Сухан аз омодагии ду муассисаи олии омӯзишӣ ба озмунҳои ҷумҳуриявӣ
Тибқи супориши роҳбарияти Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон кормандони Медиатекаи Президенти Ҷумҳурии Тоҷикистон Раҳмонова Б. ва Мирзоҳасанова М. бо мақсади санҷиши омодагии донишгоҳҳо ва донишкадаҳои пойтахт ба озмунҳои ҷумҳуриявии “Донандаи беҳтарини асарҳои Пешвои миллат”, “Фурӯғи субҳи доноӣ китоб аст” ва “Илм фурӯғи маърифат” ба Донишгоҳи давлатии омӯзгории Тоҷикистон ба номи Садриддин Айнӣ ва Академияи идоракунии давлатии назди Президенти Ҷумҳурии Тоҷикистон рафтанд.
Дар Донишгоҳи давлатии омузгорӣ бо сардори Раёсати илм ва инноватсия Фарзона Абдумаҷидзода суҳбат намуданд. Дар рафти суҳбат муайян гардид, ки донишҷӯёни ин донишгоҳ барои иштирок дар Озмуни ҷумҳуриявии “Донандаи беҳтарини асарҳои Пешвои миллат” тайёрии ҷиддӣ мебинанд. Ҳамзамон, Ф. Абдумаҷидзода иброз намуд, ки омодагии онҳо ба дигар озмунҳои ҷумҳуриявӣ низ дар сатҳи олӣ ба роҳ монда шудааст ва миёни кафедраҳои донишгоҳ озмунҳои дохилӣ ташкил карда шудаанд.
Инчунин, кормандони Медиатекаи Президенти Ҷумҳурии Тоҷикистон бо муовини сардори илм ва инноватсияи Академияи идоракунии давлатии назди Президенти Ҷумҳурии Тоҷикистон Пайрав Изатуллозода ҳамсуҳбат шуданд. П. Изатуллозода иброз намуд, ки барои озмунҳои ҷумҳуриявии “Донандаи беҳтарини асарҳои Пешвои миллат”, “Фурӯғи субҳи доноӣ китоб аст” ва “Илм фурӯғи маърифат” омӯзгорон ва донишҷӯёни зиёд омодагӣ дида истодаанд. Гуфтан ба маврид аст, ки тайёрӣ барои озмунҳои ҷумҳуриявӣ дар ин муассиса низ ҷиддӣ ба роҳ монда шудааст.
Кормандони Медиатекаи Президенти Ҷумҳурии Тоҷикистон ҳамчунин бо директори Маркази омӯзишии “Мактаби давлатдории Эмомалӣ Раҳмон” номзади илмҳои филологӣ Назира Амирбекзода ҳамсуҳбат шуданд.
Гуфтан ба маврид аст, ки Озмуни ҷумҳуриявии “Донандаи беҳтарини асарҳои Пешвои миллат” бо мақсади арҷгузорӣ ба таърихи пурифтихори миллати тоҷик ва омӯзиши амиқу ҳамаҷонибаи корнамоиҳои наҷиб ва фаъолияти шоистаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ба ин васила дарёфти чеҳраҳои нави суханвару сухандон доир мегардад. Ҷиддӣ ва бо саъю кӯшиши баланд қарор доштани ин ду муассиса дар марҳалаи омодагӣ ба озмунҳои ҷумҳуриявии “Донандаи беҳтарини асарҳои Пешвои миллат”, “Фурӯғи субҳи доноӣ китоб аст” ва “Илм фурӯғи маърифат” қобили таҳсин аст.
Бунафша Раҳмонова,
Медиатекаи Президенти
Ҷумҳурии Тоҷикистон.