Роҳбари Муассисаи фарҳангии Созмони ҳамкории иқтисодӣ (намояндаи Покистон) ба Китобхонаи миллӣ ташриф овард
Саад С. Хон – Роҳбари Муассисаи фарҳангии Созмони ҳамкории иқтисодӣ (намояндаи Покистон ) аз Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон дидан намуд. Дар ин вохўрӣ ҷаноби Саад С. Хонро намояндагони Вазорати корҳои хориҷии Тоҷикистон ҳамроҳӣ намуданд.
Меҳмононро муовини аввали директори Китобхонаи миллӣ Салима Раҷабзода, муовини директори Китобхонаи миллӣ Сайфиддин Камолзода, мушовири директори Китобхонаи миллӣ Сафар Шосаидзода ва кормандони шуъбаи робитаҳои байналмилалии китобхон пешвоз гирифтанд.
Пас аз пазироӣ меҳмонон ба осорхонаи Китобхонаи миллӣ ворид шуда, бо дастхатҳои нодири Китобхона ва намунаи хатҳои гуногуни гузаштагонамон, инчунин наққошиҳо аз рўи асари безаволи Абулқосим Фирдавсӣ «Шоҳнома» шинос шуданд.
Сипас дар толори пазириши Китобхона вохўрии ҳайати меҳмонон ва муовинони Китобхонаи миллӣ барпо гардид.Муовини аввали директори Китобхонаи миллӣ Салима Раҷабзода дар оғози суҳбат доир ба Китобхонаи миллӣ маълумот дод ва зикр намуд, ки 10-уми ноябри соли 2021 Ёддошти тафоҳуми ҳамкории дуҷониба барои рушди бойгониҳо ва китобхонаҳо байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон ба имзо расид. Инчунин ҳамкорӣ миёни Китобхонаи миллӣ ва Донишгоҳи Панҷоби Покситон дар ҷараён аст.
Зимни суҳбат Роҳбари Муассисаи фарҳангии Созмони ҳамкории иқтисодӣ Саад С. Хон иброз дошт, ки бори аввал ба Тоҷикистон омадааст ва инро барои худ ифтихор донист. Ў аз ҳамкориҳои Китобхонаи миллӣ бо Покистон изҳори хушҳолӣ намуд ва таъкид кард, ки ҷонибдори рушди ин гуна ҳамкориҳои созандаи илмиву фарҳангӣ миёни ду кишвар аст.
-Аагар мавзуоте дар Ёддошти тафоҳум миёни Китобхонаи миллӣ ва Покистон ба иҷро нарасида бошад, ба мо бигўед, мо саъй мекунем, кумак кунем ки иҷро бишавад, афзуд дар идома ҷаноби Саад Хон.
Маъмурият ва вазифаи аслии Муассисаи фарҳангии Созмони ҳамкории иқтисодӣ ба гуфтаи роҳбари он ҷаноби Саад Хон ҳамкорӣ ва барқарории ҳамкориҳо миёни китобхонаҳои миллӣ, осорхонаҳои миллӣ, радиову телевизионҳои миллӣ ва муассисоти синамоӣ аст.
Ин Муассиса тасмим гирифтааст иртибот ва ҳамонҳангии байни нависандагону шуарои кишварҳои СҲИ-ро барқарор кунад.
Ҳамон тавр ки намояндаи Покистон дар Муассисаи фарҳангии ин созмони бонуфуз Саад Хон гуфт онҳо талош мекунанда дар солҳои оянда як иртиботу ҳамоҳангии маҳкаме миёни 17 кишвари СҲИ барқарор кунанд.
Вай ҳамчунин гуфт, ки иртибот ва ҳамоҳангии бештаре байни китобхонаҳои кишварҳои СҲИ барқарор шавад ва барои нависандагон, пажўҳишгарон ва муҳақиқон ин имкон фароҳам бишавад, ки дастарсӣ ба манобеъ ва китобҳои ин китобхонаҳо фароҳам гардад. Ба таври мисол агар як пажуҳишгар дар Анқара мехоҳад доир ба вазъи Тоҷикистон бидонад, қобилияти дастарсӣ ба манобеъ ва иттилооти Тоҷикистонро дошта бошад.
– Ман дар кишварҳои Итиҳодияи Аврупо мушоҳида кардам, ки як ҳамкории наздике байни китобхонаҳои миллӣ барқарор аст, тавре ки агар пажуҳишгаре ё як устоде ниёз ба як китобе дошта бошад ва дар ҳар китобхонаҳои миллии ин кишварҳои Аврупоӣ бошад, метавонад ба осонӣ онро дастрас намояд, бигирад, мутолиа кунад ва баргардонад. Аммо чунин иртиботу ҳамкорӣ миёни кишварҳои СҲИ ва китобхонаҳои миллиашон вуҷуд надорад.
Ҷаноби Саад гуфт, ки дар шаҳри Лоҳур 72 китобхона вуҷуд дорад, аммо бо ин ки гоҳе фосилаашон 200-300 ярд ҳаст, механизм ё равиши система вуҷуд надорад, ки агар китобе дар китобхонае мавҷуд бошад, дастрасӣ ба он вуҷуд дошта бошад. Бояд аввал ба ин китобхонахо ба узвият бипайвандед ва баъд метавонед китобро қарз бигиред.
Мо дар солҳои оянда қасд дорем як системае барқарор намоем, ки ҳамоҳангӣ байни китобхонаҳои милли кишварҳои СҲИ бошад, ки агар пажуҳишгаре мехоҳад таҳқиқ анҷом бидиҳад, ба осонӣ битавонад виза бигирад ва ба он кишварҳо сафар кунаду ба манобеъ ва китобҳои он кишвар дастрасӣ дошта бошад.
Мушовири директори Китобхонаи миллӣ, номзади илмҳои педагогӣ Сафар Шосаидзода аз Роҳбари Муассисаи фарҳангии Созмони ҳамкории иқтисодӣ хоҳиш намуд, ки мусоидат кунанд то тавассути Муассисаи фарҳангии ин созмон руйхати электронии дастхатҳои Шарқ-классикони форс-тоҷик, ки дар марказҳои илмиву бойгониҳои Покистон ва дигар кишварҳои узви СҲИ мавҷуданд, ба Китобхонаи миллӣ ирсол гардад.
Пешниҳоди дигари мушовири директори китобхонаи миллӣ ба ҷаноби Саад Хон омўзиши таҷрибаи фаъолияти инноватсионии китобхонаҳои кишварҳои узви СҲИ буд. Мехоҳем мутахассисони мо аз таҷрибаҳои пешқадами китобхонаҳои миллии кишварҳои узви СҲИ биомўзанд ва агар мутахассисони онҳо низ хоҳиш дошта бошанд таҷрибаи моро дар ин самт аз худ кунанд.
Мо метавонем дар тамоми масоиле, ки марбут ба ҳамкорӣ бо ҳама кишварҳои минтақа мешавад, ба шумо кўмак кунем, гуфт Роҳбари муассисаи зикршуда.
Тарафҳо барои ҳамкориҳои оянда изҳори омодагиву хушҳолӣ намуданд ва ба ҳамдигар туҳфаҳо тақдим намуданд.
Ёдовар мешавем Муассисаи фарҳангии Созмони ҳамкории иқтисодӣ 17 кишвари узви Созмони ҳамкории иқтисодиро дар бахши фарҳангӣ намояндагӣ мекунад.
Раҳима Аъзам, бахши матбуот ва робита бо ҷомеа.