Наврўзи Ҷумъамурод: Баргузории озмун дар рушди тафаккури миллӣ саҳм мегузорад!
Даври ниҳоии озмуни ҷумҳуриявии ««Тоҷикон» – оинаи таърихи миллат» дар Муассисаи давлатии Китобхонаи миллӣ идома дорад. Гуфтанист, ки дар даври якуми озмун 140 ҳазору 787 нафар, дар даври дуюм 16 ҳазору 994 нафар ва дар даври сеюми озмун 1605 нафар иштирок намуданд. Маълум аст, ки баргузории ҳамчунин сабқатҳои сатҳи боло барои худшиносиву бедории милати пурифтихору тамаддунофари тоҷик ангеза хоҳад дод. Доир ба баргузории ин озмун бо Наврўзи Ҷумъамурод, сардори Маркази матбуоти Вазорати маориф ва илми Ҷумҳурии Тоҷикистон гуфтумони кутоҳе анҷом додем:
-Сатҳи озмунро чӣ гуна арзёбӣ менамоед?
– Озмуне, ки имрўз шоҳиди баргузорияш будем, дар сатҳи олӣ баргузор гардид. Дар низомномаи озмун низ гуфта шудааст, ки ба хотири таърихдонӣ, рў овардан ба арзишҳои миллӣ ва ғанӣ гардондани ҳофизаи таърихии миллат баргузор мегардад ва дар воқеъ он ҳадафҳое, ки барои озмун муайян шудаанд, ба даст меорем. Соли аввали баргузории озмун нишон медиҳад, ки таваҷҷуҳи мардуми мо ба таърих, ба гузаштаи ниёгон, исботи он аст, ки халқи тоҷик дар тўли таърих тамаддунофар ва намуна барои дигар миллатҳо буд.
Дар ин росто нақши академик Бобоҷон Ғафуров, ки имсол 115-солагии ўро таҷлил мекунем, бориз аст ва имсол баргузории даври якуми озмун, ки дар он ҳудуди 141 000 нафар иштирок карданд, бозгўи он аст, ки тавачҷўҳ ба озмун миёни қишрҳои гуногуни ҷомеа хеле зиёд аст. Дар даври дуюм ҳудуди 17 000 , даври сеюм 1605 ва дар умум115 нафар рақобат доранд. Ин шумораҳо дар навбати аввал танҳо рақам аст, инҳо нафароне ҳастанд, ки барои таърих, гузаштаи миллати худро донистан кўшиш карданд, зеҳни ғолиб ва бедор доранд, ки дар он зеҳн таърихи мо мавҷ мезанад.
– Озмун ба мардум чӣ хоҳад дод?
– Баргузории озмун дар рушди тафаккури миллӣ, дар ташаккули ҳамаҷонибаи идеологияи миллӣ ҳатман саҳм мегузорад, чун мо идеологияи миллӣ мегўем, онро бо як сухани хушку холӣ наметавон сохт. Дар замини хушк чизе намерӯяд. Тафаккури миллӣ маҷмуъи сужаҳои таърихиест, ки мисли занҷир ба ҳам пайвастанд ва сужаҳои таърихӣ ҳатман бо хондани таърихи гузишта пайдо мешаванд.
– Аз озмун чиро бояд интизор дошта бошем?
– Бовар дорем, ки баргузории озмунҳо, рў овардан ба таърихи гузаштаи худ, сужаҳои таърихиро бедор мекунад, дар инсон ҳисси ифтихор аз гузаштаи худро меофарад ва идеологияи миллиро қавӣ мегардонад.
-Қарор аст озмун дар солҳои баъдӣ низ сурат бигирад?
– Ин дар салоҳияти муассиси озмун, Асосогузори Сулҳу Ваҳдати Миллӣ, Пешвои Муаззами миллат, муҳтарам Эмомалӣ Раҳмон аст. Баргузории ин озмун, ки соли аввали он аст, нишон хоҳад дод, ки то чӣ андоза мардум шавқманди озмун ҳастанд ва то куҷо зарурати идомаи озмун ба миён меояд.
Қобили зикр аст, ки маросими ҷоизасупорӣ ба ғолибони озмуни мазкур 1–уми декабр баргузор мегардад. Ҳоло дар озмун намояндагони Вилояти Мухтори Кӯҳистони Бадахшон 19 нафар, вилояти Хатлон 24 нафар, вилояти Суғд 24 нафар, шаҳру ноҳияҳои тобеи ҷумҳурӣ 24 нафар ва шаҳри Душанбе 24 нафар, дар маҷмуъ 115 нафар қувваозмоӣ мекунанд. Озмун аз рўи донишҳои таърихии иштирокдорон ва аз рӯйи хондани асари «Тоҷикон»-и Бобоҷон Ғафуров ва осори дигари таърихӣ муайян мешаванд, аз ҷумла:
донистани маълумоти муфассал доир ба асари «Тоҷикон»-и Бобоҷон Ғафуров ва муаллифи он; қобилияти нақлу тафсири воқеаҳои таърихии давраҳои муайян; баёни лаҳзаҳои муҳимми асар, қобилияти ровигӣ, сухандонӣ, асоснокнамоии рӯйдодҳои таърихӣ ва мақоми онҳо дар таърихи халқи тоҷик.
Раҳима Аъзам, бахши матбуот ва робита бо ҷомеа.