Се нафар кормандони Китобхонаи миллӣ бо нишони “Аълочии фарҳанги Ҷумҳурии Тоҷикистон” сарфароз гардиданд
Се нафар аз ҷумлаи кормандони Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон барои хидматҳои шоиста дар таблиғи китоб ва дастовардҳои хубашон дар соҳаи китобдорӣ ба нишони фахрии “Аълочии фарҳанги Ҷумҳурии Тоҷикистон” сарфароз шуданд. Инҳо Зафар Саидов-мудири шуъбаи автоматикунии раванди китобдорӣ-иттилоотӣ, Муҳаммадиқбол Атоев – мудири маркази таҳсилот ва инноватсияҳои китобдорӣ ва Ҳадятуллоҳи Амриддин – мудири шуъбаи илмӣ-методӣ ва тадқиқотӣ мебошад.
Директори Китобхонаи миллӣ, профессор Ҷумахон Файзализода дар ҷаласаи ҷамъбасти фаъолияти шашмоҳаи Муассиса аз кори пурсамари тамоми шуъбаву бахшҳои Китобхона ҳарф зада, қайд намуд, ки ин шашмоҳа кулли бахшҳои Китобхонаи фаъолияти пурсамар доштанд.
Директори Китобхонаи миллӣ дар ҷараёни тақдими унвонҳои фахрӣ аз саҳми ҳар кадоми онҳо дар таблиғи сиёсати Ҳукумати Ҷумҳурии Тоҷикистон дар самти китобу китобдорӣ ибрози назар намуда, ба шоистаи ҳар қадрдонӣ будани кормандони пурталоши Китобхонаи миллӣ таъкид намуд.
Маврид ба зикр аст, ки роҳбарияти Китобхонаи миллӣ ҳамеша барои дастгирии кормандони фаъол ва касоне, ки ба корҳои илмӣ машғуланд, таваҷҷуҳи хоса зоҳир мекунад. Аз ҷумла, ҳар нафаре, ки рисолаи илмӣ дифоъ мекунад ва соҳиби унвони илмӣ мешавад, аз ҷониби роҳбарият 3 ҳазор сомонӣ ҷоиза мегирад.
Наргис НАЗАРЗОДА