Тақдими беш аз 200 нусха китоб ба шуъбаи хизматрасонӣ ба шахсони имконияташон маҳдуди Китобхонаи миллӣ
Дар арафаи таҷлили Рӯзи байналмилалии маъюбон фонди шуъбаи хизматрасонӣ ба шахсони имконияташон маҳдуди Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон бо беш аз 200 нусха китобҳои гуногун ғанӣ гардонида шуд.
Бояд қайд намуд, ки Ташкилоти USAID дар Тоҷикистон ҳамеша ба шахсони дорои имконоти маҳдуддошта кумак намуда, барои дастрасии онҳо ба маводҳои ниёзи аввала дасти ёрӣ дароз мекунад.
Ин навбат ташкилоти мазкур дар доираи лоиҳаи “Ҳамроҳ бихонем” ба Китобхонаи миллӣ дар доираи таҷлил аз Рӯзи маъюбон ба шуъбаи хизматрасони ба шахсони имконияташон маҳдуд китобҳои бадеӣ ва кӯдаконаро тақдим намуд. Ҳамчунин ба иттилои сардори шуъбаи мазкур Саодат Набиева дар ин миён китобҳои Брайлӣ (китобҳо барои нобиноён) беш аз 100 нусха буда, махсус барои шахсони нобино ва ё биноияшон суст пешниҳод шудаанд.
Ҳамчунин як адад кулер (обсардкун) ва ду адад рафи китобмонӣ ба шуъбаи маъюбон туҳфа карда шуд.
Қобили зикр аст, ки дар фонди шуъбаи мазкур беш аз 7400 нусха адабиёт нигоҳдорӣ мешаванд, аз ин шумора беш аз 1000 адади онро китобҳои брайлӣ ташкил медиҳанд. Аъзоёни шуъбаи хизматрасони ба шахсони имконияташон маҳдуд метавонанд аз онҳо ба таври васеъ истифода намоянд.
Шумораи хонандагони шуъба қариб 700 нафар буда, дар толори хониши он 14 адад компютер мавриди истифодаи хонандагон қарор дорад.
Ҳамчунин шуъбаи хизматрасони ба шахсони имконияташон маҳдуд ҳар моҳ маҳфилҳои «Равшандилон», «Хандарез», «Ганҷи сухан» ва инчунин бахшида ба ҷашну маросимҳо маҳфилҳои гуногуни фарҳангӣ доир менамоянд, ки ин барои ҷалби шахсони дорои маъюбиятдошта ба китобхонӣ ва лаҳзае шодию хурсандӣ бахшидан ба эшон мебошад.
Наргис Назарзода,
Бахши матбуот ва робита бо ҷомеа