Оғози як давраи омӯзишӣ барои китобдорони муассисаҳои таҳсилоти миёнаи умумии шаҳри Душанбе
Зумрае аз китобдорони муассисаҳои таҳсилоти миёнаи умумии шаҳри Душанбе ба як давраи омӯзишии такмили ихтисос дар Китобхонаи миллӣ ҷалб шуданд. Сайфиддин Камолзода, муовини директори Китобхонаи миллӣ, ки масъулияти баргузории ин давраи омӯзиширо ба уҳда дорад, гуфт, ки 25 нафар омӯзгорон ва китобдорони муассисаҳои таҳсилоти миёнаи умуми шаҳри Душанбе, ки дар китобхонаҳои мактабҳо бо хонандагон кор мекунанд, ба ин давраи омӯзишӣ шомил шудаанд.
Ин омӯзиш 5-уми феврали соли равон оғоз шуд ва қарор аст то 17-уми феврал идома кунад. Дар барномаи омӯзишӣ ширкаткунандагон доир ба мавзӯҳои таърихи пайдоиши аввалин китобхонаҳо дар олам ва имрӯзи китобу китобдорӣ дар ҷаҳон, таърихи китобдории тоҷикон ва маъруфтарин китобхонаҳои қаламрави форснишин, вазифаҳои китобхонаҳои мактабӣ ва нақши китобхона дар ташаккули малакаҳои хониши хонандагон, ташкили фондҳо, тасвири библиографӣ ва қоидаҳои умумии тартибдиҳии он, роҳҳои ташкили намоиши китоб вобаста ба синфҳо ва хонишҳои берунадарсӣ ва ғайра маълумотҳои нав дарёфт карда, дар фаъолияти минбаъдаашон истифода хоҳанд бурд.
Омӯзгорон дар баробари иштирок дар курсҳои такмили ихтисос ҳамчунин имкон доранд аз тамоми махзанҳо, толорҳо ва шуъбаҳои хизматрасонии китобхона дидан кунанд.
Маврид ба зикр аст, ки Асосгузори сулҳу Ваҳдати миллӣ Пешвои миллат, Президенти Ҷумҳури Тоҷикистон муҳтарам Эмомалӣ Раҳмон дар паёмашон ба Маҷлиси Олии Ҷумҳурии Тоҷикистон таъкид карданд, ки “авзои зудтағйирёбандаи ҷаҳони имрӯза низоми маорифи муназзам, мустаҳкам ва дар айни замон ҷавобгӯ ба талаботи рӯзафзуни ҷомеаро тақозо менамояд”. Дар ин маврид ба масъалаҳои такмили ихтисос ва бозомӯзии омӯзгорон, омода кардани муаллимон ва таҷдиди назар ба стандартҳои касбӣ барои кормандони соҳаи маориф таваҷҷуҳи ҷиддӣ зоҳир карда хоҳад шуд.
Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон дар ҳамкорӣ бо бахши Муассисаи давлатии “Донишкадаи ҷумҳуриявии такмили ихтисос ва бозомӯзии кормандони соҳаи маориф” дар шаҳри Душанбе пайваста давраҳои омӯзиширо баргузор намуда, бо ҷалби мутахассисони варзида дарсҳо ташкил мекунад.