Ояндаи дурахшони давлат ва миллат дар дасти ҷомеаи китобхон аст
Китоб ҳамчун шиносномаи шоистаи ҳар як халқу миллат барои поку бегазанд нигоҳ доштани забони модарӣ ва рушди он, таҳкиму тақвият ёфтани ҳуввияти миллӣ ва худогоҳиву худшиносии ҳар як фард нақши бузург дорад.
Эмомалӣ Раҳмон
Ҳамасола дар Тоҷикистон рӯзи 4-уми сентябр ҳамчун “Рӯзи китоб” ҷашн гирифта мешавад. Бо ташаббуси Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон санаи 4-уми сентябри соли 2007 – рӯзи гузоштани хишти аввали Китобхонаи миллӣ бо дарназардошти аҳамияти бузурги китобу китобдорӣ ва донишу маърифат дар қатори идҳои дигар – Рӯзи китоб эълон гардид ва зимни суханронӣ дар ин рӯзи таърихӣ афзуданд: “Дар марҳилаи нави таърихӣ суннати қадимаи китобдориву китобхонии мо ба сурати тоза ва мазмуну мӯҳтавои нав идома пайдо кард”.
Ва ҳамасола ин санаи фархунда дар гӯшаву канори мамлакат дар сатҳи баланд доир мегардад.
Китоб равшангари дилу дида, ҳамдам, ҳамнафас ва беҳтарин рафиқи рӯзҳои танҳоӣ барои ҳар як инсон аст. Китоб ҳамчун маслиҳатгари беминнат ба инсон дар тамоми ҷабҳаҳои зиндагӣ ёвар буда, дӯсти мушфиқу ғамхорест барои пайдо намудани қуллаҳои баланд дар роҳи пурпечутоби зиндагӣ. Шахсе ки пайваста ба мутолеаи китоб машғул аст мисли боғи пурсамарест, ки ҳамагон аз меваҳои шаҳдбори он баҳравар мегарданд. Мутолеаи китоб инсонро аз бадиву дурӯғ, кибру ғурур ва бухлу ҳасад дур сохта, дӯст доштани аҳли башар, раҳмдилӣ ва меҳрубониро меомӯзад. Вақте шахс вориди дунёи китоб мегардад тамоми изтиробу ташвишҳои ӯ бартараф мегарданд.
Аз гузашта то ба имрӯз китоб барои инсон як маъхази бебаҳои ақлу хирад аст. Ҳар як халқу миллат маҳз тавассути китоб тамоми мероси гаронбаҳои худро дар тӯли асрҳо омӯхтааст.
Таърихи пайдоиши китоб ба пайдоиши хат ва забон мансуб аст. Баъди зуҳури хат одамони қадим имкон пайдо кардаанд, ки да рӯйи санг, чӯб, сафол, барги дарахтон,устухонҳо, пӯсти хайвонот нақш офаранду нависанд. Бо мурури замон дар натиҷаи ихтирои қоғаз низоми нави китобдорӣ ҷорӣ гардид. Дар Аврупо низ китобчопкунӣ аз варақҳои яклухт, баъд ба пӯст ва ниҳоят ба қоғаз гузашт. Ҳамчунин халқи тоҷик низ аз шумораи он халқҳоест, ки ба китобу китобдорӣ эҳтиром ва эътиқоди хоса дорад. Хушбахтона, санъати китобдориву сухансозӣ имрӯз дар кишвари азизи мо мавқеи махсусеро доро мебошад
Осори классикон тавассути китоб то замони мо эҳё гардида, олами тафаккури мардумро мисли субҳ равшан мекунад. Агар дақиқтар андеша ронем, китоб рафиқи ҷонии инсон аст. Дар лаҳзаи вазнинӣ, бахусус танҳоӣ китоб дар бари мост. Воқеан, дар ягон давру замон бе китоб ғизои маънавии зиндагии рангинро наметавон тассавур намуд. Ба таъбири халк: «Хонаи бе китоб рӯзи бе офтоб аст».
Миллати тамаддунофару фарҳангдӯсти тоҷик аз қадим миллати китобдору китобдӯст буда, тули чандинҳазорсолаҳо ин оини муқаддасро гум накардааст. Вале ин ошкор аст ки бо пешрафти илму техникаҳои муосир таваҷҷуҳи ҷавонону наврасон ба китобу китобхонӣ коста мегардад.
Хушбахтона, ин анъанаи неки гузаштагон, яъне санъати китобдориву сухансозӣ имрӯз низ дар Тоҷикистони соҳибистиқлоли мо мавқеи шоиста дорад. Ҳар рӯз аз тариқи нашриётҳои давлативу хусусӣ садҳо китоб ба нашр расида, ҳамчун неъмати бузург ба хони маънавии мардум гузошта мешавад.
Ҳамасола, Пешвои Миллат, Президенти Чумхурии Тоҷикистон, муҳтарам Эмомалӣ Раҳмон дар паёмҳояшон сухан ронда, таъкид менамоянд, ки ҷавонони имрӯза бояд ҳамқадами замона бошанд, ба мутолиаи китоб машғул шаванд, чунки ояндаи давлату миллат дар дасти ҷавонон аст.
Бояд гуфт, ки Пешвои Миллат барои наврасону ҷавонон муассисаҳои зиёде бунёд намуданд. Яке аз онҳо Китобхонаи Миллӣ мебошад, ки соли 2011 кушода шудааст. Ҳамарӯза ҷавонону наврасон ба ин муассиса рафта ба хондани китоб машғул мешаванд.
Хушбахтона, бо ташаббусу пешниҳоди Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ҷалби ҷавонону наврасони кишвар ба китобу китобхонӣ ва пайдо намудани истеъдодҳои ҷавон озмуни ҷумҳуриявии «Фурӯғи субҳи доноӣ китоб аст» роҳандозӣ гардида, ҳамасола шумораи иштирокчиёни он афзуда, сатҳи баргузории он беҳтар гардида истодааст.
Хонандагони тамоми муассисаҳои таълимии кишвар кӯшиш менамоянд, ки иштирокчии ин озмун бошанд ва соҳиби ҷойҳои ифтихорию мукофотпулиҳо гарданд.
Озмуни «Фурӯғи субҳи доноӣ китоб аст» калидест барои боз кардани дари илму маърифат ба ояндаи дурахшони кишвари азизу маҳбубамон. Ҳадафи асосӣ аз баргузор намудани ин озмун, пеш аз ҳама баланд бардоштани сатҳи саводнокии тамоми қишри ҷомеа, ҳувийяти миллӣ, ватандӯстию меҳанпарастӣ, худшиносии миллӣ, васеъ намудани доираи забондонӣ миёни қишрҳои ҷомеа, дӯст доштани китобу китобхона, тақвият бахшидани нерӯи зеҳнии аҳолии кишвар ва пайдо намудани чеҳраҳои дӯстдори қаламу каломи бадеъ мебошад.
Пешвои миллат Эмомалӣ Раҳмон дар тамоми суханрониҳояшон пайваста таъкид менамоянд, ки «Ҷавонон нерӯи ояндасози миллату давлати мо ҳастанд». Барои ҳамин ҳам ҷавонону наврасони мо бояд талош варзанд, ки дар пешрафти илму фарҳанг ҳиссагузор бошанд.
Дӯстова Бунафша Зафаровна
муовини Раиси Кумитаи иҷроияи
ҲХДТ дар шаҳри Ҳисор