз Ваҳдати миллӣ дар саҳифаҳои таърихи халқи тоҷик ҳамчун рӯзи ҳамгироии миллӣ, иттиҳод ва сулҳу субот сабт шудааст. Маҳз Ваҳдати миллӣ буд, ки баъд аз соли 1997 Тоҷикистон ба сӯи бунёди ҷомеаи одилона, эҳё ва таҳкими ниҳодҳои давлатӣ ва рушди иҷтимоӣ-иқтисодӣ қадамҳои устувор гузошт.

Вакили Маҷлиси намояндагони Маҷлиси Олии Ҷумҳурии Тоҷикистон Асадулло Наҷмиддиниён дар идомаи ҳамоиш дар мавзуи “Нақши Ваҳдати миллӣ дар ҳифзи арзишҳои миллӣ” ибрози андеша намуд. Ӯ  аз рӯзҳои аввали ҷанги шаҳрвандӣ ва ба вартаи нобудӣ кашида шудани арзишҳои фарҳангию миллӣ сухан гуфта, таъкид намуд, ки маҳз дар ҳамин рўзҳои вазнин, бо талошу ҷоннисории фарзандони бедордили миллат ва роҳбарии хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Созишномаи умумии истиқрори сулҳ ва ризоияти миллӣ ба имзо расид. Ин санад бо вуҷуди тамоми душвориҳо ва фоҷиаҳои таҳмилшуда, роҳи қатъи ҷанг, барқарорсозии ҳаёти осоишта ва ваҳдати миллӣ гардид.

Аз таҷрибаҳои сулҳофаринии Пешвои миллат муҳтарам Эмомалӣ Раҳмон ва таҳкими сулҳу субот дар кишвар, ки барои Тоҷикистон таърихи фаромӯшнашаванда сохтааст, Саид Ҳомид Сафар, сардори Раёсати таҳлил ва ояндабинии масъалаҳои амнияти минтақавии Маркази тадқиқоти стратегии назди Президенти Ҷумҳурии Тоҷикистон дар мавзуи “Аз Хуҷанд то Хуҷанд. Таҷрибаи сулҳофарии Пешвои миллат Эмомалӣ Раҳмон” маърузаи пурмуҳтаво кард. Вай аз ҷумла гуфт:

Баъди ба даст овардани Истиқлолияти давлатӣ дар Тоҷикистон, мутаассифона, нофаҳмиҳои сиёсӣ ва иҷтимоӣ сабаби ҷанги шаҳрвандӣ (1992-1997)  гардид. Ин низоъ беш аз 150 ҳазор қурбонӣ, ҳазорҳо гурезаву муҳоҷир ва харобиҳои фаровон ба бор овард. Дар чунин ҳолати вазнин, пас аз баргузории Иҷлосияи XVI Шурои Олии Ҷумҳурии Тоҷикистон (ноябри соли 1992, ш. Хуҷанд), Эмомалӣ Раҳмон ба ҳайси Раиси Шурои Олии Ҷумҳурии Тоҷикистон интихоб гардид ва ба марҳалаи пурпечутоби сулҳсозӣ ворид шуд. Мавсуф ҳангоми  суханрониашон дар Иҷлосияи мазкур изҳор доштанд: «Ман қасам ёд мекунам, ки тамоми ҳастиямро барои барқарории сулҳ ва ваҳдати миллӣ дар Тоҷикистон равона мекунам».

Фарҳанги миллат барои пойдории давлат ва сулҳу субот нақши муҳим дошта, маҳз ҳифзу нигаҳдошт ва эътибори ҷиддӣ ба ин шохаи муҳими ҷамъияти Тоҷикистонро имрӯз ба ҷомеаи ҷаҳонӣ муарифӣ мекунад. Дар ҳамоиш бахшида ба рӯзи Ваҳдати миллӣ Сардори Раёсати табъу нашри Вазорати фарҳанги Ҷумҳурии Тоҷикистон Иброҳим Ахмедов ҷиҳати арзиши баланди фарҳанг, маънавиёт ва дигар муҳимоти миллату давлат суханронӣ кард.

Дар идома муовини раиси Иттифоқи нависандагои Тоҷикистон Равшаи Махсумзод аз Ваҳдат ва сулҳу субот, таъсири он ба ҷомеаи Тоҷикистон беҳтар гардидани вазъ дар тамоми соҳаҳои ҳаёти мардум аз ҷумла кори рӯзномаву маҷҷалаҳо ва  коргоҳҳои таъбу нашр гувоҳӣ арзишмандии ҷашни Ваҳдат ва сулҳофарӣ ибрози андеша кард.

Дар пасманзари сулҳ ва ваҳдати миллӣ, Тоҷикистон тавонист муҳити мусоиди рушди иҷтимоӣ ва иқтисодиро ташкил диҳад. Дар солҳои баъд аз сулҳ кишвар ба ислоҳоти соҳаҳои калидӣ-маориф, тандурустӣ, энергетика, нақлиёт ва амният пардохт. Ҳамчунин, шароити мусоид барои ҳамгироӣ бо кишварҳои хориҷӣ, иштироки фаъол дар созмонҳои байналмилалӣ ва густариши муносибатҳои дипломатӣ фароҳам омаданд.

Дар заминаи сиёсати хирадмандонаи Пешвои миллат, Тоҷикистон худро ҳамчун як кишвари сулҳпарвар, суботбахш ва ҷонибдори муколамаи тамаддунҳо муаррифӣ кард. Имрӯз ваҳдати миллӣ ба унвони арзиши муттаҳидсозандаи ҷомеа ва пояи абадияти давлатдорӣ шинохта шудааст.

Ҳамчунин, дар қисмати дигари ҳамоиши мазкур дастури библиографии “Ахбори Маҷлиси Олии Ҷумҳурии Тоҷикистон”, ки дарбаргирандаи номгӯи санадҳои меъёрҳои ҳуқуқии солҳои 1993-2003 мебошад, рӯнамои гардид.

Шариф Комилзода, номзади илмҳои педагогӣ, дотсент дар иртибот ба таҳия ва нашри дастури мазкур суханронӣ карда гуфт, ки кормандони Медиатекаи Президенти Ҷумҳурии Тоҷикистон бо истифода аз санадҳои меъёри ҳуқуқӣ, ки дар матбуот нашр гардидаанд, дастури мазкурро рӯи чоп овардаанд.

Нишондиҳандаи библиографии «Ахбори Маҷлиси Олии Ҷумҳурии Тоҷикистон» номгӯи санадҳои меъёрии ҳуқуқии солҳои 1993-2003 – ро инъикос менамояд.

Нишондиҳандаи мазкур аз чор боб иборат буда, ҳар як боби он ба санади меъёрию-ҳуқуқии алоҳида бахшида шудааст, аз ҷумла:

Боби якум қонунҳои Ҷумҳурии Тоҷикистон – 460 ва Қонуни конститутсионии Ҷумҳурии Тоҷикистон – 29 номгӯ.

Боби дуюм фармонҳои Президенти Ҷумҳурии Тоҷикистон – 75 ва фармонҳои Президиуми Ҷумҳурии Тоҷикистон – 799 ададро дар бар мегирад.

Дар боби сеюм қарорҳои Шурои Олии Ҷумҳурии Тоҷикистон – 115 адад, Қарори Маҷлиси Олии Ҷумҳурии Тоҷикистон 652 адад, Қарори Маҷлиси миллии Маҷлиси Олии Ҷумҳурии Тоҷикистон 418 адад, Қарори Шӯрои Маҷлиси миллии Маҷлиси Олии Ҷумҳурии Тоҷикистон 451 адад, Қарори Маҷлиси намояндагони Маҷлиси Олии Ҷумҳурии Тоҷикистон 737, Қарори Шӯрои Маҷлиси намояндагони Маҷлиси Олии Ҷумҳурии Тоҷикистон 1013 адад, Қарори якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон 100 адад, Қарори якҷояи Шурои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон 8 адад, Қарори якҷояи Шӯрои Маҷлиси миллӣ ва Шурои Маҷлиси намояндагони Маҷлиси Олии Ҷумҳурии Тоҷикистон 15 адад, Қарори Раиси Маҷлиси миллии Маҷлиси Олии Ҷумҳурии Тоҷикистон 8 адад, Қарори Раёсати Маҷлиси Олии Ҷумҳурии Тоҷикистон 1557 адад инъикос гардидаанд. Боби 4-ум аз 9 Созишномаи Ҷумҳурии Тоҷикстон, 1 Оинномаи Ҷумҳурии Тоҷикистон, 1 Кодекси андози Ҷумҳурии Тоҷикистон, 1 Кодекси гумруки Ҷумҳурии Тоҷикистон, 1 Кодекси обу ҳавои Ҷумҳурии Тоҷикистон иборат аст. Бояд тазаккур дод, ки дар нишондиҳандаи мазкур мураттиб маводро аз рӯи тартиби алифбоӣ гурӯҳбандӣ намуда, қарорҳоро тибқи замони нашрашон ҷо ба ҷо карда шудааст.

Нишондиҳандаи мазкур ба муҳаққиқону коршиносон ва оммаи васеи хонандагон ҳамчун дастур ва раҳнамои илмӣ ёри хоҳад расонд.

Дар фарҷоми нишаст гуфта шуд, ки Ваҳдати миллӣ муҳимтарин дастоварди Истиқлол аст, ки Тоҷикистони азизро аз гирдоби кашмакашҳои дохилӣ раҳо ва ба сӯи ояндаи неку шукуфон равона кард. Маҳз ҳамин ваҳдату сулҳу субот ва осоиши кишвар буд, ки имрӯз Тоҷикистон ба сӯи як ояндаи дурахшон гомҳои устувор мегузорад ва мо дар фазои оромию осудагӣ ба сар мебарем.

Наргис Назарзода,
бахши матбуот ва
робита бо ҷомеа