Рӯнамоии дастури библиографии “Маҷид Салим. Маҷмуаи мақолаҳо ва китобномаи шарҳиҳолӣ”- дар Китобхонаи миллӣ

355

1-(41) 11-уми июли соли равон бо ташаббуси шуъбаи библиографияи миллии   Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон рӯнамоии Китобномаи шарҳиҳолии шоир, нависанда, рӯзноманигор, тарҷумони маъруф, барандаи ҷоизаи давлатии ба номи Абуабдуллоҳи Рӯдакӣ Маҷид Салим баргузор гардид. Дар ин ҳамоиш олимону шоирон, намояндагони ВАО ва кормандони Китобхонаи миллӣ иштирок намуданд.

Маҳфил бо сухани ифтитоҳии директори Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон, доктори илмҳои педагогӣ, профессор Ҷумахон Файзализода оғоз гардид.  Директори Китобхонаи миллӣ зимни суханронии худ аз ҷумла гуфт, ки  дар адабиёти муосири тоҷик образи ҳайвонот дар ҳикояву повесту достонҳои адибони кишвар дида мешавад, вале он ҳама дар баёни сужа чун унсур истифода шудааст ва ё барои барҷаста нишон додани хислату характери қаҳрамонон ҷо-ҷо мавриди истифода қарор гирифтааст. Ҳарчанд тасвири олами вуҳуш дар адабиёти классикии мо ва адабиёти олам собиқаи дерн дорад.

Танҳо нависандае аз миёни адибони муосир, ки комилан рӯ ба олами вуҳуш овард, Маҷид Салим аст, ки имрӯз ҳамагон ӯро дар ин ҷода муваффақ меҳисобанд ва иштибоҳ ҳам нест. Маҷид Салим аз оғоз ин мавзуъро мавриди таҳқиқ қарор додааст ва беҳтарин асарҳои бадеии худро аз боби ҳайвонот навиштааст.

Албатта, навиштан дар бораи олами вуҳуш кори содаву осон ҳам нест. Вақте кас аввалин романи адиб “Хирс”-ро мутолиа мекунад, бевосита аз худ суол мепурсад, ки Маҷид Салим дар бораи хирс бояд чанд китоб хондаву чандин соат рӯбарӯ бо ин ҷонвар нишаста бошад, ки хислату характери онро ба ин ҳад дақиқ омӯхтаву ба риштаи тасвир кашидааст. Бо ҳамин далоил шуъбаи библиографияи миллии Китобхонаи миллӣ дар қатори даҳҳо олимону шоирон ва нависандагон Китобномаи шарҳиҳолии Маҷид Салимро нашр кард, ки имрӯз мо бо мақсади рӯнамоии он ҳамоиш ташкил намудем.

Ноиби Президенти Академияи миллии илмҳои Тоҷикистон  Маҳмаддовуд Саломиён аз силсиланашрҳои чунин дастурҳо изҳори хушнудӣ намуда, ин иқдоми  роҳбарияти Китобхонаи миллиро амри зарурӣ ва манфиатбахш донист.

Мачид-Салим Дар идомаи ҳамоиш муовини раиси Иттифоқи нависандагони Тоҷикистон Равшани Махсумзод суханронӣ намуда, гуфт, ки воқеан Маҷид Салим дар адабиёти мо падидаи нав аст, чун ба анималистика рӯ овард ва тавонист мувафақ гардад.

Ато Ҳамдам – Нависандаи халқии Тоҷикистон оид ба фаъолияти гуногунҷабҳаи шоир ва нависандаи маъруф Маҷид Салим сухан кард ва зикр намуд, ки дӯстии мо бо Маҷид Салим доманадор аст вале вақте баҳси нависандагӣ ва шоириву мавқеи он меравад, мо ин сарҳадро нигоҳ намекунем. “Борҳо бо Маҷид сари сарлавҳаҳо ва номи ҳикояву достонҳо баҳсамон мешавад, вале ин фақат барои пешравӣ ва расидан ба қуллаи мақсуд аст”- гуфт Ато Ҳамдам

Адабиётшинос, узви вобастаи Академияи илмҳои Тоҷикистон Аламхон Кӯчарзода чопи Китобномаи шарҳиҳолии Маҷид Салимро айни мудаао донист. Адабиётшинос зикр намуд, ки  паҳлуҳои эҷоди Маҷид Салим хеле фарох ва барои омӯзиш  зарурианд, аз ин хотир нашри ингуна як дастури библиографӣ барои муҳақиқон ва онҳое ки мехоҳанд корҳои илмӣ анҷом диҳанд маводи хуб ва бисёр манфиатбахш мебошад.

Сайдамир Вализода – собиқадори соҳаи маориф аз ноҳияи Ҳамадонӣ зимни суханронӣ иброз дошт, ки “ Маҷид Салим аз аввал ба таҳқиқи олами вуҳуш рӯ овард ва тамоми кӯшиши худро барои хонандааш кард, то образҳои мондагор офарад. Ба олами ҳайвонот рӯ овардани нависанда кори хеле заҳматталаб аст, ки на ҳар нафар метавонад инро ба дӯш гирад. Дар адабиёти ҷаҳон садҳо асарҳои беҳамто дорем, ки тамсил дар онҳо ҳамчун як унсур истифода шуда ва нависандае, ки комил ба “анималистика” рӯ оварад, кам андар кам мушоҳида мекунем. Аз ин рӯ, бояд чопи ин дастурро ба тамоми алоқамандони ашъори шоир, нависанда, рӯзноманигор ва мутарҷим муборакбод гуфт”.

Дар қисмати дигари ҳамоиш муҳаққиқ Ҳафиз Раҳмон изҳори назар намуда, гуфт, ки вақти он расидааст, ки осори Маҷид Салим  дар доираи як кори илми омӯхта шавад ва ба хонанда рушан гардад, ки то кадом андоза нависанда мувафақ гаштаву чӣ натиҷаҳо ба даст овардааст.

мурод-МуродиҲамчунин профессор Мурод Муродӣ, Шариф Комилзода, Ҷалолуддин Нурзода ва дигарон назару андешаҳои худро дар иртибот ба дастури библиографии мазкур баён намуда, иброз доштанд, ки бидуни шак ин маҷмуа ба донишҷӯёну омӯзгорон, дӯстдорони каломи бадеъ, адабиётшиносону муҳаққиқон ва доираи васеъи хонандагон ҷиҳати пажӯҳиш ва омӯзиши осори Маҷид Салим кӯмак мерасонад.

китобнома Дар фарҷом Маҷид Салим ба роҳбарияти Китобхонаи миллӣ ва бахусус кормандони шуъбаи библиографияи миллӣ, ки ин кори хеле заҳматталабро ба ҳадди касбӣ анҷом додаанд, изҳори миннатдорӣ намуда, гуфт, ки дар воқеъ барои таҳияи  ингуна дастурҳо вақти зиёд ва таҳқиқи пайваста лозим меояд, вале бовар дорем барои муҳаққиқони ҷавон бисёр маводи хуб мешавад.

Наргис Назарзода