Оғози боз як давраи омӯзишии барномаи ALEPH дар Китобхонаи миллӣ
Аз 4 октябри соли равон дар Маркази таҳсилот ва инноватсияҳои китобдории МД «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон курси омӯзиши барномаи ALEPH оғоз гардидааст. Ин давраи омӯзишӣ ҷиҳати тақвияти донишҳои касбии кормандони «Китобхонаи миллӣ» роҳандозӣ гардида, дар он кормандони шуъбаву бахшҳо ва мутахассисони ҷавон ҷалб карда шудаанд.
Маврид ба зикр аст, ки аз оғози фаъолияти барномаи ALEPH дар МД «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон то инҷониб зиёда аз 120 нафар ин барномаро омӯхтаанд.
Курси мазкур ба шакли илмӣ – амалӣ баргузор шуда, дар баробари донишҳои назариявӣ ба таври амалӣ дар пойгоҳи моддӣ – техникии шуъбаҳои тахассусии «Китобхонаи миллӣ» ба шунавандагон омӯзонда мешавад.
Ба шунавандагони курси мазкур мутахассисони барномаи ALEPH Гулноза Халилова ва Шайдоӣи Абдуллоев дарс мегӯянд.
Омӯзиши барномаи ALEPH яке аз самтҳои муҳими соҳаи китобдорӣ буда, раванди кор бо адабиёт ва дигар маводи китобхонаҳоро танзим намуда, барои хидматрасонии мусоиду мувофиқ ба хонандагон дар китобхонаҳо нақши калидӣ дорад.
Қарор аст ин давраи омӯзишӣ то 4 ноябри соли равон идома кунад.
Нодиршоҳи Ҳабибулло,
мутахассиси пешбари Маркази таҳсилот
ва инноватсияи китобдорӣ.