Силсилавохӯриҳои кормандони Медиатекаи Президенти Ҷумҳурии Тоҷикистон

(Омодагии муассисаҳои олии кишвар ба озмунҳои ҷумҳуриявӣ)

Мутобиқи нақшаи корӣ кормандони Медиатекаи Президенти Ҷумҳурии Тоҷикистон бо мақсади корбарӣ бо донишгоҳҳо ва донишкадаҳои пойтахт ҷиҳати омодагӣ ба озмунҳои ҷумҳуриявии “Донандаи беҳтарини асарҳои Пешвои миллат”, “Фурӯғи субҳи доноӣ китоб аст” ва “Илм фурӯғи маърифат” ба муассисаҳои олии кишвар рафта, бо масъулин суҳбату вохӯрӣ меороянд.

Дар доираи ин вохӯриҳо  бо Мақсуд Сангов сардори шуъбаи ҳамоҳангсозӣ ва ташхиси Донишгоҳи миллии Тоҷикистон суҳбат намуда, аз вазъи омодагии донишҷӯён ба озмунҳои болозикр пурсон шуданд.

Зимни суҳбат маълум гардид, ки Донишгоҳи миллии Тоҷикистон ба ҳайси муассисаи бонуфузи олии кишвар дар омода намудани донишҷӯён ба озмунҳои ҷумҳуриявӣ бетараф набуда, устодони ботаҷриба бо шогирдон  барои иштирок дар ин озмунҳо омодагӣ гирифта истодаанд.

Инчунин, кормандони Медиатекаи Президенти Ҷумҳурии Тоҷикистон ба Донишгоҳи техникии Тоҷикистон ба номи М. Осимӣ рафта, бо Шамсиддин Бозоров  сардори Раёсати илм ва инноватсияи ҳамсуҳбат шуданд. Гуфта мумкин аст, ки Донишгоҳи техникии Тоҷикистон дар омода намудани кадрҳои баландихтисос пайваста талош намуда, ғайр аз ин барои ҳавасманднамоии донишҷӯён ба озмунҳои ҷумҳуриявӣ талош меварзанд.

Аз суҳбат бо Шамсиддин Бозоров муайян гардид, ки донишҷӯёни ин донишгоҳ дар қатори ширкат дар озмуни “Илм фурӯғи маърифат” ҳамчунин ба мутолиаи асарҳои бадеӣ завқ дошта, аз баргузории озмуни ҷумҳуриявии “Донандаи беҳтарини асарҳои Пешвои миллат” огоҳии амиқ доранд. Шамсиддин Бозоров илова намуд, ки озмунҳои мазкур дар ташаккули дониши довталабон таъсири бисёр калон дошта, онҳоро аз машғул шудан ба корҳои нолозим ва сарфи беҳудаи вақт бозмедорад.

Дар қатори Донишгоҳи миллии Тоҷикистон ва Донишгоҳи техникии Тоҷикистон кормандони Медиатекаи Президенти Ҷумҳурии Тоҷикистон ба Донишгоҳи байналмилалии забонҳои хориҷии Тоҷикистон ба номи С. Улуғзода рафта, бо Сардори Раёсати илм ва инноватсияи донишгоҳи мазкур Шамсиддин Ҳайбуллоев суҳбат карданд.

“Барои иштироки донишҷӯёни фаъол ва хоҳишманд дар озмунҳои номбурда омодагии ҷиддӣ дида истодаем ва қариб ҳамарӯза довталабони мо барои омодагӣ ба Китобхонаи миллӣ мераванд”,- мегӯяд Шамсиддин Ҳайбуллоев.

Бояд зикр кард, ки муассиси озмуни “Донандаи беҳтарини асарҳои Пешвои миллат” муассисаи давлатии ”Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон мебошад. Мақсад аз ташкили чунин суҳбату вохӯриҳо огаҳӣ ёфтан аз омодагии донишҷӯёни довталаб ба озмуни болозикр мебошад.

Вазифаи асосии Медиатекаи Президенти Ҷумҳурии Тоҷикистон дар сохтори Китобхонаи миллӣ ин ҳифз, нигаҳдошт, захира намудани тамоми адабиёт ва маълумот оид ба фаъолияти пурсамари  Пешвои миллат муҳтарам Эмомалӣ Раҳмон мебошад.

Бунафша Раҳмонова,
Масрура Мирзоҳасанова
кормандони Медиатекаи
Президенти Ҷумҳурии Тоҷикистон