“Низоми ҳисоботи молиявии бонкҳо дар шароити корбурди СБҲМ”
Ин китобро муаллифон Д.Т.Исоев ва М.У. Бобоев, устодони Донишкадаи политехникии Донишгоҳи техникии Тоҷикистон ба номи М.Осимӣ дар шаҳри Хуҷанд соли ҷорӣ чоп кардаанд.
Дар он ҷанбаҳои назариявӣ ва методологии низоми ҳисоботи молиявии бонкҳо дар шароити корбурди стандартҳои байналмилалии ҳисоботи молиявӣ (СБҲМ ), вазъи муосири рушди бахши бонкӣ, хусусиятҳои пешбурди баҳисобгирии молиявӣ дар бонкҳо, таҳияи ҳисоботи молиявии фосилавӣ, методикаи таҳияи ҳисоботи молиявии маҷмуии бонкҳо,инчунин самтҳои асосии рушди таъминоти ташкилию методии низоми ҳисоботи молиявии бонкҳо таҳқиқ карда шудааст.
Монографияи мазкур барои кормандони илмӣ, унвонҷўён, док- торантон, донишҷўён ва омўзгорони ихтисосҳои молиявӣ ва иқтисодии мактаби олӣ, директорони молиявӣ, сармуҳосибон, таҳлилгарони молиявӣ ва аудиторон тавсия шудааст.
Ҳамчуноне дар пешгуфтор омадааст, рушди устувори низоми бонкӣ дар шароити муосир таҳқиқи илмии самтҳои низоми баҳисобгирии муҳосибӣ ва ҳисоботи молиявиро тақозо мекунад. Гузариш ба СБҲМ ва ҷорӣ намудани он дар фаъолияти ташкилотҳои қарзӣ ба рушди бахши бонкӣ такон бахшид. Татбиқи СБҲМ рақобатпазирии бонкҳоро афзоиш дода, эътимоди муштариёнро зиёд мекунад, шаффофияти нишондиҳандаҳои молиявиро таъмин намуда, сатҳи идоракунии корпоративиро баланд мебардорад. Ҳамзамон фазои сармоягузориро беҳтар намуда, самаранокии қабули қарорҳои идоракуниро дар бонкҳо баланд мебардорад. Ҳисоботи мутобиқи талаботи СБҲМ таҳияшуда саҳеҳият ва эътимоднокии иттилооти молиявиро зиёд мекунад. Дар навбати худ, ҳисоботи шаффофи молиявӣ яке аз омилҳои баланд бардоштани шаффофият ва эътимод ба низоми бонкӣ мебошад.
Дар таҳияи монографияи мазкур муаллифон аз корҳои илмии олимони ватанӣ ва хориҷӣ дар соҳаи назария, методология ва амалияи пешбурди баҳисобгирии муҳосибӣ ва таҳияи ҳисоботи молиявӣ, инчунин аз санадҳои меъёрию ҳуқуқии танзимкунандаи соҳаи баҳисобгирии муҳосибӣ дар Ҷумҳурии Тоҷикистон ва Стандартҳои байналмилалии ҳисоботи молиявӣ истифода бурдаанд.
Таҳқиқоти мазкур назария ва методологияи низоми баҳисобгирии муҳосибӣ ва ҳисоботи молиявиро дар бонкҳо васеъ намуда, барои такмили таъминоти меъёрӣ, ташкилӣ ва методии ҳисоботи молиявии бонкҳо бо мақсади рушди устувори бахши бонкӣ мусоидат мекунад.
Китоби “Низоми ҳисоботи молиявии бонкҳо дар шароити корбурди СБҲМ”-ро метавон дар Китобхонаи миллӣ мутолаа кард.
Адиба Наҷмиддинова, мутахассиси пешбари шуъбаи адабиёти табиатшиносӣ, техникӣ ва илмҳои дақиқ.