Мулоқоти директори Китобхонаи миллӣ бо Роҳбари намояндагии «Россотрудничества» дар Тоҷикистон
Баъди зуҳри дирӯз директори Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон, доктори илмҳои педагогӣ, профессор Ҷумахон Файзализода роҳбари намояндагии «Россотрудничества» дар Ҷумҳурии Тоҷикистон Петрушев Андрей Валеревичро ба ҳузур пазируфт. Андрей Петрушев ба тозагӣ роҳбари намояндагии “Россотрудничества” дар кишвари мо таъин шудааст ва ҷонибҳо зимни мулоқот дар мавриди ҳамкориҳои судманди дуҷониба табодули назар намуданд.
Андрей Петрушев зимни ишора ба таҳкими ҳамкориҳои фарҳангӣ миёни Русия ва Тоҷикистон иброз дошт, ки кишвараш тасмим гирифтааст дар Китобхонаи миллии Тоҷикистон «Маркази забони русӣ» ифтитоҳ кунад ва ҳадаф кумак ба омӯзиши забони русӣ барои сокинони хоҳишманди Тоҷикистон аст.
Сарвари намояндагии “Россотрудничества” дар Ҷумҳурии Тоҷикистон ҳамчунин гуфт, ки аз ҷониби худ барои таъсиси ин марказ ҳама шароитҳои заруриро фароҳам хоҳад овард. Инчунин гуфт, ки барои “Маркази забони русӣ”, метавонад омӯзгоронони соҳибтаҷрибаро ҷалб намояд.
Профессор Ҷумахон Файзализода дар ҷарёни суҳбат зикр намуд, ки дар Китобхонаи миллӣ айни ҳол маркази омӯзиши забонҳои хориҷӣ фаъолият дошта , хоҳишмандон имкон доранд дар он забонҳои русӣ, англисӣ, куриёӣ, олмонӣ ва чинӣ омӯзанд. Ва ин талаботи замон буда, бе донистани забонҳои хориҷӣ махсусан забонҳои русӣ ва англисӣ ворид шудан ба муносибатҳои ҷаҳонӣ хеле мушкил аст.
Директори Китобхонаи миллӣ афзуд, ки Президенти Ҷумҳурии Тоҷикистон муҳтарам Эмомалӣ Раҳмон пайваста миллатро ба омӯзиши забонҳои хориҷӣ, аз ҷумла русиву англисӣ ва дигар забонҳо хориҷӣ таъкид мекунанд ва Ҳукумати Тоҷикистон низ барномаҳои зиёди омӯзиши забонҳои хориҷиро рӯи даст дорад ва татбиқ мекунад. Ин аст, ки Китобхонаи миллӣ маркази омӯзиши забонҳои хориҷӣ таъсис карда ва то кунун курсҳои мухталифи онро садҳо нафар хатм кардаанд.
Сарвари Китобхонаи миллӣ иброз дошт, ки ифтитоҳи “Маркази забони русӣ” ва ҷалби бештари мардум ба забономӯзӣ аз манфиат холӣ нест ва Китобхонаи миллӣ омодааст, ин пешниҳодро омӯзад ва барои дастгирии он чора андешад.
Дар охир меҳмонон аз толорҳои хониш, осорхонаҳои китоб дидан намуд ва бо шароит Китобхона аз наздик ошно шуд.
Гуфтанист, ки Андрей Петрушев хатмкардаи Донишгоҳи Федералии Урал ба номи Борис Елсин ва Донишгоҳи давлатии техникии Урал буда, солҳои тӯлонӣ дар вазифаҳои роҳбарикунандаи соҳаи равобити байналмилалӣ кор кардааст.
43 сол дорад.