Суҳбати гарми маҳфили “Фурӯғ” дар атрофи ҳикояи “Дар талоши ҳаёт”

Бо ташаббуси шуъбаи адабиёти кӯдакон ва наврасони Китобхонаи миллӣ дар ҳамкорӣ бо телевизиони кӯдакону наврасон “Баҳористон” барномаи телевизионии “Фурӯғ” бо иштироки адиби дӯстдоштаи кӯдакон Азизи Азиз баргузор шуд. Чун маҳфил дар доираи озмуни “Фурӯғи субҳи доноӣ китоб аст” тавлид гаштааст, дар он хонандагони фаъоли шуъбаи адабиёти кӯдакон ва наврасон ва довталабони озмуни “Фурӯғи субҳи доноӣ китоб аст” ширкат варзиданд.

Ин навбат барномаи маҳфил ба таҳлилу баррасии асари нависандаи амрикоӣ Ҷек Лондон, ки бештар ҳамчун муаллифи ҳикоя ва романҳои саргузаштӣ машҳур аст, бахшида шуд.  Адиби маъруф Азизи Азиз маҳфилро оғоз намуда, иштирокчиёниро бо  ҳикояи баррасишаванда – “Дар талоши ҳаёт” шинос намуд. Ҳарчанд ин асар ба руйхати адабиёти ҷаҳон дохил мешавад, таҳлил намудани он ба мо имкон медиҳад, то мо донем, ки чӣ гуна суолҳоро ҳакам пешниҳод карда метавонад.

Қаҳрамони асосии асар дар байни биёбони беканор танҳо, бе хӯрок ва бе нушокӣ, бо силоҳи холӣ (бетир) мондаааст. Илова бар ин, пои ӯ захмист. Ӯ азобу шиканҷаи зиёдеро аз сар мегузаронад. Зимни суҳбат хонандагон лаҳзаҳои гуногуни ҳикояро таҳлил намуданд. Ҳар яке аз хотирмонтарин ва даҳшатбортарин саҳнаи ҳаёти қаҳрамони  асар гуфта гузаштанд. Ҳамчунин, аз ҳодисаҳои ба сари қаҳрамони асар омада ба якдигар саволҳои мухталиф додаву ҷавобҳо шуниданд.

Суолҳо бисёр ҷолибу гуногун буданд, аз қабили: Чаро Бил, шарикашро партофта гурехт? Душманони қаҳрамони асарро номбар кунед? Воқеаҳои асар дар кадом кишвар сурат мегиранд? Чаро қаҳрамони асосӣ ба худ иқрор шудан намехост, ки рафиқаш ӯро дар мусибат дастгирӣ накард? Дар паноҳгоҳе, ки шарикон дар аввали сафарашон барои худ интихоб карда буданд, чӣ чизҳо пинҳон карда шуда буданд? Лаҳзаи рӯ ба рӯ шудани хирс бо қаҳрамон? Чаро шарики Бил гуруснагияшро эҳсос намекард? ва  амсоли инҳо.

Бояд гуфт, ки хонандагони закии барнома ба суолҳояшон ҷавобҳои пурраву мантиқӣ мегирифтанд. Маҳфил хеле пурмуҳтавову шавқовар барпо шуд.

Ёдовар мешавем, ки ин барнома ҳафтае як маротиба баргузор мешавад ва барои довталабони озмуни ҷумҳуриявии “Фурӯғи субҳи доноӣ китоб аст” кумак менамояд.

Дар зимн, ин барномаро рӯзҳои наздик аз тариқи телевизиони кӯдакон ва наврасон “Баҳористон” метавонед тамошо кунед.

Махфират Муҳиддинова
бахши матбуот ва робита бо ҷомеа