Сеюмин нашри китоби «Мақомоти ҳифзи ҳуқуқи Тоҷикистон»
Нашри сеюми китоби дарсии Маҳмудзода М.А. Худоёрзода Б.Т. «Мақомоти ҳифзи ҳуқуқи Тоҷикистон» дар асоси дастовардҳои навини илмӣ бо назардошти стандартҳои таълимии давлатӣ омода гардида, барои баланд бардоштани савияи дониши Ҳуқуқии донишҷӯёни факултетҳои ҳуқуқшиносии муассисаҳои олии таълимӣ ва ба ин васила шиносоӣ пайдо намудани онҳо бо сохтор ва фаъолияти мақомоти ҳифзи ҳуқуқ мусоидат менамояд.
Мазмуни китоби мазкур аз таҳлили санадҳои меъёрии ҳуқуқии танзимкунандаи фаъолият, сохтор ва вазъи ҳуқуқии мақомоти судӣ, прокуратура, таҳқиқу тафтиши пешакӣ, адвокатура ва дигар мақомоти ҳифзи ҳуқуқ асос ёфта, он бо дарназардошти тамоми тағйиру иловаҳои ба санадҳои меъёрии ҳуқуқӣ таҳия гардидааст.
Китоби мазкур ба донишҷӯён, аспирантон, омӯзгорони факултетҳои ҳуқуқшиносӣ, кормандони мақомоти ҳифзи ҳуқуқ ва шахсоне, ки ба фанни мақомоти ҳифзи ҳуқуқ мароқ зоҳир менамоянд, тавсия шудааст.
Он барои хизматчиёни давлатӣ, донишҷӯён, шунавандагони курсҳои такмили ихтисос, тайёркунӣ ва азнавтайёркунии касбӣ оид ба идораи давлатӣ, магистроне, ки аз рӯи барномаи «Идораи давлатӣ» таҳсил мекунанд, ба сифати китоби дарсӣ тавсия шудааст. Муаллифон ба ин назаранд, ки мумкин аст ин китоб барои тамоми ҳаводорони назарияи идораи давлатӣ манфиатдор бошад ва онҳо аз он маълумоти заруриро барои дарк ва таҳлили равандҳои идораи давлатии муосир пайдо намоянд.
Хоандагон китоби «Мақомоти ҳифзи ҳуқуқи Тоҷикистон»-ро метавонанд дар Китобхонаи миллӣ мутолиа кунанд.
Фарзона Шарифова,
мутахассиси шуъбаи
мукаммалгардонии фонд.