Омодагии шаҳри Душанбе ба Наврӯзи байналмилалӣ

Дар Маҷмааи меъмории рамзи “Истиқлол”-и шаҳри Душанбе “Рамзи Наврӯзӣ” ороста шудааст, ки баландии он 30 метр ва паҳноияш бошад ба 15 метр мерасад. Ҳар табақи суманак бо нақшу нигори миллӣ оро дода шуда, дар табақи охирин гул чун рамзи эҳёи табиат гузошта шудааст.

Дар шафати табақи суманак сабзаю дарахтони гуногун ва гулҳои хос ба фасли баҳор монда шуда, паҳлӯи муҷассамаи Маҷмааи меъмории рамзи “Истиқлол”-ро ба муҳити ҷашнӣ табдил додаанд.

Дар маҷмуъ, пешниҳоди ороишоти бадеӣ, навиштаҷоти гуногун ва дигар тадбирҳои зарурӣ аз ҷониби Мақомоти иҷроияи ҳокимияти давлатии шаҳри Душанбе пойтахтро ба намунаи асосии омодагӣ ба ҷашни Наврӯз ва фараҳу шукӯҳ табдил дода шудааст..

Бояд ёдовар шуд, ки рамзи ҷашни байналмилалии Наврӯз ва соли нави миллӣ дар мувофиқа бо Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон тасдиқ гардидааст ва имрӯз таҷасумкунандаи ин оини аҷдодии миллати кӯҳанбунёди тоҷик маҳсуб меёбад.

Баҳор ҳамчун пайки фараҳ аз омад–омади Наврӯз мужда медиҳад. Инро аз тасвирҳои бадеии сатҳи баланд аллакай ҳар як сокину меҳмони шаҳри Душанбе дар боғу гулгашт ва кӯчаю хиёбонҳои пойтахт эҳсос мекунад.

Сокинону меҳмонони шаҳри Душанбе ба майдонҳои орододашуда омада, бо эҳсоси баланди худшиносӣ якдигарро ба фарорасии Наврӯз табрик мекунанд.

Инчунин дар асоси ташаббуси Мақомоти иҷроияи ҳокимияти давлатии шаҳри Душанбе дар 4 ноҳияи пойтахт низ рамзи Наврӯз ва соли нави миллӣ суманак ва гулу буттаҳои ороишӣ гузошта шудааст. Суманак, ки рамзи асосии Наврӯз маҳсуб меёбад, дар фасли баҳор ҳар як оилаи тоҷик онро омода мекунанд. Суманак ва дигар суннатҳои ҷашни Наврӯз аз он шаҳодат медиҳад, ки миллати тоҷик аз давраҳои қадим дар тарғиби маърифати баланди заминдорӣ, истеҳсоли неъматҳои моддӣ, таҳкими сулҳу дӯстӣ ва якдигарфаҳмӣ дар ҷаҳон саҳми намунавӣ гузоштааст.

Соли 2025 дар шаҳри Душанбе дар доираи таҷлил аз ҷашни Наврӯз чорабиниҳои гуногуни сатҳи баланд ба нақша гирифта шудааст. Айни замон бо иҷрои суннатҳои ҷашни Наврӯз омодагӣ ба ин тадбири сатҳи баланд ҷараён дошта, ба тарғибу эҳёи бештари Наврӯз замина гузошта мешавад.

Ҳоло аз ҷониби Мақомоти иҷроияи ҳокимияти давлатии шаҳри Душанбе ҳадаф ба он равона гардидааст, ки баҳору Наврӯз ҳамчун пайки фараҳбахш хушрӯзиро дар дилу дидаи ҳар як нафар афзун гардонад.

Абдулазиззода Саидакбар,
муовини сардори шуъбаи
Дастхатҳои Шарқ ва китобҳои нодир.