Шахси беназир ва роҳбари меҳрубон
Эй муаллим, чашмаи меҳру вафо,
Эй муаллим, шаҳчароғи раҳнамо.
Панди ту бошад ғизои маънавӣ,
Меҳри ту андар дили мо гашта ҷо.
Дар ҷомеаи фарҳангӣ имрўзаи тоҷик бо афроде рўбарў мегардед, ки дар ҷодаи омўзонидани забонҳои ҷаҳон, фарҳанг масъулиятро мақсаду мароми хеш қарор дода, бо ташаббусҳои некашон мақбули ҳамагону пешравии бозомўзии забон ва соҳаи фарҳанг гаштаанд ва пайваста дар ин самт талош меварзанд. Яке аз чунин шахсон Ғафуров Мамадназар Музофирбекович мебошад, ки солиёни зиёд дар Китобхонаи миллии Тоҷикистон дар ҷодаи фарҳангию маърифатӣ ва таълимии забономўзӣ ба кишвари азизамон хизмати босазо анҷом медиҳад. Ў пеш аз ҳама соҳибкасб, таълимдида ва таҷрибандухта мебошад. Дар фаъолияти корӣ эҳсоси баланди масъулиятшиносӣ дошта, агар кореро пеш гирад, ба анҷом мерасонад. Шахси хеле ғамхору роҳбари меҳрубон мебошад ва доимо ба ҳамкоронаш мадади амалии худро мерасонад.
Ғафуров Мамадназар таълимгирифтаи муассисаи таълимии бонуфуз – Донишгоҳи давлатии омўзгорӣ ба номи Т.Г.Шевченко (ҳоло Донишгоҳи давлатии омўзгори Тоҷикистон ба номи С.Айнӣ) солҳои 1985 -1990 мебошад.
Фаъолияти кории худро ў ба ҳайси омўзгори забони хориҷӣ муассисаи таҳсилоти миёнаи умуми №75 ноҳияи Шуғнон (солҳои 1990-1998) шурўъ намудааст. Баъдан методисти забонҳои хориҷии кабинети методӣ, муассисаи таҳсилоти миёнаи умуми №33 ноҳияи Рошткалъа (солҳои 1998-2010), омўзгори фанни забони хориҷии муассисаи таҳсилоти миёнаи умумии №29 ноҳияи Шоҳмансур кору фаъолият намудааст. Аз оғози ифтитоҳи Китобхонаи миллии Тоҷикистон (соли 2012) сараввал ҳамчун мутахассиси пешбар ва баъдан то ба сардори шуъбаи адабиёти хориҷии Китобхонаи миллии Тоҷикистон сазовори вазифа гардидааст.
Бо дастгири роҳбарияти Муассисаи давлатии «Китобхонаи миллии Тоҷикистон» ва зери роҳбарии Ғафуров Мамадназар шуъбаи мазкур фаъолияти худро густариш дода, фонди умуми он тариқи бақайдгири электронӣ чойгир карда шуд.
Дар шуъба намоиши китоби 18 давлати дунё, ки бо мо шарику ҳамкорӣ доранд, ташкил карда шуд, хонандагон ва меҳмонон метавонанд ҳамарўза аз ин намоиши китобҳо баҳра баранд. Боиси қайд аст, ки фаъолияти шуъбаи адабиёти хориҷӣ дар ҳамкорӣ бо олимони соҳаи китобдорӣ, китобхонашиносӣ, библиографишиносӣ, муассисаҳои таълимӣ, марказҳои такмили ихтисоси кормандони китобхонаҳо, сафоратҳо, китобхонаҳои шаҳру деҳот ва хориҷӣ кишвар пурсамар гардид.
Ҳамасола Асосгузори сулҳу ваҳдати миллӣ, Пешвои миллат, Президенти Ҷумҳури Тоҷикистон муҳтарам Эмомалӣ Раҳмон бевосита дар паёмҳову баромадҳои хеш зикр менамоянд, ки барои омўзиши забонҳои хориҷӣ дар тамоми макотиби миёнаву олӣ ва касбӣ диққат ҷиддӣ дода шавад. Пешвои миллат пеш аз ҳама аз ҷавонон даъват мекунанд, ки забон омўзанд. Ин аст, ки як бахши муҳими фаъолияти шуъба ташвиқ ва таблиғи омўзиши забонҳои хориҷист.
Фаъолияти забономўзӣ ва омода намудани мутахассисони соҳибкасб яке аз вазифаҳои муҳими Ғафуров Маҳмадназар мебошад. Ў дар омўзонидани забони олмонӣ шогирдон омода намудааст. Ҳамеша дар утоқи кории ў шогирдон баҳри омўзиш ва такмили забони олмонӣ ҳузур доранд.
Хизматҳои содиқонаи ў аз ҷониби роҳбарияти Китобхонаи миллии Тоҷикистон бо Ифтихорномаи Вазоратҳои маориф ва фарҳанги Ҷумхурии Тоҷикистон ва унвони фахрии Аълочии фарҳанги Ҷумҳурии Тоҷикистон қадр шудааст.
Ғафуров Мамадназар Музофирбекович дар байни коллективи кормандони Китобхонаи миллии Тоҷикистон ва дигар муассисаҳои фарҳангӣ обурў ва эътибори беҳамто дошта, ҳамчун шахси ташаббускору ташкилотчӣ ва масъулиятшинос ном бароварда аст. Зеро ў дар ҳама чорабиниҳои Китобхонаи миллии Тоҷикистон фаъолона ҳисса мегузораду барои ҳамкасбони ҷавонаш мураббӣ мебошад.
Дар ин ҷода ба вай комёбиҳои беназир орзумандем. Бигзор теъдоди чунин шахсон дар Китобхонаи миллии Тоҷикистон зиёд ва боиси комёбиҳои корӣ ва ифтихори кормандон гардад.
Валиев Ҷамил, корманди шуъбаи адабиёти хориҷӣ.