Тақдими китобу дастхатҳо ва тасвирҳои Ҳошим Гадо ба Китобхонаи миллӣ

Тақдими 3 номгӯи китобҳои тозанашри Ҳошим Гадо ва дастхатҳои дигари ӯ ба Китобхонаи миллӣ. Ин асарҳо ва дастхатҳои муаллиф тавассути худи ҳунарманди маъруф ба Китобхонаи миллӣ туҳфа гардид.

Дар баробари туҳфаи осор ва дастхатҳо Суҳроби саҳнаи тоҷик-Ҳошим Гадо 87 тасвирашро (портрет) ба гӯшаи Ҳошим Гадо дар шуъбаи адабиёт доир ба фарҳанг ва ҳунар ҳадя намуд.

Ҳунарманди халқии Иттиҳоди Шӯравӣ, Арбоби ҳунари Тоҷикистон, дорандаи ҷоизаи давлатии Тоҷикистон ба номи Абӯабдуллоҳ Рӯдакӣ Ҳошим Гадоро муовини аввали директори Китобхонаи миллӣ Салима Раҷабзода ба ҳузур пазируфт.

Бояд тазаккур дод, ки Ҳошим Гадо бо Китобхонаи миллӣ ҳамкории пайваста дошта, китобҳои тозанашрашро мунтазам ба ин муассиса туҳфа менамояд.

Ҳошим Гадо ҳунарпешаи театру синамо, коргардони театр ва нависанда буда, бо нақшҳои мондагораш дар саҳнаи театр ва синамо шуҳрати беандоза дорад.

Баъди рафтан аз саҳна Ҳошим Гадо рӯ ба нависандагӣ овард ва ҳамакнун 1000-умин ҷилди осораш ба дасти хонанда расид.

Бино ба навиштаи Википедия аз бозии Ҳошим Гадо дар намошномаи “Рустам ва Суҳроб”дар Театри академӣ-драмавии ба номи Абулқосим Лоҳутӣ шаҳбонуи Эрон Фараҳ Паҳлавӣ мутаасир гардида, гиря ва аз ҳуш беҳуш шудааст.

Китобхонаи  миллӣ соли сипаришуда 86-солагии ин ҳунармнади бузургу тавоноро дар толори бузург бо шукуҳ ва хотирмон таҷлил намуда буд, ки дар он маҳфил дӯстдорони ҳунари волои ҳуранманди маҳбуб ҳузур пайдо намуданд.

Хонандагони гиромӣ барои мутолиаи осори ин нобиғаи аср метавонанд ба Китбхонаи миллӣ ташриф биёранд ва барои дидани филмҳо ва тавсирҳои нодири ӯ, ки ба ин Муассиса армуғон оврада буд, дар шуъдаи адабиёт доир ба фарҳанг ва ҳунар ошно гарданд.

Раҳима Аъзам, бахши матбуот ва робита бо ҷомеа.