Нишасти хотирмон бахшида ба Рӯзи хушунат дар оила
Шўрои бонувони Китобхонаи миллӣ бахшида ба Рўзи хушунат дар оила мизи гирд доир намуд. Дар он зумрае аз коршиносону мутхассисони соҳа ҳузур пайдо намуданд. Маҳфилро муовини директори Китобхонаи миллӣ Ҷалолуддин Нурзода ифтитоҳ бахшид. Вай гуфт, оилаҳое, ки донишманданд, ҳамеша ба ҷомеа гулдастаеро дар симои фарзандон тақдим менамоянд.
Нишастро Манзура Саломова директори Муассисаи давлатии «Маркази худшиносии бонувон дар шаҳри Душанбе»-и Мақомоти иҷроияи ҳокимияти давлатии шаҳри Душанбе, Обидҷон Шарифов, корманди Кумитаи кор бо занон ва оилаи назди Ҳукумати Ҷумҳурии Тоҷикистон, Зикрулло Саидзода сардори факултаи якуми Академияи ВКД-и Ҷумҳурии Тоҷикистон ва Мунира Одинаева равоншинос, корманди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо ҳузурашон гарму зебо намуданд.
Гуландом Обидзода, номзади илмҳои фалсафа дар мавзуи нақши институти оила дар нигаҳдошти оила суҳбат намуда, оиларо институти иҷтимоӣ донист, ки робитаи зан ба мардро таъмин менамояд ва идомадиҳандаи насли солим,ҳамчунин интиқолдиҳандаи фарҳанги оиладорӣ аст.
– Арзишҳои иҷтимоӣ ҳамчун як пуштибони маънавиёт дар ҳаёти инсон пайдо мешавад. Он дар таърихи башарият ҳамчун пуштибони маънавӣ эътироф шудааст. Барои фаъолияти бошууронаи инсон кўмак мекунад. Мафҳуми оила ва фарҳанги миллӣ ҷудонашавнадаанд. Оиларо дуюмин табиати бавуҷудоварандаи инсон мегўянд. Оилаи тоҷик аз қадим нигаҳбони анъана ва фарҳанги тоҷик буд. Фарҳанги оиладории мо на танҳо пойдории муносибатҳои иҷтимоӣ, балки соҳиби рушди иқтисодиёти давлат ҳам ба ҳисоб меравад.
Ба назари Абдулвоҳид Абдулаҳадзода, сардори кафедраи фанҳои ҳуқуқи граждании Академияи ВКД-и Ҷумҳурии Тоҷикистон хушунат дар оила имрўз на танҳо дар Ҷумҳурии Тоҷикистон, балки дар тамоми ҷаҳон яке аз масъалаҳои ташвишовар мебошад. Мо дар сафарҳои хидматӣ дар Иёлоти Муттаҳидаи Амрико, ки дар масъалаи мақоми зан, баробарии гендерӣ, баробарии ҳуқуқи зану мард яке аз кишварҳои пешрафта аст, будем. Дар онҳо ҳам ин мушкил вуҷуд дорад. Дар давраи истиқлоли давлатӣ дар масъалаи зўроварӣ дар оила давлату ҳукумати Ҷумҳурии Тоҷикистон корҳои зиёде ба анҷом расондааст.
Телефони боварии Вазири корҳои дохилӣ 221 -21-21, алоқаи мадад 1919 дар ҳайати Раёсати нозиротӣ-ташкилии ВКД ташкил шудаанд, ки ҷабрдидагон метавонанд муроҷиат намоянд. 17 утоқи корӣ барои нозирони пешгирии зўроварӣ дар оила берун аз биноҳои Раёсати корҳои дохилӣ сохта ва ба истифода дода шудаанд. Зеро баъзе занҳо ба шуъбаи корҳои дохилӣ муроҷиат намекунанд, шарм мекунанд, баъзеашон аз тарси шавҳарон ба чунин утоқҳо намераванд. Аз ин рў, берун чунин утоқҳо аз ҳудуди шуъбаҳои корҳои дохилӣ ташкил шудаанд.
Абдулвоҳид Абдулаҳадзода яке аз мушкилоти соҳаро дар ташкил намудани марказҳои офиятбахшӣ мебинад. Ин масъала дар мо ташвишовар аст, зеро баъзан ҳолатҳое мешаванд, ки ҷабрдидаи зўроварӣ дар оила соти 1 ё 2-и шаб муроҷиат мекунад. Корманди милитсия ҳуқуқ надорад, дар чунин маврид ҷабрдидаро тавсия диҳад, ки ба хонаи шавҳар равад. Зеро мумкин аст шавҳар ўро боз бизанад, нисбати ў боз зўровариро раво бинад, ки ин оқибати нохуш ба бор меорад.
Ҳоло як маркази офиятбахшӣ дар Душанбе фаъолият менамояд. Дар ҳама шаҳру ноҳияҳо ҷой додани ҷабрдидагон мушкил аст. Хуб мешуд ин гуна марказҳо барои ҷабрдидагони зўроварӣ дар оила ба муддати муайян сохта шаванд. Маркази «Корвони умед» ҳаст, вале дар пойтахт. Ҷабрдидаро то ҳолати стресс ё хашму асабонияташ паст шудан, 5-10 рўз ҷой мекарданд, хуб мешуд. Масалан дар дар шаҳру ноҳияҳои Ҷумҳурии Узбекистон 27 маркази офиятбахшӣ (реабилитатсия) вуҷуд дорад, ки то як моҳ ҷабрдидагонро дар он ҷойҳо нигоҳ медоранд. Агар кўмак лозим, шавад равоншиносу ҳуқуқшинос доранд.
Раҳима АЪЗАМ,
бахши матбуот
вар обита бо ҷомеа.