Соҳибқирони шоирон устод Рӯдакӣ. Мизи гирд дар Китобхонаи миллӣ
Нимаи дуюми имрӯз бо ташаббуси Маркази “Забони тоҷикӣ ва омӯзиши забонҳои хориҷӣ”-и Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон мизи гирди илмию–адабӣ ба муносибати бузургдошти рӯзи Рӯдакӣ таҳти унвони “Соҳибқирони шоирон устод Рӯдакӣ” баргузор гашт.
Дар ин нишасти хотирмони илмӣ зумрае аз донишмандон, рӯдакипажӯҳони маъруф ва адабиётшиносони шинохта ширкат ва суханронӣ карданд.
Мизи гирдро муовини директори Муассисаи давлатии “Китобхонаи миллӣ” Ҷалолуддин Нурзода оғоз намуда, аз бузургии шеъру каломи Рӯдакӣ ва осори гаронбаҳои ӯ, ки ҳазорсолаҳост барои адабиёти форсу тоҷик хидмат мекунад, ҳарф зад.
Равонии шеъри Рӯдакӣ дар ҷаҳон бемисл аст, ки то имрӯз бо як мисраи “Бихандад лола бар саҳро…” мо шукуфтани лола ва таровати гулҳоро пеши назар меорем.Ин аст бузургии шеър ва бузургии шоир.
Ҷалолуддин Нурзода дар идомаи суханронии худ дар бораи Рӯзи бузургдошти Рӯдакӣ, ки ҳамасола 22 сентябр дар тамоми кишварҳои форсзабон таҷлил мегардад, ибрози назар намуда, инро ҳамчун як самти сиёсати фарҳангпарваронаи Пешвои миллат муҳтарам Эмомалӣ Раҳмон дар рушду инкишофи адабиётшиносӣ маънидод намуд.
Вафо Элбоев – доктори илми филология, профессори кафедраи назария ва таърихи адабиёти ДДОТ ба номи С.Айнӣ дар мавзуи “Шеъри Рӯдакӣ дар “Луғати фурс” –и Асадии Тӯсӣ маъруза карда, аз истифодаи бамавриди луғатҳо дар шеър ва шинохти баланд доштани устод Рӯдакӣ дар назм суҳбат кард. Мавсуф як паҳлуи бисёр боарзиши шеъри устодро ҳамчун намунае аз беҳтарин осоре, ки то имрӯз таъсири он миёни омма боқӣ мондааст, донист.
Шамсиддин Солеҳов – доктори илми филология, профессор мудири кафедраи назария ва таърихи адабиёти ДДОТ ба номи С.Айнӣ, дар мавзуи “Нақши Пешвои миллат дар ривоҷи рӯдакишиносӣ дар замони мо” баромад намуда, гуфт, ки дар замони мо дар баробари баррасии аҳволу осор ва шукуҳу азамати миллӣ ва адабию таърихии Рӯдакӣ Пешвои миллат ба чанд нуктаи дигар ишорат менамоянд ва таваҷҷуҳи аҳли таҳқиқро ба онҳо ҷалб месозанд. Нуктаи аввал муҳити зиндагӣ ва камолоти шоир, баъдан фазои сиёсӣ ва адабию илмӣ ва фарҳангии дарбори амирони Сомонӣ мебошад.Сарвари давлат таъкид менамоянд, ки Рӯдакӣ ҳанӯз дар овони наврасӣ Қуръонро аз бар намуда, ба омӯзиши дигар илмҳои маъмули замонаш оғоз карда буд.
Дар идомаи чорабини Анзурат Маликзода, номзади илми филология, ходиим пешбари илмии Институти забон ва адабиёти ба номи Абӯабдуллоҳи Рӯдакӣ дар мавзуи “Андешаҳои миллӣ ва умумибашарӣ дар шеъри Рӯдакӣ” баромад намуд. Шеъри Рӯдакӣ бо дараҷоти таъсиргузорӣ ва маъноии баланд доштан дар адабиёти ҷаҳон мавқеи худро дошта, мо дар таҳқиқу баррасиҳоямон борҳо рӯбарӯ шудаем, ки чи гуна шеър бо равониаш соҳибмақом мегардад.
Анзурат Маликзода дар идомаи суханронии худ қайд намуд, ки Рӯдакӣ ва шеъри ӯ то адабиёт ҳаст, то шеър ҳаст, то башар ҳаст боқӣ мемонад, чун дар сатҳи гуфтори ӯ то имрӯз касе шеър нагуфтааст.
Дар қисмати ҷамъбастии чорабини миёни олимону мутафакирон ва иштирокдорон мубодилаи афкор сурат гирифта, бо дубора арҷ гузоштан ба моқами шеъри форсӣ ва баланд бардоштани нуфузу эътибори он миёни аҳли илм ба итмом расид.
Наргис НАЗАРЗОДА,
бахши матбуот ва
робита бо ҷомеа