Оғози даври ниҳоии Озмуни ҷумҳуриявии «Фурӯғи субҳи доноӣ китоб аст» дар Китобхонаи миллӣ
Субҳи имрӯз дар Муассисаи давлатии Китобхонаи миллӣ даври ниҳоии Озмуни ҷумҳуриявии «Фурӯғи субҳи доноӣ китоб аст» оғоз гардид. Пеш аз оғоз бо иштироки намояндагони Дастгоҳи иҷроияи Президенти Ҷумҳурии Тоҷикистон, Вазорати маориф ва илми кишвар, Кумитаи телевизион ва радиои назди ҳукумати Ҷумҳурии Тоҷикистон, Кумитаи кор бо ҷавонон ва варзиш, шоирону нависандагон, ходимони илмӣ, намояндагони ВАО ва иштирокчиёни озмун ҷаласа баргузор гардид.
Дар оғози ҷаласа Ҷамшед Ҷӯразода – Муовини якуми вазири маориф ва илми кишвар суханронӣ карда, иброз дошт, ки китоб инсониятро ба ҷаҳони бузурги маънавӣ ва камолоти ақлонӣ раҳнамуд месозад. Бо дарки ин ҳолат ҷавонону наврасон тавассути Озмуни ҷумҳуриявии «Фурӯғи субҳи доноӣ китоб аст» рӯ ба китобхонӣ оварда, тафаккури илмӣ ва эҷодии худро инкишоф медиҳанд.
Дар идома Анвар Сафарзода – сардори Раёсати маориф, фарҳанг ва иттилоотии Дастгоҳи иҷроияи Президенти Ҷумҳурии Тоҷикистон суханронӣ кард ва қайд намуд, ки мутобиқи амри Президенти Ҷумҳурии Тоҷикистон муҳтарам Эмомалӣ Раҳмон камиссияи ҷумҳуриявӣ таъсис дода шуда, ҷараёни озмунро бевосита назорат менамояд
Маврид ба зикр аст, ки имсол бо дарназардошти сину соли иштирокчиёни Озмуни ҷумҳуриявии «Фурӯғи субҳи доноӣ китоб аст» шумораи «Шоҳҷоиза»-и он аз 1 адад ба 4 адад зиёд гардид.
Ҳамчунин бояд гуфт ки даври чоруми Озмуни ҷумҳуриявии «Фурӯғи субҳи доноӣ китоб аст» то 23 ноябри соли равон идома карда, ғолибон бо диплом, ҷом ва мукофотпулӣ дар ҳаҷми аз 20 то 70 ҳазор сомонӣ қадрдонӣ карда мешаванд.
Наргис НАЗАРЗОДА
Бахши матбуот ва робита бо ҷомеа