Оғози боз як давраи омӯзишӣ барои кормандони Китобхонаи миллӣ
Бе истифодаи технологияи муосир имрўз китобхона фаъолият карда наметавонад. Махсусан китобхонаҳои миллӣ, зеро мубодилаҳои иттилоотӣ байни кишварҳо ва китобхонаҳои бузурги ҷаҳон сурат мегирад, ки донистани технология ва истифода бурдани барномаҳои дар китобхонаҳо роҳандозӣ шуда зарур ва ҳатмист.
Дар ин бора муовини директори Китобхонаи миллии Тоҷикистон Гадобек Маҳмудов нимаи аввали ҳамин рўз зимни ифтитоҳи давраи омўзишии нави барномаи ALEF иброз намуд.
Дар оғози давраи омўзишӣ муовини аввали директори Китобхонаи миллии Тоҷикистон Салима Раҷабзода аз зарурати азхуд намудани илмҳои технологияи муосир ҳарф зада, дар хониши дарсҳо ба кормандон барору комёбӣ ва тансиҳатӣ орзу намуд.
Ҳамзамон ба андешаи Гадобек Маҳмудов донистани барномаҳои Алеф барои кормандон саривақтиву зарурист. Зеро тамоми шуъбаҳо дорои технологияи муосир хоҳанд шуд. Ва ҳар шуъба метавонад барномаи махсуси худашро дошта бошад. Барномаҳои Алефи китобхона, ки алаккай даҳ сол шуд фаъолият дорад, омўзиши он барои тамоми кормандон зарур ва ҳатмист. Ин барнома тамоми самтҳои китобхонаро фарогир аст, агар ҳама модулҳои барнома роҳандозӣ карда шавад, тамоми фаъолияти кори китобхона тариқи худкор амалӣ мешавад,- афзуд дар идома ў.
Дар ҳамин ҳол дар назар аст солҳои оянда шуруъ аз даромадгоҳи китобхона то дархост намудани китоб аз ҷониби хонанда автоматӣ хоҳад шуд. Бинобар ин танҳо омўхтани феҳристи электронӣ кофӣ нест. Феҳристи электронӣ танҳо як модули барномаи мазкур аст.
Бояд гуфт қарор аст тамои самтҳои фаъолияти кори китобдорӣ аз ҷумла феҳристи электронӣ, диҳиши китоб аст, комплектатор, абонементи байни китобхонаҳо, хизматрасонии тамоми самтҳо тариқи барномаи Алеф сурат бигирад. Дар доираи ҳамин барнома китобхона метавонад барномаҳои хурди худкорро дар ҳар як толору шуъба ба роҳ монад.
Ин амал ҳамчунин барои сарфаи вақту коғаз низ муфид дониста шудааст. Бояд гуфт дарсҳо барои кормандони китобхона ҳафтае се рўз баргузор мегардад.
Раҳима Азам, шуъбаи тарғиб ва баргузории чорабиниҳои фарҳангӣ.