Мизи мудаввар таҳти унвони «Тармим ва таъмири китобҳо дар Ҷумҳурии Тоҷикистон: вазъ ва мушкилот»
Бо ташаббуси Шуъбаи таъмир ва тармими ҳуҷҷатҳои Китобхонаи миллӣ аввали декабри соли ҷорӣ таҳти унвони “Тармим ва таъмири китобҳо дар Ҷумҳурии Тоҷикистон: вазъ ва мушкилот” мизи мудаввар баргузор шуд. Дар мизи мудаввар ҷонишинони Директори Китобхонаи миллӣ Гадобек Маҳмудов ва Ҷалолуддин Нурзода ширкат ва суханронӣ намуд.
Гуфта шуд, ки Шуъбаи таъмир ва тармими ҳуҷҷатҳо яке аз бахшҳои таркибии Китобхонаи миллии Тоҷикистон ба ҳисоб рафта, вазифаи асосии он қонеъ гардонидани талаботи воҳидҳои сохторӣ доир ба таъмиру тармими фондҳои китобии Китобхонаи миллииТоҷикистон ба ҳисоб меравад.
Дар доираи иҷрои вазифаҳои худ кормандони он дар омӯзиши таҷриба, дар конфронс ва семинарҳои дохилии Китобхонаи миллии Тоҷикистон фаъолона иштирок мекунанд. Ҳамарӯза пайи омӯзиши таҷрибаи пешқадами давлатҳои мутараққии ҷаҳон дар соҳаи таъмир ва тармими ҳуҷҷатҳо, кормандони бахш тариқи шабакаҳо дониши хешро такмил медиҳанд.
Ширкаткунандагон дар бораи мушкилоти бахши тармим изҳори назар намуданд. Гуфтанд, ки бо гузашти солҳо китобҳои зиёд куҳнаву фарсуда шудаанд ва ҳамаи онҳо ба тармим ниёз доранд.
Китобҳои куҳан бахше аз таърихи миллатанд, ки бояд хуб нигоҳубин шаванд. Аз мутолиаи зиёд баъзе китобҳое, ки солҳои пеш нашр шудаву ҳоло ҳам аҳамияти илмиву бадеии худро гум накардаанд, корношоям мешаванд. Аз ин рӯ, онҳо ба таъмир бештар ниёз пайдо мекунанд.
Роҳбарияти Китобхонаи миллӣ бо дарки масъулият дар таҳкими фаъолиятҳои ин бахш пайваста имконоту воситаҳоро дар ихтиёр мегузорад.